قازاق تەاتر ونەرىنىڭ تارلاندارىنىڭ ءبىرى، اكتەر، تەاتر رەجيسسەرى - سلامبەك اينەكبايۇلى جۇماعاليدىڭ تۋعانىنا 65 جىل تولدى. اكتەر وسىدان ءبىر جىل بۇرىن ىندەت سالدارىنان قايتىس بولعان ەدى.
تەاتر تارلانىن، جۋرناليست امانعالي قالجانوۆ ءوزىنىڭ Facebook پاراقشاسىندا، سلامبەك اينەكبايۇلىمەن وتكەرگەن ەستەلىكتەرى مەن جاساعان يگى امالدارىن جازىپ، ۇلكەن تەبىرەنىسپەن ەسىنە الدى.
"كەشە اكتيور، تەاتر رەجيسسەرى سلامبەك جۇماعاليدىڭ (1956-2020) تۋعانىنا 65 جىل تولدى. امال جوق، ەندى سولاي ايتامىز. ءبىر جىلداي بۇرىن ىندەت ورەلى ونەرپازدى ارامىزدان جۇلىپ الىپ كەتتى...سلامبەك اينەكبايۇلىمەن فب-دا دوس ەدىك، ومىردە جاقىن ارالاسىپ ۇلگەرمەدىك. الەۋمەتتىك جەلىدە ماعان ۇنەمى تىلەكتەستىگىن ءبىلدىرىپ تۇراتىن. جاقسى ادام ەدى. بىرنەشە جىل بۇرىن اياۋلى جارى، اكتريسا بايان اۋكەشوۆا ومىردەن وزعان ەدى. سلامبەك اعا سوندا قاتتى قايعىردى. ارادا از ۋاقىت وتكەندە سوڭىنان اتتاندى...سلامبەك اينەكبايۇلىنىڭ ەڭبەگى س. سەيفۋللين اتىنداعى قاراعاندى وبلىستىق اكادەميالىق قازاق دراما تەاترىنا سىڭۋدەي-اق ءسىڭدى. وسىندا اكتەر بولىپ، رەجيسسيور رەتىندە سپەكتاكلدەر قويدى.الاتاۋ ازاماتى ارقاعا ءسىڭىپ كەتكەن ەدى. بەرتىندە عانا ونىڭ الاتاۋ باۋرايىندا تۋعانىن ءبىلدىم. بار بولمىسىمەن ارقانىڭ ازاماتىنداي ەلەستەيتىن. سويتسەم، الاتاۋدىڭ اسقاقتىعىن، ارقانىڭ كەڭدىگىن بويىنا سىڭىرگەن ەكەن.كەشەلى بەرى فب-دا سلامبەك اعا تۋرالى بىرەۋ بىردەڭە جازا ما دەپ ويلاعان ەدىم، ونداي ەشتەڭەنى بايقامادىم. سوندىقتان اسىل ازاماتتى وسىلاي ەسكە الۋدى ءجون كوردىم.جاتقان جەرى جايلى، توپىراعى تورقا بولسىن! رۋحى پەيىشتە شالقىسىن! جاساماعان جاسىن جاراتقان ۇرپاعىنا بەرسىن!" دەپ جازدى ول ءوز جازباسىندا.
سلامبەك جۇماعالي - اكتەر، پۋبليتسيست 1956 جىلى دۇنيەگە كەلگەن. الماتى مەملەكەتتىك تەاتر جانە ونەرى ينستيتۋتىن (1981), قارمۋ-ءدى بىتىرگەن (1997). 1984 جىلدان س. سەيفۋللين اتىنداعى وبلىستىق قازاق دراما تەاترىنىڭ ءارتيسى ءارى ادەبيەت ءبولىمىنىڭ مەڭگەرۋشىسى قىزمەتىن اتقارعان.
ونىڭ ويناعان ك. جۇمابەكوۆتىڭ «زامانا نەتكەن تار ەدىڭ...» — اباي، ءا. ورازبەكوۆتىڭ «ءبىر ءتۇپ الما اعاش» — ەرعالي، م. اۋەزوۆتىن «ايمان-شولپان» — كوتىبار بەينەلەرىنىڭ شوقتىعى بيىك.
تەاتر سالاسىنداعى وشپەس ەرەن ەڭبەگى ءۇشىن اباي اتىنداعى رەسپۋبليكالىق فەستيۆالدىن كۇمىس جۇلدەگەرى (1995), مادەنيەت مينيسترلىگىنىن «مادەنيەت قايراتكەرى» كۇرمەت بەلگىسىمەن ماراپاتتالدى (2002).
"ادىرنا" ۇلتتىق پورتالى
