قر حالىق ءارتىسى ب.ريموۆا: «ونەردەگى شىندىق – اكتريسانىڭ جانىنان باستالادى.»-دەيدى. شىنىمەن دە، اكتريساننىڭ جانى-ءرولدىڭ شىنايىلىعىن، بولمىسىن اشادى.
وسىنداي قاسيەت استانا قالاسى اكىمدىگىنىڭ مۋزىكالىق جاس كورەرمەندەر تەاترىنىڭ اكتريساسى زاميرا ساپاردىڭ بويىندا بار. زاميرانىڭ ەڭبەك جولى مۇحتار اۋەزوۆ اتىنداعى قازاق ۇلتتىق دراما تەاترىنان باستالدى. قازاق تەاتر ونەرىنىڭ كيەلى قارا شاڭىراعىندا اكتريسا قىزمەتىندە جۇرگەندە ۇلاعاتتى ۇستازى، قر ەڭبەك سىڭىرگەن قايراتكەرى، اسحات ماكسيمۇلى ماەميروۆتىڭ شاقىرتۋىمەن استانا قالاسىنا جاڭادان شىمىلدىعى اشىلىپ جاتقان «Astana Musical» تەاترىنا كەلەدى. ەلورداداعى اتالمىش جاس ونەر شاڭىراعىنىڭ تۇساۋى ءا.باعداتتىڭ «دوستار سەرتى» ميۋزيكلىمەن كەسىلدى. اتالعان ميۋزيكلدە زاميرا-اسەم بەينەسىن كەسكىندەدى. زاميرا-اسەم – مەيىرىمدى، ادال، دوستىققا بەرىك جان. ونىڭ مىنەزىندە شىنايىلىق پەن تازالىق باسىم. ول تەك سىرتقى سۇلۋلىعىمەن ەمەس، جان دۇنيەسىنىڭ بايلىعىمەن ەرەكشەلەنەدى. اسەم ءۇشىن دوستىق – جاي ءسوز ەمەس، ول ومىرلىك ۇستانىم. ميۋزيكل بارىسىندا اسەم ءتۇرلى سىناقتاردان وتەدى. ول دوستىق پەن ماحاببات اراسىندا تاڭداۋ جاساۋعا ءماجبۇر بولاتىن ساتتەرگە تاپ بولادى. وسى ارقىلى كەيىپكەردىڭ ىشكى قاقتىعىسى اشىلىپ، ونىڭ رۋحاني ءوسۋى بايقالادى. «قىز جىبەك» ەتنو-فولكلورلىق ميۋزيكلى-كورەرمەندەردىڭ جۇرەگىنە جول تاپقان قويىلىمداردىڭ ءبىرى بولدى. اسىرەسە، جاستار قاۋىمى ەرەكشە سۇيسىنە كورەتىن. اتالمىش شىعارمادا قىز جىبەكتى زاميرا ساپار كەسكىندەسە، تولەگەندى-سالامات مۇقاشەۆ بەينەلەدى. سالامات مۇقاشەۆ سومداعان تولەگەن مەن زاميرا ساپار كەسكىندەيتىن قىز جىبەك – ماحاببات پەن ەركىندىك يدەياسىنىڭ سيمۆولدارى. سالامات-تولەگەن- تەك عاشىق جىگىت ەمەس، ول ءوز تاڭداۋىنا جاۋاپ بەرەتىن تۇلعا بولىپ كەسكىندەلدى. زاميرا ساپار جىبەك بەينەسىن ليريكالىق ءارى تەرەڭ پسيحولوگيالىق دەڭگەيدە اشادى. ونىڭ ورىنداۋىندا جىبەك تەك ارۋ ەمەس، ءوز تاعدىرىن ءوزى تاڭداۋعا ۇمتىلعان جان رەتىندە كورىنەدى. بۇل قويىلىمدا تولەگەن مەن قىز جىبەك بەينەلەرى كلاسسيكالىق ەپوستىق سيپاتتان زاماناۋي ميۋزيكل تىلىنە كوشىپ، جاڭا قىرىنان اشىلادى. «Astana Musical» تەاترى زاميرا ءۇشىن شىڭدالۋ مەكتەبى بولدى. بۇل مەكتەپتە زاميرا تەك قانا ليريكالىق كەيىپكەرلەردى عانا ەمەس، سونداي-اق، انالار گالەرەياسىنىڭ كوشىن باستادى. اتالعان سوزىمىزگە، ج.پرەسگيۋۆنيكتىڭ «رومەو-دجۋلەتتا» ميۋزيكلىندەگى لەدي كاپۋللەتتي بەينەسى دايەك بولا الادى. لەدي كاپۋلەتتي بەينەسى – انالىق سەزىم مەن الەۋمەتتىك قاتالدىقتىڭ قايشىلىعىن كورسەتەتىن كۇردەلى وبراز. بۇل ءرولدى زاميرا ساپار ساحنادا ەرەكشە پسيحولوگيالىق تەرەڭدىكپەن اشادى. زاميرا-استانا قالاسى اكىمدىگىنىڭ مۋزىكالىق جاس كورەرمەندەر تەاترىنىڭ نەگىزىن سالۋشىلاردىڭ ءبىرى. جاس تەاتردىڭ شىمىلدىعى م.اۋەزوۆتىڭ «اباي-توعجان» دراماسىمەن اشىلعاندا زاميرا-ابايدىڭ جەڭگەسىن نۇسقالايدى. زاميرانىڭ مۋزىكالىق جاس كورەرمەنەر تەاترىنداعى ەرەكشە بەينەلەرىنىڭ ءبىرى- «CHANEL№5» دەرەكتى دراماسىنداعى جانبيكە شانينا بەينەسى. جانبيكە-زاميرا تاعدىر تەپكىسىنە مويىنسۇنىپ جۇرگەن قازاق ايەلى. ونىڭ بويىنان پاراساتتىلىق، تەكتىلىك، انالىق ماحاببات پەن جارىنا دەگەن ساعىنىش جاتىر. زاميرا وسىنى جەتە تۇسىنگەن. زاميرا-ونەر جولىندا ۇستازدارى بولات اتاباەۆ پەن اسحات ماەميروۆكە قارىزدار. ۇلاعاتتى جاندارىنا دەگەن قۇرمەتى ەرەكشە. اكتريسانىڭ كورەرمەندى تولعاندىرار بەينەلەرى ءالى الدا!
باحتيار تۇرسىن
تەاترتانۋشى
