قازاقستان مۇسىلماندارى ورازا ايت - قاسيەتتى رامازان ايىنىڭ اياقتالۋىنا ارنالعان مەيرامدى اتاپ وتۋدە، دەپ حابارلايدى "ادىرنا" ۇلتتىق پورتالى.
ايت - مۇسىلمانداردىڭ ۇلى مەيرامى. يسلام دىنىندە ەكى ايت مەيرامى بار. ول ورازا ايت، قۇربان ايت دەپ اتالادى. ورازا ايت وتىز كۇن ورازا بىتكەننەن كەيىن ءشاۋال ايىنىڭ 1-3 كۇندەرى وتەدى. ورازا اياقتالعان سوڭ مۇسىلمان قاۋىمى تاڭەرتەڭ مەشىتتە ايت نامازىن وقۋى پارىز. ورازا ايىن رامازان ايى دەپ تە ايتادى. پىتىر ساداقاسى دا وسى ايدا بەرىلەدى. ونى ءار مۇسىلمان مەشىتكە اپارىپ بەرەدى. مۇحاممەد (س.ع.س.) پايعامبار اللا تاعالانىڭ ءسوزىن وسى رامازان ايىندا ەستىگەن. قۇربان ايت ورازا ايتتان 70 كۇننەن كەيىن باستالىپ، ءۇش كۇنگە سوزىلادى.
بيىل ورازا ايت مەيرامى 13 مامىرعا سايكەس كەلىپ وتىر.
سىزگە جانە ءسىزدىڭ جاقىندارىڭىزعا باقىت پەن بەرەكە، زور دەنساۋلىق جانە جۇمىستارىڭىزعا ساتتىلىك تىلەيمىن. ورازا ايت - ادامزاتتى جاقسىلىققا، دوستىق پەن باۋىرمالدىققا، باقىت پەن مەيىرىمدىلىككە باۋلي وتىرىپ، قۋانىش پەن جاقسىلىق سىيلايتىن مەرەكە. مەيرام كۇنى بۇكىل الەم مۇسىلماندارى قۇتتىقتاۋلارىن تاراتۋدا، تۋىستارىمەن بىرگە مەيرامدى اتاپ وتۋدە. ولار سونداي-اق كومەككە مۇقتاجدارعا جاردەمدەسىپ باقىتقا بولەنۋدە. ايت - بۇل وتباسىلىق مەيرام. بۇل كۇنى ءبىز اتا-انامىزعا، بالالارىمىزعا، باۋىرلارىمىزعا قۋانىش سىيلايمىز، قارتتارعا، جەتىمدەر مەن مۇگەدەكتەرگە كومەكتەسەمىز، دەپ قمدب-نىڭ باستىعى، باس ءمۇفتي ناۋرىزباي قاجى تاعانۇلى قازاقستان حالقىنا ءوز ءسوزىن جولدادى.
ءپىتىر-ساداقا بيىل 420 تەڭگە مولشەرىن قۇرادى.
قمدب ورازا ايت نامازى ەلدە مەشىتتەردىڭ اۋلاسىندا (جەرگىلىكتى باس سانيتارلىق دارىگەرلەردىڭ رۇقساتىمەن) وقىلاتىنىن ايتتى.
ەڭ باستىسى، كەلەسى ساقتىق شارالارىنا باسا نازار اۋدارىلۋى ءتيىس: بەتپەردە كيۋ نەمەسە نامازدان كەيىن قول الىسۋدان اۋلاق بولۋ، مەشىت اۋماعىنان ناماز اياقتالعاننان كەيىن بىردەن شىعۋ نەمەسە وزگە قۇلشىلىقتاردى جاساۋدا شەكتەن تىس ادامداردىڭ شوعىرلانباۋىن قاداعالانۋى كەرەك، دەلىنگەن حابارلامادا.
"ادىرنا" ۇلتتىق پورتالى
