تۇركى ارۋى
و، تۇركىنىڭ ارۋى، كوزدەرىڭ نۇر توگىلگەن،
قارا قاسىڭ قيعاش پا،
شىرشىق پا؟
جوق.
كەرۋلەن؟!
الما ءجۇزىڭ اق شاعىل، ءيىسىڭ يران باقشا ءبىر،
باتىپ ولگەن شايىرمىن ديدارىڭا سەنىڭ مەن!
و، تۇركىنىڭ ارۋى، ءتىسىڭ مارجان تىزىلگەن،
قىپشا بەلىڭ – قاۋىرسىن، اققۋلاردان ۇزىلگەن!
ەرىنىڭ – تاراز شيەسى، كۇن سۇيەدى، مەن سۇيەم،
قارا ەرتىس شاشىڭدى ايمالايدى قىزىل جەل.
و، تۇركىنىڭ ارۋى، حانشاسىنداي حانداردىڭ،
سانسىز اسكەر وتتارى – كوزدەرىڭدە جانعان كۇن.
سەنى ءسۇيىپ قالدىم مەن،
فاتيماسى مۇحتاردىڭ،
گۇلباھرامى ساكەننىڭ،
زىليحاسى ماعجاننىڭ!
سارىارقانىڭ جۋسانى – دەمىڭ جۇپار اڭقىعان،
جۇرەگىڭنىڭ وتىنا ءپارۋاناداي شارپىلام.
جۇرەگىمنىڭ ۇستىندە بيلە تۇركى ارۋى،
جاقىنداساڭ تاسيمىن، الىستاساڭ سارقىلام.
سەنىڭ اناۋ بۇرىمىڭ بايسالدى كوش، كەرۋەن،
سەنىڭ ءسوزىڭ – اق الماس، ۇشكىر جەبە، تەمىرەن.
شابىتىما داريا مالىپ قۇستار قاناتىن،
جۇرەگىمنەن ۇشادى ساعان قاراي توبىمەن.
اق ماڭدايىڭ – حان ءتاڭىرى، كەرمە يىعىڭ – الاتاۋ،
اقشا بەتىڭ وگەلىن بەگىم كىرگەن اق وتاۋ.
سەنىڭ جىبەك مىنەزىڭ، سەنىڭ جۇمساق بىلەگىڭ،
جەلپي ۇشقان جانىمدى قوڭىر قازدىڭ قاناتى-اۋ.
قۇس جولىنداي قۇبىلىپ تۇيمەلەرىڭ قاتارى،
ساعان ۇقساپ اتقان تاڭ، ساعان ۇقساپ باتادى.
كامزولىڭدى قىناي بەل، كويلەگىڭدى قاماجاي،
تىرنالاردىڭ تىراۋى تىستاپ بارا جاتادى.
و، تۇركىنىڭ بەگىمى، ساعان جانىم ساداعا،
سەنىڭ وتتى كوزدەرىڭ جارقىراعان سامالا.
ەرتەگىدەن، ەپوستان شىعا كەلگەن پەريزات،
باي-باعلانعا بۇرىلما،
قۇل-قۇتانعا قاراما.
ساكەندەردىڭ سۇلۋىن،
ماعجانداردىڭ عاشىعىن،
ەلەستەتىپ كوزىمە الدىمنان شىق، اسىلىم.
جۇرەگىمە قون مەنىڭ، قۇز-جارتاسقا قۇلديلاپ،
جۇرەگىمنەن ۇش مەنىڭ، لاعىل قانات لاشىنىم!
ءبىز – كوشپەندىلەرمىز
ءبىز – كوشپەندىلەرمىز!
عالامدى سەلدەي جاپىرىپ كوشكەن عۇن-ەلمىز!
قارا قازاننىڭ استىندا قالعان بالانى،
قاسقىر ەمىزىپ، ورتەڭنەن وسكەن تۇمەنبىز!
ءبىز – كوشپەندىلەرمىز!
ءدۇر دۇنيەنى ءالى ىشتەي سەسكەندىرەرمىز!
ءححىى عاسىردىڭ قاقپاسىنان دا،
جىلقى جۋساتىپ،
قوي جايىپ،
قوسپەن كىرەرمىز!
ءبىز – كوشپەندىلەرمىز!
ايدارىمىزدان التىن جەل ەسكەن ءدۇر ەلمىز!
ەۋروپانىڭ تۇسىنە اتتىلى تۇرك،
«قۇج قالقىپ، قولا ساپىرعان» پەشپەن كىرەرمىز!
ءبىز – كوشپەندىلەرمىز!
بابالار سالعان سارا جول، كوشپەن جۇرەرمىز.
ءجۇن تۇتكەن اجە.
سۇر قۇماي.
وق جونعان جىگىت.
نارىعىڭىزعا نار ءمىنىپ كەشتەۋ كىرەرمىز.
ءبىز – كوشپەندىلەرمىز!
ءبىر كىسىدەي-اق داۋرەندى كەشكەن ءدۇر ەلمىز.
ماڭدايىمىزدى ءسۇيدىرىپ كوك تاڭىرىنە،
ارقامىزدى ارۋاق دەسپەن تىرەرمىز!
ءبىز – كوشپەندىلەرمىز!
ۋاقىتتان بالكىم ازىراق كەشتەۋ جۇرەرمىز.
قىمىز اشىتىپ،
قىز قۋىپ،
سەركە سىلكىلەپ،
تارپاڭ تۇلپاردىڭ باسىنان شەشكەن جۇگەن – ءبىز!
ءبىز كوشپەندىلەرمىز!
ءبىز كوشپەندىلەرمىز!
ميراس اسان
