تۇركيا بيلىگى ىستامبۇل مەرى ەكرەم يماموعلۋدى قاماۋعا الدى، دەپ حابارلايدى "ادىرنا" ۇلتتىق پورتالى.
ول – ەلدەگى ەڭ ىقپالدى وپپوزيتسيالىق ساياساتكەرلەردىڭ ءبىرى جانە قازىرگى پرەزيدەنت رەجەپ تايىپ ەردوعاننىڭ نەگىزگى قارسىلاسى ءارى پرەزيدەنتتىككە باستى ۇمىتكەر.
يماموعلۋعا جەمقورلىق، قىلمىستىق ۇيىمدى باسقارۋ، تەندەرلىك الاياقتىق جانە تىيىم سالىنعان كۇردىستان جۇمىسشى پارتياسىنا (رپك) جاردەمدەسۋ ايىپتارى تاعىلدى.
تەرگەۋ اياسىندا 100 ادامدى، ونىڭ ىشىندە جۋرناليستەردى، كاسىپكەرلەردى جانە مەردىڭ ەڭ جاقىن سەرىكتەرىن قاماۋعا الۋ تۋرالى وردەر بەرىلدى. ولاردىڭ قاتارىندا يماموعلۋعا اقپاراتتىق قولداۋ كورسەتكەن كەڭەسشىسى مۋرات وڭگۋن دا بار. سونىمەن قاتار، مەردىڭ رەزيدەنتسياسىندا ءتىنتۋ جۇرگىزىلدى.
قاماۋعا الىناردان ءبىر كۇن بۇرىن ىستامبۇل ۋنيۆەرسيتەتى يماموعلۋنىڭ ديپلومىن جارامسىز دەپ تانىدى. بۇل – تۇركيا كونستيتۋتسياسىنا سايكەس ونىڭ پرەزيدەنتتىك سايلاۋعا ءتۇسۋ قۇقىعىنان ايىرىلاتىنىن بىلدىرەدى.
يماموعلۋ ءوز قاماۋعا الىنۋىن «مازاق ەتۋ» دەپ اتاپ، بيلىكتىڭ ونىڭ ساياسي مانسابىنا توسقاۋىل قويۋعا تىرىسقانىن ايتتى.
«مەن قورىقپايمىن، تىك تۇرىپ، كۇرەسىمدى جالعاستىرامىن»، – دەپ مالىمدەدى ول الەۋمەتتىك جەلى ارقىلى جاقتاستارىنا.
وسى وقيعاعا بايلانىستى ىستامبۇل بيلىگى قالادا كەز كەلگەن قوعامدىق جينالىستار مەن نارازىلىق شارالارىن وتكىزۋگە ءتورت كۇنگە ۋاقىتشا شەكتەۋ قويدى.
