17 ءساۋىر كۇنى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى عيماراتىندا قازاقستاننىڭ حالىق ءارتيسى، كورنەكتى رەجيسسەر، پروفەسسور ەسمۇحان نەسىپبايۇلى وباەۆپەن قوشتاسۋ ءراسىمى ءوتتى، دەپ حابارلايدى "ادىرنا" ۇلتتىق پورتالى.
قارالى جيىنعا مەملەكەت جانە قوعام قايراتكەرلەرى، مينيستر ايدا بالاەۆا، زيالى قاۋىم وكىلدەرى، شاكىرتتەرى مەن مارقۇمنىڭ جاقىندارى قاتىستى. جينالعاندار ونىڭ قازاق ساحنا ونەرىنە قوسقان زور ۇلەسى مەن ۇلتتىق رۋحانياتتىڭ دامۋىنا سىڭىرگەن ەڭبەگىن ەرەكشە اتاپ ءوتتى.
ەسمۇحان وباەۆ ۇزاق جىلدار بويى ەلىمىزدىڭ جەتەكشى تەاترلارىندا ەڭبەك ەتىپ، كوركەمدىك دەڭگەيى جوعارى، مازمۇندى قويىلىمدارىمەن كورەرمەن ىقىلاسىنا بولەندى. ونىڭ شىعارماشىلىق جولى ۇلتتىق قۇندىلىقتار مەن مادەني تاۋەلسىزدىك يدەيالارىمەن تىعىز بايلانىستى بولدى.
الماتى قالاسىنىڭ اكىمى دارحان ساتىبالدى كوڭىل ايتۋ جەدەلحاتىندا مارقۇمنىڭ ەل مادەنيەتىنە سىڭىرگەن ەڭبەگىن اتاپ ءوتتى.
«ەسمۇحان اعامىزدىڭ ومىرلىك ۇستانىمى مەن شىعارماشىلىق مۇراسى ەلدىك مۇددەمەن ساباقتاس بولدى. ونىڭ جارقىن بەينەسى مەن عيبراتتى عۇمىرى ەل جادىندا ماڭگى ساقتالادى»، – دەلىنگەن جەدەلحاتتا.
ايتا كەتەيىك، ەسمۇحان وباەۆ قازاق تەاتر رەجيسسۋراسىن جاڭا دەڭگەيگە كوتەرگەن تۇلعالاردىڭ ءبىرى سانالادى. ونىڭ جەتەكشىلىگىمەن ساحنالانعان كلاسسيكالىق جانە زاماناۋي قويىلىمدار ۇلتتىق مادەنيەتتىڭ التىن قورىنا ەندى. سونىمەن قاتار، پروفەسسور رەتىندە ول ونەر سالاسىندا بىرنەشە بۋىن تالانتتى شاكىرت تاربيەلەپ شىعاردى.
