تۇركيانىڭ بيلەۋشى ادىلەت جانە دامۋ پارتياسى ەلدىڭ قازىرگى پرەزيدەنتى رەجەپ تايىپ ەردوعاندى كەلەسى سايلاۋدا قايتادان كانديدات رەتىندە ۇسىنۋدى جوسپارلاۋدا، دەپ حابارلايدى “ادىرنا” ۇلتتىق پورتالى.
تۇركيانىڭ ادىلەت ءمينيسترى يىلماز تۋنچتىڭ ايتۋىنشا، پارلامەنت مەرزىمىنەن بۇرىن سايلاۋ وتكىزۋ تۋرالى شەشىم قابىلداسا، ەردوعان ءۇشىنشى مەرزىمگە قاتىسا الادى. مۇنداي شەشىم قابىلدانۋى ءۇشىن 360 دەپۋتاتتىڭ داۋىسى قاجەت. قازىرگى ۋاقىتتا وپپوزيتسيالىق حالىقتىق-رەسپۋبليكالىق پارتيادا (CHP) – 127 ماندات، ال بيلەۋشى كواليتسيا – ادىلەت جانە دامۋ پارتياسى مەن ۇلتتىق قوزعالىس پارتياسىندا – 315 ماندات بار.
كونستيتۋتسيانىڭ 101-بابى بويىنشا، پرەزيدەنت ەكى مەرزىمنەن ارتىق قىزمەت ەتە المايدى. دەگەنمەن، بيلەۋشى پارتيانىڭ پىكىرىنشە، كونستيتۋتسياعا وزگەرىس ەنگىزگەننەن، پارلامەنتتىڭ سايلاۋ وتكىزۋ تۋرالى شەشىم قابىلداۋى – ەردوعاننىڭ تاعى دا سايلاۋعا تۇسۋىنە جول اشاتىن ءتيىمدى ءادىس.
ايتا كەتەيىك، 2017 جىلى تۇركيا رەفەرەندۋم ارقىلى پرەزيدەنتتىك باسقارۋ فورماسىنا كوشتى. 2023 جىلدىڭ مامىرىندا ەردوعان بەس جىل مەرزىمگە ەكىنشى رەت قايتا سايلانعان ەدى.
ۇقساس جاڭالىقتار
