ءورت ءسوندىرۋشى-قۇتقارۋشى – الەمدەگى ەڭ قاۋىپتى ماماندىقتاردىڭ ءبىرى، ءارى ناعىز ەر ازاماتتارعا ءتان. بۇل ماماندىق – جۇرەكتىلىك پەن باتىلدىقتى تالاپ ەتەدى. ءاردايىم ادامداردى جانە ولاردىڭ ماتەريالدىق قۇندىلىقتارىن امان الىپ قالۋ ءۇشىن ايانباي ەڭبەك ەتىپ جۇرگەن باتىل جاندار قانداي قۇرمەتكە دە لايىق. وسى سالادا جاس بولسا دا ءوزىن جاقسى قىرىنان كورسەتە بىلگەن، بەلسەندى، ەڭ باستىسى انتىنا ادال جاس مامانداردىڭ ءبىرى – بەكسۇلتان يبادۋللا.
بەكسۇلتان مياتۇلى – ادامداردىڭ ءومىرى مەن ولاردىڭ ماتەريالدىق قۇندىلىقتارىن ءتىلسىز جاۋدان اراشا ەتۋدى بالا كەزىنەن ارمان ەتكەن ازاماتتىق قورعاۋ اعا لەيتەنانتى.
ينستيتۋت قابىرعاسىندا ول ءوزىنىڭ بەلسەندىلىگىن تانىتىپ، ءتۇرلى بايقاۋلارعا قاتىسىپ، ينستيتۋتتىڭ نامىسىن قورعادى. ءوزىنىڭ ماماندىعىنا دەگەن زور ىقالاسىنىڭ ارقاسىندا اتالعان وقۋ ورنىن ءتامامداپ، العاشقى شەنىن الدى.
بەكسۇلتان مياتۇلى 2019 جىلى ارىس قالاسىندا ورىن العان توتەنشە جاعداي كەزىندە باسقا دا ءورت ءسوندىرشى-قۇتقارۋشىلارمەن بىرگە كومەككە اتتاندى. وقيعا ورنىندا ەڭ باستى مىندەتى – ادامداردىڭ ءومىرىن قۇتقارۋ ءۇشىن قاۋىپسىز ايماققا كوشىرۋ جۇمىستارىن بەلسەندى جۇرگىزدى. اناعا دا، بالاعا دا، قارت پەن جاسقا دا ءوز كومەگىن اياماي، باسقا دا ءورت سوندىرۋشىلەرمەن بىرگە قىزمەت ەتتى. ءوزىنىڭ انتىنا ادال، قىزمەتتىك مىندەتىن بۇلجىتپاي ورىندايتىندىعىن وسىلايشا دالەلدەي ءبىلدى. وسى ءۇشىن دە بەكسۇلتان مياتۇلى قر پرەزيدەنتىنىڭ جارلىعىمەن «ەرلىگى ءۇشىن» مەملەكەتتىك مەدالىمەن ماراپاتتالدى.
شىمكەنت قالاسى اكىمدىگىنىڭ ءباسپاسوز قىزمەتى
