Táýelsizdik - barsha qazaq halqynyń baǵa jetpes baılyǵy, asyl qazynasy. Ata-babalarymyz armandap ótken táýelsizdikke bıyl 30 jyl tolǵaly otyr. Ataýly mereke - barsha qazaqstandyqtardyń ortaq qýanyshy. Eńseli elimizdegi Táýelsizdik mereıtoıyna oraı respýblıka kóleminde túrli mádenı is-sharalar jyl basynan beri uıymdastyrylýda.
Sondaı ıgi sharalardyń biri ótken aptada aýdandyq Mádenıet úıinde ótti. «Táýelsizdik belesteri» taqyrybynda uıymdastyrylǵan sharada aýdanǵa tanymal dástúrli ánshi, "Saz" mektebiniń dırektory Dáýitbaeva Baqyt Meırambekqyzy qonaq bolyp, syr-suhbat barysynda táýelsizdik jaıly áńgime órbitti. Atalmysh suhbatty júrgizgen aýdandyq tarıhı-ólketaný mýzeıiniń ólketanýshysy, aýdannyń Qurmetti azamaty Záýresh Demeýqulova. Ol kisi syr-suhbatty bastamas buryn memleketimizdiń táýelsizdik alǵan jyldardan beri jetken tolaǵaı jetistikterine erekshe toqtalyp, osy jyldar ishinde elimizde ulttyq salt-dástúrimizdiń, mádenıetimizdiń jańǵyryp, qaıta qalyptasqanyn tilge tıek etti.
Shara qonaǵy Baqyt Meırambekqyzy táýelsizdiktiń 30 jylynda óner salasynyń qarqyndy damyǵanyn, sonymen qosa dástúrli án-kúı ónerine aýdan jastarynyń kózqarasynyń artqanyn, búgingi kúnge deıin Baqanas Saz mektebinen sandaǵan túlektiń qanat qaqqanyn da aıtyp ótti. Sondaı-aq, týǵan jer men týǵan elge arnalyp jazylǵan ánderdiń táýelsizdiktiń jemisi jáne tartýy ekendigin de aıtty. Baqyt Dáýitbaeva dombyrasyn qolyna alyp, birneshe dástúrli ánderdi de áýelete oryndady. Aıta ketetin jaıt, syr-suhbat barysynda karantın talaptary tolyǵymen saqtalyp, suhbat onlaın rejımde halyqpen tikeleı efırde ótti.
Baqtyǵalı Dáýitbaev
Balqash aýdany
