"تۇركيا يەرۋساليمدە پالەستيندىكتەردى تاۋلى قاراباحتا ءازىربايجاندى قالاي قولداسا، سولاي قولداۋعا دايىنبىز" دەپ نەشە كۇننەن بەرى كۇشەنىپ سويلەپ جاتقان ساياسي پوپۋليست رەجەپ تايىپ ەردوعان كومەك رەتىندە ارابتارعا اسكەر جىبەرۋ ءوز الدىنا، پالەستيناعا بۇگىنگە دەيىن ءبىر اۋە درونىن جىبەرگەن جوق.
ءازىربايجان مەن ارمەنيا اراسىنداعى سوعىستىڭ اسەرىنەن وزىنە ازداپ بەدەل جيناپ العان
(شىندىعىندا ارميان اسكەرىن كۇل-تالقان قىلعان ءيزرايلدىڭ اۋە دروندارى مەن قارۋ-جاراعى ەكەنىن ەستەن شىعارمايىق)
«ەردوعان تۇركى مەملەكەتتەردىڭ باسىن قوسىپ، الىپ يمپەريانىڭ باسشىسى بولۋعا شاق تۇر»، – دەگەن پىكىردىڭ كەڭىنەن تاراۋىنا ءدىنشىل ديكتاتوردىڭ ءوزى مۇددەلى ەكەنىن ءبارىمىز جاقسى ءتۇسىنىپ وتىرمىز.
ال شىنتۋايتىنا كەلگەندە «تۇران»، «تۇركى تىلدەس ەلدەردىڭ وداعى» دەگەن تارتىمدى ياكي جاقسى يدەيا بولسا دا، رەاليستىك كوزقاراس بويىنشا نەگىزى جوق اڭگىمە. قازىر تۇركى تىلدەس ەلدەر ءارتۇرلى گەوساياسي كىندىككە تارتىلعان. سايكەسىنشە، ول ەلدەردىڭ مەملەكەتتىك مۇددەلەرى دە ءار الۋان، ءتىپتى كەيبىر ەلدەر اراسىندا مۇددە قايشىلىعى دا كەزدەسەدى. بۇرىن ءبىرتۇتاس ساياسي-ەكونوميكالىق-مادەني تۇتاستىقتا بولعان ورتالىق ازيانىڭ التى ەلى (اۋعانستاندى قوسا العاندا) مۇددە بىرىكتىرە الماي وتىر. سوۆەتتەر وداعىنان ءبولىنىپ شىققان بەس ەلدىڭ اراجىگى اجىراپ، شاتقاياقتاپ تۇر. مۇنداي جاعدايدا جەرورتا تەڭىزىنەن تيبەتكە دەيىنگى اۋماقتى قامتىعان تۇركى تىلدەس ەلدەردىڭ باسىن بىرىكتىرۋ مۇمكىن بە؟!
ءازىربايجان مەن ارمەنيا ارسىنداعى سوعىستان كەيىنگى تۋىنداعان «تۇركىلەردىڭ رەۆانشى» دەگەن سيپاتتاعى ەردوعان تۇلعاسىنا قاتىستى اڭگىمە بار بولعانى ورتاعاسىرلىق حاليفاتتى اڭسايتىن وسمانشىل ديكتاتوردىڭ ساياسي جارناماسى بولىپ تابىلادى.
ال ەردوعاننىڭ قارا باسىنا كەلسەك، ول ءوزىن بىردە يسلام الەمىنىڭ، بىردە تۇركى الەمىنىڭ كوشباسشىسى ەتىپ كورسەتكىسى كەلەدى. بىراق، ول ەشقاشان اتاتۇرىك بولا المايدى.
«ەردوعان تۇركى الەمىنىڭ باسىن قوسادى» دەگەن ءسوز تۇركيادا ديكتاتوردىڭ جەكە پيارى عانا. ونىڭ ءسوزى مەن ءىسى ەش قابىسپايدى. مىسالى، اقش-تا باس ساۋعالاپ جۇرگەن فەتحۋلاح گۇلەن ەسىمدى تۇرىك ازاماتى بار. ول تۇركى ەلدەرىنىڭ مادەني بايلانىسىن كۇشەيتۋ ءۇشىن قوماقتى قارجى جيناپ قور ۇيىمداستىردى. ونىڭ ناقتى ءىسىن قازاق-تۇرىك، قىرعىز-تۇرىك، وزبەك-تۇرىك،... وقۋ ورىندارى سيپاتىندا كورىپ وتىرمىز. وسىنداي تۇركىشىل يدەياعا بەرىلگەن، ءارى سول يدەيانى جۇزەگە اسىرىپ جاتقان فەتحۋلاح گۇلەنگە ەردوعان نە ىستەدى؟ «گۇلەنشىلەر توڭكەرىس دايىنداپ جاتىر ەكەن» دەگەن جەلەۋمەن مىڭداعان تۇرىكتى، ونىڭ ىشىندە تۇركيانىڭ اسكەري ەليتاسى دا بار، ۇزاق جىلعا سوتتادى، «گۇلەنشىلەردى» قۋعىندادى. مۇنى ءبىز قازاق-تۇرىك ليتسەيلەرىن جابۋ جونىندەگى ەردوعاننىڭ قازاقستان بيلىگىنە قويعان ۋلتيماتۋمىنان بىلەمىز.
وسى وقيعانىڭ وزىنەن-اق ەردوعاننىڭ «تۇركىشىلدىك» اۋسەلەسىنىڭ دەڭگەيى كورىنىپ تۇر.سوندىقتان دا الەمجەلىدەگى قازاق قوعامى- پالەستينالىق ارابتار مەن ءدىنشىل ديكتاتورعا قۇلدىق ۇرىپ، سويىلىن سوعۋ مەن ءبىر-ءبىرىمىزدى كەمسىتۋدى دوعارىپ،كەدەيشىلىك پەن جەمقورلىقتان تيتىقتاعان حالقىمىزدى، نۇرجۇيەدەن تەزىرەك قۇتقارۋعا اتسالىسايىق!
تۇراربەك قۇسايىنوۆ،
"دەموس"قب توراعاسى
