قازاقستان ۇكىمەتى "قاجەت بولعان جاعدايدا" رەسەيگە جانار-جاعارماي جەتكىزۋ تۋرالى كەلىسىمنىڭ بولعانىن مويىندادى، دەپ حابارلايدى “ادىرنا” ۇلتتىق پورتالى.
بۇل اقپاراتتى مەرەكە قارساڭىندا پرەمەر-ءمينيستردىڭ ءباسپاسوز قىزمەتى مالىمدەدى.
«ۇكىمەت دەڭگەيىندە قاجەت بولعان جاعدايدا رەسەيلىك تاراپپەن جانار-جاعارماي جەتكىزۋ تۋرالى كەلىسىمدەر بار ەكەنى ايتىلدى»، - دەلىنگەن رەسمي حابارلامادا.
قازاقستان پرەمەرىنىڭ ءبىرىنشى ورىنباسارى رومان سكليار ىشكى نارىقتا جانار-جاعارماي تاپشىلىعىن بولدىرماۋ جانە ولاردى رەسپۋبليكادان زاڭسىز اكەتۋ ارەكەتتەرىنىڭ جولىن كەسۋ بويىنشا ناقتى تاپسىرمالار بەرگەنى اتاپ ءوتىلدى.
ەسكە سالا كەتەيىك، رەسەي مۇناي وڭدەۋ زاۋىتتارىنا جاسالعان شابۋىل سالدارىنان تاپشىلىق تۋىنداعان جاعدايدا قازاقستاننان 100 مىڭ توننا بەنزين جەتكىزۋگە دايىن تۇرۋىن سۇراعان ەدى. الايدا Reuters-ءتىڭ 8 ساۋىرىندەگى اقپاراتىن قازاقستان رەسپۋبليكاسىنىڭ ەنەرگەتيكا ءمينيسترىنىڭ كەڭەسشىسى شىڭعىس ءىلياسوۆ جوققا شىعارعان. ول ەنەرگەتيكا مينيسترلىگىنە رەسەيلىك ارىپتەسىنەن مۇنداي سۇرانىس تۇسپەگەنىن ايتقان ەدى.
رەسەي ادەتتە جانارمايدىڭ نەتتو – ەكسپورتەرى (ياعني، ەكسپورت كولەمى يمپورتىنان ارتىق) جانە حالىقارالىق نارىقتارعا جەتكىزۋشى بولىپ تابىلادى. بىراق مۇناي وڭدەۋ زاۋىتتارىنىڭ ۋكراينا دروندارىنىڭ شابۋىلىنا ۇشىراۋى رەسەي مۇناي كومپانيالارىن يمپورت جاساۋعا ءماجبۇر ەتكەن سياقتى.
Reuters دەرەككوزىنىڭ ايتۋىنشا، ماسكەۋ قازاقستاننان رەسەيگە جەتكىزۋگە ءازىر تۇراتىن 100 مىڭ توننا بەنزيننىڭ توتەنشە رەزەرۆىن قۇرۋدى سۇراعان.
سونداي-اق، ماسكەۋ 1 ناۋرىزدان باستاپ جانارماي تاپشىلىعىنىڭ الدىن الۋ ءۇشىن التى ايعا بەنزين ەكسپورتىنا تىيىم سالعان. دەگەنمەن بۇل ماسكەۋ باسقاراتىن ەۋرازيالىق ەكونوميكالىق وداققا، ونىڭ ىشىندە قازاقستانعا، سونداي-اق موڭعوليا سياقتى كەيبىر ەلدەرگە قاتىسى جوق.
ال ترەيدەرلەر رەسەيدەگى جاعداي ۋشىعىپ كەتسە، تىيىمدى كەڭەيتۋ مۇمكىن ەكەنىن ايتادى.
