بۇگىن قازاقستان حالقى اسسامبلەياسىنىڭ 30 جىلدىعى اياسىندا شىمكەنت قالاسىنداعى ورتالىق ساياباقتا قازاقستان رەسپۋبليكاسى وزبەكتەرى ەتنومادەني بىرلەستىكتەرى «دўستليك» قاۋىمداستىعىنىڭ ۇيىمداستىرۋىمەن «وزبەك ەتنوسىنىڭ ءتىلى، مادەنيەتى جانە سالت-ءداستۇرى كۇنى» كەڭىنەن اتالىپ ءوتتى.
مەرەكەلىك شارانىڭ شىمىلدىعى شىمكەنت قالالىق وزبەك دراما تەاترى ارتىستەرىنىڭ اباي مەن الىشەر ناۋاي بەينەلەرىن سومداعان ەرەكشە ساحنالىق كورىنىسىمەن اشىلىپ، قوناقتار ۇلتتىق قۇندىلىقتاردى ايشىقتاعان كورمەلەردى تاماشالادى.
ءىس-شاراعا قر پارلامەنتى سەناتىنىڭ دەپۋتاتى اليشەر ساتۆالديەۆ، قر پرەزيدەنتى اكىمشىلىگى قازاقستان حالقى اسسامبلەياسى حاتشىلىعىنىڭ سەكتور مەڭگەرۋشىسى قايرات بايمولدينوۆ، وزبەكستان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى باحتيور يبراگيموۆ، «دўستليك» قاۋىمداستىعىنىڭ توراعاسى يكرامجان حاشيمجانوۆ، شىمكەنت قالاسى ىشكى ساياسات جانە جاستار ىستەرى جونىندەگى باسقارما باسشىسىنىڭ م.ا. زاڭعاربەك ۋسۋپاحمەتوۆ، شىمكەنت قالاسىنىڭ «قوعامدىق كەلىسىم» كمم باسشىسى نۇركەن الىمقۇلوۆ، شىمكەنت قالالىق وزبەك ەتنومادەني بىرلەستىگىنىڭ توراعاسى تاحيربەك نيشانباەۆ جانە قوعام بەلسەندىلەرى قاتىستى.
كونتسەرتتىك باعدارلاما مەملەكەتتىك انۇرانمەن باستالىپ، تەاتر ارتىستەرىنىڭ «قوش كەلدىڭىز» كومپوزيتسياسىمەن جالعاستى. مۋكيمي اتىنداعى №13 مەكتەپتىڭ «باحور» بي ءانسامبلى وزبەك حالقىنىڭ ۇلتتىق «شودليك» ءبيىن جانە قازاق ءبيىن تارتۋ ەتتى. شىمكەنت قالالىق دراما تەاترى «سارى جايلاۋ» كومپوزيتسياسىن ساحنالاپ، كورەرمەننىڭ ىستىق ىقىلاسىنا بولەنسە، قالالىق وپەرا جانە بالەت تەاترىنىڭ ءانشىسى نەماتيللا زيكريللاەۆ تولەگەن مۇحامەدجانوۆتىڭ «وتان» جانە ا.زاتسەپيننىڭ «تىڭدا» اندەرىن ورىنداپ، مەرەكەنىڭ ءسانىن كەلتىردى. سونداي-اق تەاتر ءارتىسى شاحيستا ۋسمانوۆا وزبەك حالقىنىڭ اسەم اۋەنى – «مۋستاحزود» ءانىن شىرقادى.
مەرەكەلىك جيىن بارىسىندا بىرقاتار ازاماتتار ەتنومادەني بايلانىستاردى نىعايتۋعا قوسقان ۇلەسى ءۇشىن ماراپاتتالدى.
