بۇگىن ۇكىمەت وتىرىسىنان كەيىن پرەمەر-ءمينيستردىڭ ورىنباسارى تامارا دۇيسەنوۆا، ونەركاسىپ جانە قۇرىلىس ءمينيسترى قانات شارلاپاەۆ، توتەنشە جاعدايلار ءمينيسترى سىرىم ءشارىپحانوۆ ءباسپاسوز ءماسليحاتىن وتكىزدى، دەپ حابارلايدى «ادىرنا» ۇلتتىق پورتالى.
قاراعاندى شاحتاسىندا 46 ادام قازا تاۋىپ، ەلىمىزدە قارالى كۇن جاريالاندى. وسىنداي كەزدە پرەمەر-مينيستر ءاليحان سمايىلوۆ پرەسس-كونفەرەنتسياعا شىقپادى؟ بۇل سۇراققا تامارا قاسىمقىزى جاۋاپ بەردى.
«پرەمەر-ءمينيستردىڭ مەملەكەتتىك كوميسسيانىڭ باسشىسى ەكەنىن بىلەسىزدەر. سوندىقتان دا كوميسسيانىڭ جۇمىسىن اياقتاي كەلە وسى ءىس بويىنشا بارلىق ماسەلەنى وزدەرىڭىزگە جەتكىزەدى. سول سەبەپتى كوميسسيانىڭ جۇمىسىن كۇتكەندەرىڭىز دۇرىس شىعار دەپ ويلايمىن. قازىر سىزدەرگە قاجەتتى اقپاراتتاردى جەتكىزۋ ءۇشىن ارىپتەستەرىمىزبەن بىرگە جەدەل شىقتىق»، – دەدى ول.
سونداي-اق باق وكىلى ۆيتسە-پرەمەرگە «پرەمەر-مينيستر جۋرناليستەردىڭ الدىنا شىعۋ ءۇشىن قانشا ادام قازا تابۋ كەرەك؟» دەپ سۇراق قويعان بولاتىن.
«مەن سىزگە قايتالاپ ايتايىن، بۇل ادامنىڭ سانىنا بايلانىستى ەمەس قوي. قازىر ارىپتەستەرىمىز ول كىسىنىڭ شاحتا بويىنشا جەتى كوميسسيانىڭ جۇرگىزگەن جۇمىستارىن قاراپ، ولاردىڭ ەسەبىن تىڭداپ جاتقانىن ايتتى. سول كوميسسيانىڭ جۇمىستارى بويىنشا ول مىندەتتى تۇردە ءوزىنىڭ پىكىرىن كوميسسيا توراعاسى رەتىندە جەتكىزەدى»، – دەدى تامارا قاسىمقىزى.
جالپى ۇكىمەت باسشىسى ءاليحان اسقانۇلى جۋرناليستەردىڭ الدىنا سيرەك شىعادى. ءماجىلىس دەپۋتاتى ەرمۇرات باپي ۇكىمەتتىڭ ەلگە قاراۋعا بەتى جوق دەپ ايتقان بولاتىن.
«ادىرنا» ۇلتتىق پورتالى
