ءبىزدىڭ گۇلنار

سىرتتان وقيتىنداردىڭ سەسسياسىنىڭ باستالۋى اقىندار ءۇشiن ۇلكەن توي. سول سىرتتان وقيتىن سىرتتانداردىڭ iشiندە دە قازاقتىڭ مىقتى اقىندارى بار. ولاردىڭ سەسسياسى ادەتتەگiدەن ۇزاققا سوزىلادى. اقىنداردىڭ ءار زاچەت الۋى – جالپىحالىقتىق مەرەكە. بiزدiڭ بۋىننىڭ ۇلەسiنە تيگەن بەدەلدi «زاوچنيكتەر» – ەسەنقۇل جاقىپبەكوۆ پەن شورابەك ايداروۆ. ەكەۋi دە ەلگە سiڭiمدi. ارتىق-اۋىس مiنەزدەرi جوق. اسiرەسە، اقكوڭiل ەسەنقۇلدىڭ بولمەڭە باس سۇعۋىنىڭ ءوزi بiر عانيبەت. «جiگiتتەر، سىرا iشەتiن نەلەرiڭ بار؟»، – دەيدi جاي عانا. بەرەمiز. «بالىق بار ما؟»، – دەيدi ول سوسىن. ارالدىڭ جiگiتتەرiنiڭ بولمەسiندە بالىق بولماۋشى ما ەدi. تالعات باتىرحان بالكونداعى قاقتالعان سارى سازاننىڭ بiرەۋiن ساعاعىنان ۇستاپ اكەپ ەساعاڭنىڭ قولىنا ۇستاتادى. «دۇرىس بولدى، – دەيدi اقىن اعامىز، – ەندi ماعان قايراتتى تاۋىپ بەرiڭدەر!». بەس قاباتتى شارلاپ، اقىن قايرات الiمبەكوۆتi iزدەپ كەتەمiز. ەسەنقۇل اعام قۇمارلىعىنىڭ قۇرامداس بولiكتەرiن تۇگەلدەپ، ۇشتاعانىن تiكتەپ العان سوڭ، سىرتقا بەتتەيدi. جانىندا شاشىنان بۋ بۇرقىراپ قايرات اقىن كەتiپ بارا جاتادى.

الدىمىزداعى كۋرستىڭ اقىندارى الىمدى كورiنەدi. ءتاۋiر بولماسا ولەڭدەرi ءالi كۇنگە دەيiن ەسiمiزدە تۇرار ما ەدi. ولەڭدەرiن ءور داۋسىمەن ءوزi وقىعاندا جايناتىپ جiبەرەتiن باۋىرجان جاقىپ («بەينەڭدi جۇرەم جاتتاپ اپ، جۇرەگiم – فوتواپپارات»), اسپايتىن، ساسپايتىن، ءوزi دە، ولەڭi دە ۇنەمi قايناپ جۇرەتiن قايرات الiمبەكوۆ («كۇلەدi ماعان، كۇلەدi, بiر قاۋىم قارعا، كۇلسە كۇلسiنشi, سولاردى ۇرعانىم بار ما؟!»), توماعا تۇيىقتاۋ مۇراتبەك وسپانوۆ («اقىن دەيمiز، ولەڭ دەيمiز، جىر دەيمiز، جىرىمىزدى جىرتىپ تاستاپ ءجۇر كەي قىز...») سول جىلداردىڭ وزiندە ولەڭنiڭ وكiل بالاسى ەمەس ءوز بالاسى ەكەنiن دالەلدەگەن-دi. ال بiزدەن ەكi جىل بۇرىن تۇسكەن كۋرستىڭ اقىندارى نۇرلان بەرعازيەۆ (ماۋكەنۇلى) پەن بەيبiت قۇسانبەكوۆ كوشتiڭ الدىن بەرمەي تۇردى.

ايتپاقشى، ارامىزدا اقىن قىزدار دا بارشىلىق ەكەن. الدىمىزداعى كۋرستارداعى بايان بەكەتوۆا، ءۇمiتحان التاەۆا، گۇلباھرام جەبەسiنوۆا، ەلەنا تاڭباەۆا – تانىلىپ قالعان اقىندار. بiزدiڭ كۋرس تا اقىن قىزداردان كەندە ەمەس كورiنەدi. اتىراۋلىق كوزiلدiرiكتi قىز ساۋلەش شاتەنوۆا مەن ءجۇزi ۇنەمi الاۋلاپ تۇراتىن كەگەندiك اقسارى قىز نۇرميرا الiشەروۆا ەكەۋi ءتۇن بالاسى ۇيقى كورمەي ولەڭ جازادى. تۇنiمەن جازعان ولەڭدەرiنەن تويات تاۋىپ، ەرتەڭiنە ساباقتا ەكەۋi دە ەكi بەتi البىراپ وتىرادى. تىم ەرتە تۇرمىس قۇرعان نۇرميرا اقىن («جەم بولىپ كەتكەن قىرعيعا، جاعدايىڭ قالاي، نۇرميرا؟») ولەڭ ولكەسiن ءوز ەركiمەن تاستاپ شىقتى دا، ساۋلەش شاتەنوۆا ءارi قاراي جالعاستىرا بەردi. بۇگiندە سول ساۋلەش – بiرنەشە ءمۇشايرادا بايگە العان بەلگiلi اقىننىڭ بiرi. اتىراۋداعى بiر اۋداندىق باسىلىمنىڭ باس رەداكتورى.

سويتسەك، ناعىز اقىن قىزدىڭ ءوز ورتامىزدا جۇرگەنiن بiلمەپپiز. ول باسقالار سياقتى بiرiنشi كۋرسقا تۇسە سالا جارقىلداپ جىر وقىعان جوق. دۋىلداسىپ ولەڭ وقىپ جاتقان ارقالى اقىنداردىڭ توبىنا دا ارالاسپادى. جاپپاي كونسپەكت جازىپ، جابىلا ساباق وقىعان پىسىقتاردىڭ قاتارىنا دا قوسىلمادى. موينىنا قالىڭ شارفىن وراپ الىپ، جۇمباق كۇيدە وزiمەن-ءوزi جۇرەتiن دە قوياتىن. «سەن ماعان شارفىڭدى بەر، شارفىڭدى بەر، ءجۇزىمدى قىردىڭ جەلى شارپىپ جۇرەر» دەپ ورشەلەنە ۇمتىلاتىن مۇقاعاليى دا جوق ەدى ونىڭ... ەلدiڭ كوزiنە دۋدىراعان شاشى بiردەن تۇسەتiن. باياعى بارشامىزعا تانىس اندجەلا دەۆيستiڭ دوڭگەلەك قالپاق تارiزدەنگەن بۇيرا شاشىنان كەيiن وسىنداي قالىڭ شاش كورiپ تۇرعانىمىز... قازiر قازاق پوەزياسىنىڭ جارىق جۇلدىزدارىنىڭ بiرiنە اينالعان اسا دارىندى اقىن گۇلنار سالىقبايدىڭ ستۋدەنت كەزدەگi كەيپi وسىنداي ەدi.