الماتىدا 22 جاستاعى جۇكتى ايەل تۇرعىن ءۇي كەشەنىنىڭ 8-قاباتىنان سەكىرىپ كەتتى. ول اۋىر جاراقاتتارمەن اۋرۋحاناعا جەتكىزىلگەن. الايدا دارىگەرلەر ونى امان الىپ قالا المادى.بۇل تۋرالى Astana TV حابارلادى، دەپ جازادى "ادىرنا" ۇلتتىق پورتالى.
كۋاگەرلەر «جاس ايەلدىڭ مۇنداي قادامعا بارۋىنا وتباسىلىق جانجال سەبەپ بولۋى مۇمكىن» دەيدى. جانتۇرشىگەرلىك وقيعا ءتۇن ورتاسىندا كوپقاباتتى تۇرعىن ۇيلەردىڭ بىرىندە بولعان. ايەلدىڭ قۇلاپ تۇسكەن جەرىندە ءالى قاننىڭ ءىزى بايقالادى. جۇبايىنىڭ ايقايلاپ جىلاعان داۋىسىنان ويانىپ كەتكەن كورشىلەر دەرەۋ جەدەل جاردەم شاقىرىپ ۇلگەرگەن. بۇل جاعداي تۇرعىنداردىڭ زارەسىن ۇشىردى. كۋاگەرلەر ايەلدىڭ قان-جوسا بوپ جەردە جاتقانىن ايتادى. «ۇيىندە ۇرىس-كەرىس بولعان ءتارىزدى»،- دەيدى.
"مەن ۇيدە وتىرعانمىن. بىرەۋدىڭ گۇرس ەتىپ قۇلاعانىن ەستىدىم. ايقاي-شۋ كوتەرىلىپ كەتتى. كۇيەۋى بىردەن جۇگىرىپ كەلدى. مەن دە شىعىپ، جەدەل جاردەم شاقىردىم. ايەلدىڭ قول-اياعى سىندى. كۇيەۋى كەشە ءوزىن تىم ەموتسيونالدى ۇستاعان ەدى. ماعان ول ماس بولىپ كورىندى", - دەيدى كۋاگەر ميراس جاقىپوۆ.
تۇرعىندار جەدەل جاردەمدى ۇزاق كۇتىپ قالعاندارىن ايتادى. "اۋلا تار، سوندىقتان جەدەل جاردەم نەمەسە ءورت ءسوندىرۋ كولىگى كىرۋى قيىن" دەيدى.
"جەدەل جاردەمدى 40 مينۋت كۇتتىك. ولار جەتكەن سوڭ، اۋلامىزعا ءبىراز ۋاقىت كىرە الماي، اينالىپ ءجۇردى. سەبەبى، تۇرعىنداردىڭ كولىكتەرى اۋلاعا كىرەر جولدى جاۋىپ تاستاعان ەكەن. ورىن جوق. ايتەۋىر، دارىگەرلەر ايەلدى زەمبىلگە سالىپ، الىپ كەتتى. ول كەزدە ايەل ءتىرى ەدى", - جۇماعالي ءالىمجانوۆ.
ناۋقاس كلينيكالىق ءولىم دياگنوزىمەن 7 قالالىق كلينيكالىق اۋرۋحاناعا جەتكىزىلگەن. جۇكتىلىكتىڭ 9-10 اپتاسىندا بولعانى انىقتالدى. دارىگەرلەر رەانيماتسيالىق ءىس-شارالاردى جۇرگىزگەنىمەن، زارداپ شەگۋشى ەسىن جيماستان دۇنيەدەن ءوتتى. پوليتسيا وقيعانىڭ ءمان-جايىن انىقتاپ جاتىر. «ءوزiن-ءوزi ولتiرۋگە دەيiن جەتكiزۋ» بابى بويىنشا قىلمىستىق ءىس قوزعالدى".
"الماتى قالالىق پوليتسيا دەپارتامەنتى اتالعان دەرەكتىڭ ناۋرىزباي اۋداندىق پوليتسيا باسقارماسىمەن قر قك-ءنىڭ 105-بابى بويىنشا سوتقا دەيىنگى تەرگەۋدىڭ بىرىڭعاي تىزىلىمىنە تىركەلگەنىن حابارلايدى. سوت-مەديتسينالىق ساراپتاما تاعايىندالدى", - دەيدى الماتى قالاسى پد رەسمي وكىلى سالتانات ازىربەك.
ايەلدىڭ وزىنە قول سالۋىنا سەبەپكەر بولعان كىنالىلەر انىقتالسا، زاڭ بويىنشا ءۇش جىلعا دەيىن باس بوستاندىعىنان ايىرىلادى.
"ادىرنا" ۇلتتىق پورتالى
