اشعابادتا ەكى مەكتەپ تۇلەگى مۇعالىمىنىڭ تاماعىنا ىدىس جۋاتىن سۇيىق سابىن قوسىپ، ۋلاعان دەپ حابارلايدى "ادىرنا" ۇلتتىق پورتالى "centralasian.org" سايتىنا سىلتەمە جاساپ.
قازىر اشعابادتا باگتىيارلىك اۋدانىنىڭ پوليتسيا بولىمشەسى مۇعالىمنىڭ ۋلانۋىنا بايلانىستى وقيعانى تەكسەرىپ جاتىر.
وقيعا 15 ماۋسىمدا مەكتەپ بىتىرۋشىلەرگە ارنالعان ەمتيحان كەزىندە بولعان. وقۋشىلار وزدەرىنە ازىق-تۇلىك پەن كوكا-كولا سۋسىنىن اكەلۋدى بۇيىرعان مۇعالىمدى وسىلاي جازالاماق بولعان.
ەمتيحاننان كەيىن جايىلعان داستارقاندا تاماق ءىشىپ وتىرعان مۇعالىمنىڭ جاعدايى كۇرت ناشارلاعان. ونى بىردەن جەدەل-جاردەم الىپ كەتكەن.
وسىدان كەيىن مەكتەپ باسشىلىعىن پوليتسياعا شاقىرعان. كەيىن بەلگىلى بولعانداي، وقۋشىلاردىڭ ءبارى سىنىپ جەتەكشىسىنە ازىق-تۇلىك ساتىپ الۋ ءۇشىن اقشا جيناعان. ەكى ەر بالا اقشانى الىپ، دۇكەنگە كەتكەن. قازىر وسى ەكەۋى كۇدىككە ىلىنگەن. بىرەۋىن ەمتيحاننان شىققان سوڭ، اسكەرگە الىپ كەتكەن.
"ادىرنا" ۇلتتىق پورتالى.
