جاقسىلاردى كورىپ ءجۇرمىز عوي... جان-جاقتان جيىلعان باقسىلاردى كورمەك ءۇشىن "قازاق باقسىلارىنىڭ تۇڭعىش قۇرىلتايىنا" ارنايى باردىم. ونداعى ماقساتىم – وسى تاڭىرشىلدەر دەگەن كىمدەر، ولار نە ىستەپ جاتىر، رۋحاني دەڭگەيى نەشىك، قازاق دۇنيەتانىمىنا، ونىڭ مادەنيەتىنە، سالت-داستۇرىنە دەگەن كوزقاراستارى قانداي، دىنشىلدەر داۋرىعىپ جۇرگەندەي ولار شىنىندا دا اداسقاندار ما، ولاردى كىم قارجىلاندىرىپ وتىر ت.ب. ساۋالدارعا جاۋاپ ىزدەپ بارعان ەدىم.
باقسىلار قۇرىلتايى الماتى قوناق ۇيىندە تاڭەرتەڭگى ساعات 10:30-دا باستالىپ، كەشكى ساعات 19:00-دە مارەسىنە جەتتى. نەسىن ايتاسىز، توعىز ساعات بويى تاپجىلماي وتىرىپ، اياعىنا دەيىن تاماشالاپ قايتتىق.
قازاق باقسىلارىنىڭ بۇل تۇڭعىش قۇرىلتايى حالىقارالىق عىلىمي كونفەرەنتسيا دەڭگەيىندە وتكەن باس قوسۋ بولدى.
سەبەبى مۇندا بايانداما جاساعان شەشەندەردىڭ دەنى زەرتتەۋشى عالىمدار بولۋىمەن ەرەكشەلەندى.
بۇعان كوز جەتكىزۋ ءۇشىن بايانداماشىلاردىڭ اتى-ءجونى مەن كوتەرگەن تاقىرىپتارىن جازا كەتپەكپىن. ولار:
ارمان نۇرمۇحانبەتوۆ، قۇرىلتايدىڭ ۇيىمداستىرۋشىسى (قازاقستان)
"قاسيەت – ۇلى دالا وركەنيەتىنىڭ قاينار كوزى"
بەرىك اتاش، فيلوسوف، (قازاقستان)
"قازاق باقسىلىق عۇرىپتارى"
مەرۋەرت قۇرمانعاليەۆا، مۋزىكاتانۋشى (قازاقستان)
"ساز ونەرىندەگى قازاقى قاسيەت"
اقنار شارىپباەۆا، مۋزىكاتانۋشى (قازاقستان)
"قازاق باقسىلىعىنداعى قوبىزدىڭ ورنى"
پاكيزات تالاسباەۆا، زەرتتەۋشى (قازاقستان)
"قاسيەت فەنومەنىنىڭ عىلىمي دالەلدەرى"
سەرگەي سەرەن، باقسى (بۋرياتيا)
"بۋرياتتاردىڭ باقسىلىق ءداستۇرى"
ەركين الەكسەەۆ، العىسچىت، حومۋسچىت، مادەنيەتتانۋشى، (ساحا)
"ساحا باقسىلىعىنىڭ ءداستۇرى"
سانديل دجادحاۆ، يوگا ينستيتۋتىنىڭ ديرەكتورى، (ينديا)
"مەرۋ. ۆەددا جانە تاڭىرشىلىك مادەنيەتتەرىنىڭ قارىم-قاتىناسى"
ەدريان كۋمانس، امەريكاداعى لەناپە تۇرعىلىقتى حالقىنىڭ (ۇندىستەردىڭ) باقسىسى (اقش)
"جەرگىلىكتى امەريكا حالقىنىڭ (ۇندىستەردىڭ) باقسىلىق ءداستۇرى"
نۇراسىل قۇسايىن، قۇرىلتاي دەمەۋشىسى (قازاقستان)
"كيەنىڭ قيىندىقتاردى شەشۋدەگى كومەگى"
بۇل باياندامالاردا "ەگەر دە دەيدى، كىم دە كىم دەيدى..." دەپ باستالاتىن جۇرت قۇلاعىن جاۋىر قىلعان ۋلى ۋاعىزدار ايتىلعان جوق. ەش بايانداماشى ء"تاڭىرشى بولىڭدار!" دەپ ۇران كوتەرگەن جوق. تەك ۇلتتىق دۇنيەتانىم مەن مادەنيەتتانۋ تۇرعىسىندا ءتۇرلى عىلىمي كوزقاراستار ءبىلدىرىلىپ، وي-تۇجىرىمدار ايتىلىپ، جەكە پىكىرلەر ورتاعا تاستالىندى.
ءبىر سوزبەن ايتقاندا، ءبىزدىڭ باقسى دەپ جۇرگەنىمىز ۇلتتىق سانا يەلەرى – عالىمدار مەن ۇلتتىق كود يەلەرى – ونەرپازدار (قوبىزشى، كۇيشى، ءانشى) ەكەن جانە ولاردىڭ مەملەكەتشىلدىگى، ۇلت سۇيگىشتىگى (پاتريوتيزم) داستۇرشىلدىگى اسا كۇشتى كەلەدى ەكەن. بۇل مەنى قۋانتتى.
قىسقاشا ايتقاندا وسى.
ايتپاقشى، قازاق باقسىلارى وفلاين، شەتەلدىكتەر ونلاين رەجيمىندە بايانداما جاسادى جانە بۇل قاي ارنا ەكەنىن بىلمەيمىن، ءبىر يۋتۋب ارنادا تىكەلەي ەفير ارقىلى ترانسلياتسيالانىپ تۇردى. ساقتالعان شىعار، قىزىعۋشىلار بولسا، تاۋىپ الىپ تاماشالاۋلارىڭىزعا بولادى.
Erlan Toleutai
