استانا قالاسىندا بيىلعى مەكتەپ ءبىتىرۋشى تۇلەكتەر اراسىندا جاڭا الەۋمەتتىك ءۇردىس قالىپتاسىپ كەلەدى. قالالىق ءبىلىم بەرۋ باسقارماسىنىڭ مالىمەتىنشە، تۇلەكتەردىڭ شامامەن 70% پايىزى ءداستۇرلى مەيرامحانالاردا وتەتىن سالتاناتتى كەشتەردەن باس تارتىپ، مەكتەپ قابىرعاسىندا قاراپايىم ءارى مازمۇندى تۇردە قوشتاسۋدى ءجون كورگەن.
بۇل باستامانىڭ باستى ماقساتى – مەكتەپ ءبىتىرۋ كەشىنىڭ ءمانىن ءسان-سالتاناتپەن نەمەسە قىمبات داستارحانمەن ەمەس، رۋحاني قۇندىلىقتارمەن ۇشتاستىرۋ. تۇلەكتەر ءۇشىن ەڭ ماڭىزدىسى – ۇستازدارعا العىس ءبىلدىرۋ، سىنىپتاستارىمەن ەستەلىك ساتتەردى ءبولىسۋ جانە مەكتەپپەن تاعىلىمدى تۇردە قوشتاسۋ.
مەكتەپ اكىمشىلىكتەرىنىڭ ايتۋىنشا، مۇنداي شەشىم اتا-انالارعا تۇسەتىن ارتىق قارجىلىق جۇكتەمەنى ازايتىپ قانا قويماي، الەۋمەتتىك تەڭسىزدىك پەن داڭعازالىقتىڭ الدىن الۋعا مۇمكىندىك بەرەدى. سونىمەن قاتار جاستار اراسىندا قاراپايىمدىلىق، جاۋاپكەرشىلىك جانە تاربيەلىك قۇندىلىقتاردى دارىپتەۋگە وڭ ىقپال ەتۋدە. سونداي-اق مەكتەپ ءبىتىرۋ كەشتەرىن قاۋىپسىز ءارى ءتارتىپتى ورتادا وتكىزۋگە جول اشىپ وتىر.
جاڭا ءۇردىستىڭ ماڭىزدى ەرەكشەلىگىنىڭ ءبىرى تۇلەكتەردىڭ الەۋمەتتىك جوبالارعا بەلسەندى ارالاسۋى. اتاپ ايتقاندا، تۇلەكتەر بالالار ۇيلەرىنە قايىرىمدىلىق كومەك كورسەتىپ، الەۋمەتتىك جاعدايى تومەن وتباسىلارعا قولداۋ بىلدىرۋدە. سونىمەن قاتار قالا كوشەلەرىنە اعاش وتىرعىزىپ، قوعامدىق ورىنداردى كوگالداندىرۋ جانە تازالىق اكتسيالارىنا بەلسەندى قاتىسىپ جاتىر.
سونىڭ ىشىندە №101 جالپى ورتا مەكتەبىنىڭ تۇلەكتەرى دە يگى باستامادان شەت قالمادى. ولار بالالار ۇيلەرىنە ارنايى بارىپ، كىشكەنتاي بۇلدىرشىندەرگە ويىنشىقتار مەن قاجەتتى كيىم-كەشەكتەر تابىستادى. تۇلەكتەر بالالارعا كوتەرىڭكى كوڭىل-كۇي سىيلاپ، قايىرىمدىلىق شاراسى ارقىلى مەيىرىمدىلىك پەن جاناشىرلىقتىڭ جارقىن ۇلگىسىن كورسەتتى. سونىمەن قاتار مەكتەپ بىتىرۋشىلەرى وزگە تۇلەكتەردى دە وسىنداي يگىلىكتى ءىس-شارالاردى قولداۋعا جانە قوعامعا پايدالى باستامالارعا بەلسەندى قاتىسۋعا شاقىردى.
ءبىلىم بەرۋ سالاسى وكىلدەرىنىڭ پىكىرىنشە، بۇل ءۇردىس جاس ۇرپاقتىڭ الەۋمەتتىك جاۋاپكەرشىلىگىن ارتتىرىپ، مەكتەپ ءبىتىرۋ مادەنيەتىنىڭ مازمۇنىن وزگەرتىپ كەلەدى. قاراپايىم فورماتتاعى كەشتەر ءبىر جاعىنان قارجىلىق قىسىمدى ازايتسا، ەكىنشى جاعىنان جاستاردى قوعامعا پايدالى ءىس جاساۋعا ىنتالاندىرادى.
وسىلايشا، استانا تۇلەكتەرى ءۇشىن مەكتەپپەن قوشتاسۋ تەك مەرەكەلىك شارا عانا ەمەس، سونىمەن قاتار ادامگەرشىلىك پەن ازاماتتىق جاۋاپكەرشىلىكتى دارىپتەيتىن ماڭىزدى قادامعا اينالىپ وتىر.
