استانادا سالىنىپ جاتقان تۇرعىن ءۇي كەشەنىنىڭ قۇرىلىس الاڭىندا ءۇش جۇمىسشى بەسىنشى قاباتتان قۇلادى، دەپ حابارلايدى "ادىرنا" ۇلتتىق پورتالى.
ولار ءتۇرلى دەڭگەيدەگى جاراقات الدى. وقيعا 18 قاراشا كۇنى شامامەن ساعات 11:00-دە بولعان.
زارداپ شەككەن جۇمىسشىلاردىڭ ءبىرى 1981 جىلى تۋعان. ەر ادامنىڭ ۇلى اكەسىنىڭ كۇلتەگىن كوشەسى، 16 مەكەنجايىنداعى Attila تۇرعىن ءۇي كەشەنىنىڭ بەسىنشى قاباتىنان قۇلاعانىن ايتتى.
«ماعان تەلەفون سوعىپ، اكەمنىڭ بەسىنشى قاباتتان قۇلاپ، اۋرۋحاناعا جەتكىزىلگەنىن ايتتى. بىردەن اۋرۋحاناعا باردىم. اكەمە 4-5 ساعاتقا سوزىلعان وپەراتسيا جاسالدى»، – دەدى ول.
ونىڭ سوزىنشە، اكەسىمەن بىرگە تاعى ەكى جۇمىسشى دا قۇلاپ كەتكەن.
«اكەمنىڭ جانىنداعى جىگىتتىڭ جاعدايى جاقسىراق. ەسىن بىلەدى، سويلەيدى، جۇرە الادى. ءبىر قابىرعاسى سىنعان، باسى مەن قۇلاعىنان جاراقات العان. ال اكەم باسىمەن قۇلاعان. ءبىر كوزى كورمەي قالدى، ءتىپتى الىپ تاستاۋى مۇمكىن»، – دەدى ول.
جەلىدە تاراعان، وقيعا ورنىندا تۇسىرىلگەن ۆيدەودا جۇمىسشىلار تۇرعان تەمىر كونسترۋكتسيانىڭ جەردە سىنعان كۇيدە جانە قانعا بويالعانى بايقالادى.
«ۆيدەوداعى سارى تەمىر – سول قۇلاعان پلاتفورما. دۇرىس دانەكەرلەنبەگەن، تەكسەرىلمەگەن. قاۋىپسىزدىك تەحنيكاسى ساقتالماعان، ونى قاداعالايتىن ادام بولۋ كەرەك ەدى»، – دەدى زارداپ شەككەننىڭ ۇلى.
ول سونداي-اق وقيعا ورنىنداعى ۆيدەولاردىڭ الدىمەن چاتتارعا جىبەرىلىپ، كەيىن جىلدام وشىرىلگەنىن ايتتى.
وقيعا بويىنشا ءتيىستى ورگاندار تاراپىنان تەكسەرۋ ءجۇرىپ جاتىر.
