گرۋزيادا ەلدىڭ ەۋرووداقپەن قوسىلۋىن قولدايتىندار 2 جەلتوقسان كۇنى بەسىنشى كۇن قاتارىنان ۇكىمەتتىڭ ەۋروينتەگراتسيا كۋرسىنان باس تارتۋىنا قارسى نارازىلىق ءبىلدىردى. بۇل تۋرالى «كاۆكازسكي ۋزەل» ونلاين باسىلىمى مەن بىرنەشە Telegram-كانالدار جاريالادى، دەپ حابارلايدى “ادىرنا”.
پوليتسيا جينالعان حالىققا قارسى كوز جاسىن اعىزاتىن گاز، سۋ اتقىشتار مەن ءتۇتىن گراناتالارىن قولداندى.
Sovanews ونلاين باسىلىمىنىڭ مالىمەتىنشە، نارازىلىقتار تەك تبيليسيدە عانا ەمەس، سونىمەن قاتار باتۋمي، كوبۋلەتي، وزۋرگەتي جانە گرۋزيانىڭ باسقا دا قالالارىندا وتۋدە. DW ءتىلشىسىنىڭ باعالاۋى بويىنشا، تبيليسيدە جانە ەلدىڭ باسقا ءىرى قالالارىندا كوشەگە ونداعان مىڭ ادام شىققان.
سونىمەن قاتار، تبيليسيدە پارلامەنت عيماراتىنىڭ الدىنا جنالعاندار پيروتەحنيكانى قولداندى. رۋستاۆەلي داڭعىلىندا بارريكادالار ورناتىلدى. «ەحو كاۆكازا» مالىمەتىنشە، نارازىلىق بىلدىرۋشىلەر پارلامەنتتىڭ تەمىر قورشاۋىنا سوققى جاساپ، كەيىن سۋ اتقىش قولدانىلعان.
«رۋستاۆەلي داڭعىلىنداعى نارازىلىق بىلدىرۋشىلەردىڭ بەيبىت جينالىس شەگىنەن شىعىپ كەتتى، سوندىقتان ىشكى ىستەر مينيسترلىگى پارلامەنت عيماراتىنىڭ اينالاسىنداعى اۋماقتى تازالاۋ ءۇشىن زاڭمەن قاراستىرىلعان ارنايى شارالاردى قولداناتىن بولادى»، — دەلىنگەن گرۋزيا ءىىم 2 جەلتوقساندا جاريالاعان مالىمدەمەسىندە.
الدىڭعى كۇندەردە مينيسترلىك تبيليسيدە ءتورت كۇن ىشىندە 224 ادامدى ۇستاعانى تۋرالى حابارلادى.
گرۋزيانىڭ پرەمەر-ءمينيسترى يراكلي كوباحيدزە 2 جەلتوقساندا ءباسپاسوز ءماسليحاتىندا ەلدىڭ ەۋروينتەگراتسياسى «كەيىنگە قالدىرىلمايدى، بىراق بار كۇشپەن جالعاسادى» دەپ مالىمدەدى. سونىمەن قاتار ساياساتكەر وپپوزيتسيا وكىلدەرىمەن كەلىسسوزدەر جۇرگىزۋ مۇمكىندىگىن جوققا شىعاردى، دەپ حابارلايدى BBC.
DW ءتىلشىسىنىڭ بايقاۋىنشا، بيلىك وسىنداي مالىمدەمەلەر ارقىلى گرۋزين قوعامىن تىنىشتاندىرۋعا تىرىسىپ جاتىر، بىراق «قازىرگە دەيىن بۇل نارازىلىقتاردىڭ اياقتالۋى مەن ناتيجەسى بەلگىسىز». قانشا ۋاقىتقا سوزىلاتىنى جانە نەگە اپاراتىنى دا بەيمالىم.
سونىمەن قاتار، گرۋزيا پرەزيدەنتى سالومە زۋرابيشۆيلي ءتۇن ورتاسىنا جاقىن X الەۋمەتتىك جەلىسىندە اعىلشىن تىلىندە مالىمدەمە جاريالادى: «گرۋزيادا حالىق رەسەيشىل قۋىرشاق رەجيمىنە قارسى كوتەرىلىپ جاتىر. استانادان ەڭ كىشى قالالارعا دەيىن — بۇل ءبىزدىڭ تاريحىمىزدا بۇرىن-سوڭدى بولماعان قوزعالىس. حابار ايقىن: مەنىڭ داۋىسىمدى قايتارىڭدار! مەنىڭ ەۋروپالىق بولاشاعىمدى قايتارىڭدار».
گرۋزيانىڭ ەۋروينتەگراتسيادان باس تارتۋىنا قارسى نارازىلىقتار 28 قاراشادا كەشكە باستالدى، سول كەزدە پرەمەر-مينيستر يراكلي كوباحيدزە ەلدىڭ 2028 جىلعا دەيىن ەۋروپا وداعىمەن كەلىسسوزدەر جۇرگىزۋدەن باس تارتاتىنىن مالىمدەگەن ەدى. العاشقى كۇنى پوليتسيا نارازىلىق بىلدىرۋشىلەردى سۋ اتقىشتارمەن جانە كوز جاساۋراتاتىن گازبەن تاراتۋعا تىرىستى. بۇعان جاۋاپ رەتىندە اكتسياعا قاتىسۋشىلار بارريكادالار قۇرىپ، پارلامەنت عيماراتىنا فەيەرۆەركتەردەن «پۋلەمەت» اتا باستادى.
گرۋزيا پرەزيدەنتى سالومە زۋرابيشۆيلي العاشقى كۇنى نارازىلىققا قوسىلىپ، كەيىن مەملەكەتتىڭ باسشىسى رەتىندە ەلدە جاڭا پارلامەنتتىك سايلاۋ وتپەيىنشە ورنىنان كەتپەۋگە شەشىم قابىلدادى. ول قازىرگى پارلامەنتتى «زاڭسىز» دەپ اتادى. ال كوباحيدزە بۇل نارازىلىقتاردىڭ زورلىق-زومبىلىققا اكەلۋىنە ەۋروپا ساياساتكەرلەرى مەن وپپوزيتسيانى كىنالى دەپ مالىمدەدى.
