4 تامىز كۇنى گرۋزيا استاناسى تبيليسيدە جوعالىپ كەتكەن 27 جاستاعى قازاقستان ازاماتى ءولى كۇيىندە تابىلدى، دەپ حابارلايدى "ادىرنا" ۇلتتىق پورتالى.
قايعىلى جاڭالىقتى گرۋزيانىڭ قازاقستانداعى ەلشىلىگى راستادى. قازىرگى ۋاقىتتا ونىڭ ولىمىنە قاتىستى ناقتى جاعدايلار انىقتالىپ جاتىر.
شىڭعىس ءمۇسادىلوۆتىڭ دوستارىنىڭ ايتۋىنشا، ونى سوڭعى رەت 3-تەن 4 تامىزعا قاراعان ءتۇنى ساعات 03:00–04:00 شاماسىندا تبيليسيدەگى "رۋستاۆەلي" مەترو ستانتسياسىنا جاقىن ورنالاسقان Laila كلۋبىنىڭ ماڭىندا كورگەن. سول تۇننەن كەيىن ول ۇيىنە ورالماعان جانە جۇمىسقا دا كەلمەگەن.
سول ۋاقىتتان باستاپ شىڭعىسپەن بايلانىس تولىق ۇزىلگەن. ول قوڭىراۋلار مەن حابارلامالارعا جاۋاپ بەرمەگەن.
جاقىندارى مەن دوستارى تبيليسي پوليتسياسىنا ارىز ءتۇسىرىپ، الەۋمەتتىك جەلىلەر ارقىلى ونىڭ ەرەكشە بەلگىلەرىن كورسەتىپ، اقپارات تاراتقان. ىزدەۋ بىرنەشە كۇنگە سوزىلعان.
ونىڭ ولىمىنە قاتىستى ناقتى سەبەپتەر مەن جاعدايلار ازىرگە جاريالانعان جوق. گرۋزيا قۇقىق قورعاۋ ورگاندارى بۇل ماسەلەگە بايلانىستى رەسمي تۇسىنىكتەمە بەرمەگەن.
