امەريكالىق QuantumScape كومپانياسى ويلاپ تاپقان 2021 جىلعى جاڭا تەحنولوگيا - ليتي-مەتالل باتارەياسى ەلەكتروموبيلدەردى قۋاتتاۋعا ارنالعان قۇرىلعى. ەرەكشە سەپاراتور مەن انودتىڭ ارقاسىندا باتارەيا قۋات قورىمەن، جىلدام قۋاتتاۋىمەن، قىزمەت ەتۋ مەرزىمىمەن، قۇنى جانە قاۋىپسىزدىگىمەن ەرەكشەلەنەدى.
مامانداردىڭ ايتۋىنشا، مۇنداي باتارەيالار قۋات قورىن 560-تان 1000 شاقىرىمعا دەيىن ارتتىرادى. ءارى ەلەكتروموبيلدەردى جىلدام قۋاتتاۋعا مۇمكىندىك بەرەدى. ماسەلەن، وسىنداي باتارەيامەن كولىكتى 15 مينۋتتا 80% قۋاتتاۋعا بولادى. ال قۋات قورى ەكى ەسە ارتادى. سونىمەن بىرگە 800-دەن ارتىق تسيكلدەن كەيىن ءوزىنىڭ 80% داي سىيىمدىلىعىنىڭ ساقتايدى. بۇل ورتاشا ەسەپپەن 386,000 كم جۇرىسكە تەڭ (شامامەن 14-16 جىل ءاۆتوموبيلدى قالىپتى پايدالانۋ).
باتارەيانىڭ تاعى ءبىر جەتىستىگى - ونىڭ جەكە انودسىز شىعارىلۋىندا. ول قۋاتتالعان كەزدە كاتودتاعى ليتي يوندارى سەپاراتور ارقىلى قوزعالادى. ولاردىڭ اراسىندا جانە ەلەكترلى بايلانىستا تەگىس قابات جاسايدى. وسىدان كەيىن قۋاتتالۋ بارىسىندا شامامەن بارلىق يوندار كاتودقا ورالادى. مۇنداي قۇرىلىس باتارەيانىڭ ماسساسىن، كولەمىن، قۇنىن تومەندەتەدى.
QuantumScape كومپانياسى 2020 جىلى باتارەيانى العاشقى سىناقتاردان وتكىزدى. ءساتتى سىناقتاردان كەيىن نەمىس اۆتوموبيل ماركاسى - Volkswagen-مەن مامىلەگە كەلدى. كەلىسىمگە سايكەس اتالعان ماركا 2025 جىلى ليتي-مەتالل باتارەيالارى بار ەلەكتروموبيلدەر شىعارا باستايدى.
ناعيما ساحان
