گرۋزيانىڭ باس پروكۋراتۋراسى قازاقستاندىق اسەل ايتپاەۆانىڭ ولىمىنە ونىڭ جەرلەسى جانە الىس تۋىسى مۇرات مەيىربەكوۆتى كىنالى دەپ تانۋدا، دەپ حابارلايدى "ادىرنا" ۇلتتىق پورتالى Sputnik-Georgia مەن كتك تەلەارناسىنا سىلتەمە جاساپ.
تەرگەۋ امالدارىنىڭ ناتيجەسى بويىنشا، قايتىس بولاردان بىرنەشە كۇن بۇرىن اسەل ايتپاەۆانى مەيىربەكوۆ زورلاعان. تەرگەۋ مالىمەتتەرى بويىنشا، ەر ادام قىزدى ۇرىپ-سوعىپ، ەكى رەت زورلاۋ ارەكەتتەرىن جاساعان. ەندى قازاقستان ازاماتى التى جىلدان سەگىز جىلعا دەيىن باس بوستاندىعىنان ايىرىلۋى مۇمكىن.
اسەلدى گرۋزياعا جۇمىسقا شاقىرعان مەيىربەكوۆ ەدى، ال قايتىس بولاردان ءبىر كۇن بۇرىن ول كەنەتتەن قازاقستانعا ورالدى. قازىر ايتپاەۆالار وتباسى تبيليسيدە ەكستراديتسيالاۋعا ۇمتىلۋدا.
كۇدىكتى جۋرناليستەرگە جاۋاپ بەرۋدەن باس تارتتى. تىلشىلەر ونىڭ مەكەن-جايىن نۇر-سۇلتاننان تاپتى، الايدا كۇدىكتى ۇيىندە بولمادى.
37 جاستاعى مەيىربەكوۆتىڭ ەكى رەت ۇيلەنگەنى، ەكى بالاسى بار ەكەنى جانە ەندى ءۇشىنشى بالاسىن كۇتىپ جۇرگەنى بەلگىلى بولدى.
مۇراتتىڭ تۋىستارى ونىڭ كىنالى ەمەس ەكەنىنە سەنىمدى.
«ول پوليتسيا بولىمىنە ءوزى باردى. پوليتسيانىڭ كومەگىنە ءوزى جۇگىندى. اتالعان جاعداي ورىن العان كەزدە ول جولدا بولعان. استاناعا كەلە سالىسىمەن بىردەن پوليتسيا بولىمىنە جۇگىنىپ، دالەلدەر كەلتىردى. ول كادىمگى ادام وتباسىلى ادام. ەندى كەلىپ ودان، كەشىرىڭىز ارينە، "سەريالىق سۋتەنەر" كەيپىن شىعارىپ وتىر»، دەدى ايىپتالۋشىنىڭ قايىن ەنەسى تەلەفون ارقىلى.
ەستەرىڭىزگە سالا كەتەيىك، اسەل ايتپاەۆا 5 مامىردا تبيليسيدەگى ءۇيىنىڭ جانىنان ءولى كۇيىندە تابىلدى. قىز توعىزىنشى قاباتتان سەكىرىپ كەتكەن جانە ونىڭ ۇستىندە ءبىر فۋتبولكا عانا بولعان.
تەرگەۋشىلەر انىقتاعانداي، قازاقستاندىق ارۋ ءولىم الدىندا زورلانعان. جەرگىلىكتى پوليتسيا زۋگديديىڭ تۋماسى 57 جاستاعى كۇدىكتى بەسيك توردۋانى تۇتقىنداعان بولاتىن. ونىڭ بۇرىن زورلاۋ فاكتىسىنە قاتىستى سوتتالعانى دا انىقتالدى.
ءولىمىنىڭ الدىندا اسەل قۇربىسىنا توردۋامەن سويلەسكەن ءبىر ساعاتتىق اۋديوجازباسىن جىبەرىپ ۇلگەرگەن.
ءىس بويىنشا العاشقى سوت وتىرىسى 23 ماۋسىمدا وتەدى.
"ادىرنا" ۇلتتىق پورتالى
(فوتو: ktk.kz)
