Qazaq teatr önerınıŋ tarlandarynyŋ bırı, akter, teatr rejisserı - Slambek Äinekbaiūly Jūmaǧalidyŋ tuǧanyna 65 jyl toldy. Akter osydan bır jyl būryn ındet saldarynan qaitys bolǧan edı.
Teatr tarlanyn, jurnalist Amanǧali Qaljanov özınıŋ Facebook paraqşasynda, Slambek Äinekbaiūlymen ötkergen estelıkterı men jasaǧan igı amaldaryn jazyp, ülken tebırenıspen esıne aldy.
"Keşe aktior, teatr rejisserı Slambek Jūmaǧalidyŋ (1956-2020) tuǧanyna 65 jyl toldy. Amal joq, endı solai aitamyz. Bır jyldai būryn ındet örelı önerpazdy aramyzdan jūlyp alyp kettı...Slambek Äinekbaiūlymen FB-da dos edık, ömırde jaqyn aralasyp ülgermedık. Äleumettık jelıde maǧan ünemı tılektestıgın bıldırıp tūratyn. Jaqsy adam edı. Bırneşe jyl būryn aiauly jary, aktrisa Baian Äukeşova ömırden ozǧan edı. Slambek aǧa sonda qatty qaiǧyrdy. Arada az uaqyt ötkende soŋynan attandy...Slambek Äinekbaiūlynyŋ eŋbegı S. Seifullin atyndaǧy Qaraǧandy oblystyq akademiialyq qazaq drama teatryna sıŋudei-aq sıŋdı. Osynda akter bolyp, rejissior retınde spektaklder qoidy.Alatau azamaty Arqaǧa sıŋıp ketken edı. Bertınde ǧana onyŋ Alatau bauraiynda tuǧanyn bıldım. Bar bolmysymen Arqanyŋ azamatyndai elesteitın. Söitsem, Alataudyŋ asqaqtyǧyn, Arqanyŋ keŋdıgın boiyna sıŋırgen eken.Keşelı berı FB-da Slambek aǧa turaly bıreu bırdeŋe jaza ma dep oilaǧan edım, ondai eşteŋenı baiqamadym. Sondyqtan asyl azamatty osylai eske aludy jön kördım.Jatqan jerı jaily, topyraǧy torqa bolsyn! Ruhy peiışte şalqysyn! Jasamaǧan jasyn jaratqan ūrpaǧyna bersın!" dep jazdy ol öz jazbasynda.
Slambek Jūmaǧali - akter, publisist 1956 jyly düniege kelgen. Almaty Memlekettık teatr jäne önerı institutyn (1981), QarMU-dı bıtırgen (1997). 1984 jyldan S. Seifullin atyndaǧy oblystyq qazaq drama teatrynyŋ artisı ärı ädebiet bölımınıŋ meŋgeruşısı qyzmetın atqarǧan.
Onyŋ oinaǧan K. Jūmabekovtyŋ «Zamana netken tar edıŋ...» — Abai, Ä. Orazbekovtyŋ «Bır tüp alma aǧaş» — Erǧali, M. Äuezovtın «Aiman-Şolpan» — Kötıbar beinelerınıŋ şoqtyǧy biık.
Teatr salasyndaǧy öşpes eren eŋbegı üşın Abai atyndaǧy respublikalyq festivaldın Kümıs jüldegerı (1995), Mädeniet ministrlıgının «Mädeniet qairatkerı» kūrmet belgısımen marapattaldy (2002).
"Adyrna" ūlttyq portaly
Ūqsas jaŋalyqtar
