تۇركىستان وبلىسىندا جاس جىگىتتىڭ ولىمىنە بايلانىستى قىلمىستىق ءىس قوزعالىپ، كۇدىكتى رەتىندە 9-سىنىپ وقۋشىسى ۇستالدى. بۇل تۋرالى وبلىستىق پوليتسيا دەپارتامەنتى مالىمدەدى، دەپ حابارلايدى "ادىرنا".
الەۋمەتتىك جەلىلەردە تولەبي اۋدانىنىڭ لەنگىر قالاسىنداعى قاراۋسىز قالعان عيماراتتاردىڭ بىرىنەن 20 جاستان اسقان ەر ادامنىڭ ءمايىتى تابىلعانى تۋرالى اقپارات تاراعان. وقيعا 24 مامىر كۇنى بولعان.
الدىن الا مالىمەتتەرگە سايكەس، قازا تاپقان ازامات شىمكەنت قالاسىنىڭ تۇرعىنى بولعان. قىلمىسقا كۇدىكتى رەتىندە تولەبي اۋدانىنداعى شوقان ءۋاليحانوۆ اتىنداعى №16 مەكتەپتىڭ 9-سىنىپ تۇلەگى اتالعان.
وسىعان بايلانىستى تۇركىستان وبلىستىق پوليتسيا دەپارتامەنتى رەسمي تۇسىنىكتەمە بەردى.
"ادام ءولتىرۋ فاكتىسى بويىنشا سوتقا دەيىنگى تەرگەۋ امالدارى باستالدى. كۇدىكتى ۇستالدى جانە ۋاقىتشا ۇستاۋ يزولياتورىنا قامالدى.قازىرگى ۋاقىتتا بارلىق ءمان-جايلاردى انىقتاۋعا باعىتتالعان قاجەتتى ءىس-شارالار جۇرگىزىلۋدە.قر قىلمىستىق-پروتسەستىك كودەكسىنىڭ 201-بابىنا سايكەس وزگە دە اقپارات جاريالاۋعا جاتپايدى",– دەپ مالىمدەدى تۇركىستان وبلىسى پوليتسيا دەپارتامەنتىنىڭ ءباسپاسوز قىزمەتى.
ايتا كەتەيىك، قىلمىستىق ءىس بويىنشا تەرگەۋ جالعاسىپ جاتىر. قۇقىق قورعاۋ ورگاندارى وقيعانىڭ سەبەپتەرى مەن بارلىق ءمان-جايىن انىقتاۋدا. تەرگەۋ مۇددەسىنە بايلانىستى ازىرگە قوسىمشا اقپارات جاريالانعان جوق.
