الماتىدا ءال-فارابي داڭعىلىندا ءۇش ادامنىڭ ءومىرىن قيعان جانتۇرشىگەرلىك جول اپاتىنا قاتىستى سوتتىڭ الدىن الا تىڭداۋى جالعاسىپ جاتىر، دەپ حابارلايدى "ادىرنا" ۇلتتىق پورتالى Tengrinews-كە سىلتەپ.
28 مامىر كۇنى ايىپتالۋشى سوتتا ەموتسيونالدى مالىمدەمە جاساپ، قازا تاپقانداردىڭ جاقىندارىنان كەشىرىم سۇرادى. ءىس الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سۋديا ەركىن مايشينوۆتىڭ توراعالىعىمەن قارالۋدا. سوت وتىرىسىندا ايىپتالۋشى ا.پ. العاش رەت ءۇن قاتىپ، مارقۇمداردىڭ وتباسىلارىنا كوڭىل ايتتى.
"ەشقانداي ءسوز، ەشقانداي ارەكەت سىزدەردىڭ جاقىندارىڭىزدى قايتارا المايتىنىن تۇسىنەمىن. ءار وتباسىعا قانشالىقتى قايعى اكەلگەنىمدى بىلەمىن. ءوز ارەكەتىمە اقتالمايمىن. زاڭ الدىندا تولىق جاۋاپ بەرۋگە دايىنمىن. تەك بوستاندىققا شىعىپ، قولىمنان كەلگەنشە سىزدەردىڭ وتباسىلارىڭىزعا كومەكتەسكىم كەلەدى. مۇنى وزىمە ەشقاشان كەشىرمەيمىن. كەشىرىم سۇرايمىن", — دەدى ول.
ايىپتالۋشى ءسوز سويلەپ تۇرعان كەزدە سوت زالىنداعى مارقۇمداردىڭ تۋىستارى كوز جاسىنا ەرىك بەردى.
جابىرلەنۋشى تاراپتىڭ وكىلى مەيىرمان شەكەەۆ وتباسى مورالدىق جانە ماتەريالدىق شىعىن ءوندىرۋ ءۇشىن ازاماتتىق تالاپ-ارىز بەرەتىنىن ايتتى.
ء"بىز 100 ميلليون تەڭگە كولەمىندە مورالدىق وتەماقى تالاپ ەتەمىز. سەبەبى ادام ءومىرىنىڭ قۇنى جوق. سونىمەن قاتار قازا تاپقان قىز اۆتوكولىك الۋ ءۇشىن نەسيە راسىمدەگەن، قازىر ونى اتا-اناسى تولەۋدى جالعاستىرىپ جاتىر", — دەدى ول.
ايتا كەتەيىك، 21 ناۋرىز كۇنى الماتىدا جول اپاتى بولىپ، ءۇش ادام قازا تاپقان.
