شىمكەنت قالاسىنداعى دوستىق ۇيىندە قازاقستان حالقى اسسامبلەياسى توراعاسىنىڭ ورىنباسارى، قازاقستان رەسپۋبليكاسى پرەزيدەنتى اكىمشىلىگىنىڭ قحا حاتشىلىعىنىڭ مەڭگەرۋشىسى مارات ءازىلحانوۆ قالالىق قحا جانىنداعى ەتنومادەني بىرلەستىكتەردىڭ توراعالارىمەن جانە قوعامدىق قۇرىلىمداردىڭ جەتەكشىلەرىمەن كەزدەستى.
شىمكەنت قالاسى اكىمىنىڭ ورىنباسارى سارسەن قۇرانبەك اشىپ جۇرگىزگەن جيىندا قازاقستان حالقى اسسامبلەياسىنىڭ حححIV سەسسياسى مەن مەملەكەت باسشىسىنىڭ قازاقستان حالقىنا ارناعان جولداۋىندا مەجەلەنگەن مىندەتتەر ايتىلىپ، ساياسي قۇجاتتا جۇكتەگەن تاپسىرمالاردى ىسكە اسىرۋدا اسسامبلەيا بەلسەندىلەرىنىڭ الەۋەتىن ۇتىمدى جۇمىلدىرۋ جايى ءسوز بولدى.
ەلىمىزدىڭ تۇراقتى دامۋى ءۇشىن ىشكى بىرلىكتى بەكەمدەۋ، ەتنوسارالىق تاتۋلىق پەن قوعامدىق كەلىسىمدى ساقتاۋ ءاربىر ازاماتتىڭ مەرەيلى مىندەتى ەكەنى قالالىق قحا مۇشەلەرىنىڭ نازارىنا جەتكىزىلدى.
ەمىن-ەركىن وتكەن جيىندا مارات الماسۇلى قالالىق ەتنومادەني بىرلەستىك توراعالارىن اشىق پىكىر الماسۋعا شاقىردى. ءوتىنىش، بۇيىمتاي، سىن بولسا، قۇلاق اسىپ تىڭداۋعا دايىن ەكەنىن جەتكىزدى.
– وسىعان دەيىن وتكەن ءتۇرلى جيىندار مەن كەزدەسۋلەردە، باسقوسۋلاردا ۇنەمى مەن سويلەپ كەلەمىن. بۇگىن شىمكەنتكە ات باسىن بۇرىپ، سىزدەردى تىڭداپ، پىكىر الماسۋ ءۇشىن كەلىپ وتىرمىن. قازاقستان حالقى اسسامبلەياسىنىڭ قىزمەتىنە، ىسكە اسىرىپ جاتقان جوبالارىنا قاتىستى ويلارىڭىز، ۇسىنىستارىڭىز بولسا، ايتىڭىزدار، – دەدى مارات الماسۇلى.
جيىندا قالالىق م.اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتى «تاريح جانە ەتنولوگيا» عىلىمي ورتالىعىنىڭ باسشىسى، «قازاقتانۋ» جۋرنالىنىڭ جاۋاپتى رەداكتورى شولپان تورعاۋتوۆا، ءو.جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىنىڭ دەپارتامەنت ديرەكتورى، قالالىق قحا جانىنداعى عىلىمي-ساراپشىلىق توپتىڭ جەتەكشىسى قايرات انارباەۆ، قالالىق قحا جانىنداعى ەتنومەدياتسيا كەڭەسىنىڭ ءتورايىمى دانا كەنجەقۇلوۆا، قالالىق تۇرىك ەتنومادەني بىرلەستىگىنىڭ توراعاسى لاتيپشا اسانوۆ، قالالىق قحا توراعاسىنىڭ ورىنباسارى، قالالىق كورەي ەتنومادەني بىرلەستىگىنىڭ توراعاسى يۋري پان، قالالىق قحا توراعاسىنىڭ ورىنباسارى، قالالىق وزبەك ەتنومادەني بىرلەستىگىنىڭ توراعاسى تاحيربەك نيشانباەۆ، قالالىق قحا جانىنداعى اقساقالدار كەڭەسى توراعاسىنىڭ ورىنباسارى باتىربەك جالمۇرزاەۆ ءسوز سويلەپ، قحا ينستيتۋتىنىڭ قىزمەتى، اتقارىلعان جۇمىستارى مەن جوبالارى تۋرالى پىكىرلەرىن ايتتى.
كەزدەسۋ سوڭىندا قالالىق «ۆايناح» شەشەن-ينگۋش مادەني ورتالىعىنىڭ» توراعاسى رامازان ماتاەۆ پەن قالالىق وزبەك ەتنومادەني بىرلەستىگىنىڭ مۇشەسى شۋحرات رۋزمەتوۆكە قازاقستان حالقى اسسامبلەياسىنىڭ «العىس» مەدالى، جۇمابەك تاشەنەۆ ۋنيۆەرسيتەتىنىڭ رەكتورى قانات بايبولوۆ پەن شىمكەنت قالاسى قحا جانىنداعى انالار كەڭەسىنىڭ ءتورايىمى گۇلجان سۇگىرباەۆاعا جانە قالالىق ءازىربايجان ەتنومادەني ورتالىعىنىڭ مۇشەسى اديل اليەۆكە قازاقستان حالقى اسسامبلەياسىنىڭ العىس حاتى تابىستالدى.
اشىق جۇزدەسۋدى قورىتىندىلاعان قحا توراعاسىنىڭ ورىنباسارى پىكىرلەردىڭ نازارعا الىناتىنىن ايتتى.
– قازاقستان حالقى اسسامبلەياسى مەن ونىڭ جانىنداعى قوعامدىق قۇرىلىمدارعا ارتىلعان اۋقىمدى مىندەتتىڭ تۇپكى ماقساتى – ەلدىڭ ەرتەڭى ءۇشىن ادال، ءبىلىمدى ءارى وتانشىل ۇرپاق تاربيەلەۋ، – دەدى مارات ءازىلحانوۆ.
جيىن سوڭىندا قحا توراعاسىنىڭ ورىنباسارى كەزدەسۋگە كەلگەن ەتنوس وكىلدەرىنە العىس ايتىپ، دوستىق ۇيىندەگى قالالىق ەتنومادەني بىرلەستىكتەردىڭ جۇمىس كابينەتتەرىن ارالاپ كوردى.
