«قازاقستان رەسپۋبليكاسىنىڭ مەملەكەتتىك رامىزدەر تۋرالى» كونستيتۋتسيالىق زاڭى 2007 جىلى 4 ماۋسىمدا قابىلداندى. مەملەكەتتىك تۋ، مەملەكەتتىك ەلتاڭبا، مەملەكەتتىك ءانۇران قازاقستان رەسپۋبليكاسىنىڭ رامىزدەرى بولىپ تابىلادى. وسى ەلدىڭ ءاربىر ازاماتى رامىزدەردى قۇرمەتتەۋگە مىندەتتى.
رامىزدەر - ۇلتتىق بولمىسىمىزدى ايقىنداۋشى سيمۆول. ەلىمىزدىڭ ەگەمەندىگىنەن حابار بەرىپ، وزگە ەلمەن يىق تەڭەستىرەتىن دامۋشى ەل ەكەندىگىمىزگە دالەل بولاتىن بىردەن ءبىر ايشىقتى بەلگى. تاۋەلسىزدىك تاڭى اتقان بويدا رامىزدەردى قابىلداۋ باعى بۇيىرىپتى. ءتۇرلى سالادا قازاق اتىن الەمگە تانىتار ازاماتتارىمىز بايگەدەن وزا شاپقاندا، بايراعىمىزدى جەلبىرەتىپ، ءانۇراندى اۋەلەتە شىرقاتقاندا، قازاقتىڭ پاتريوتتىق سەزىمى تۇلپارشا دۇبىرلەگەنى دە ءوز الدىنا ءبىر باقىت! ەلدىگىمىزدىڭ بەدەلى بيىك بولۋ ءۇشىن دە رامىزدەردىڭ تۇعىرى بەرىك بولۋى ماڭىزدى. قازاقى مارتەتبەمىزدىڭ قايماعى بولعان ۇلتتىق نىشاندارىمىزدىڭ سيپاتىنا شولۋ جاسايىق.
كوك ءتاڭىردىڭ سىيى- كوك تۋ. مەملەكەتتىك تۋ اشىق كوگىلدىر ءتۇستى. قازاق ۇعىمىندا كوك ءتۇس اشىق اسپان، بەيبىت كۇننىڭ بەلگىسى. تەرەڭىنە كوز جۇگىرتسەك، سوناۋ تۇركى زامانىندا قازاق پەن الاش تاريحىندا كوك ءتۇس اسپان مەن جەردەن، تاڭىردەن حابار بەرگەن. تۇركى جۇرتشىلىعى ءۇشىن بۇل ءتۇس قاجىماس قايراتتى، مىقتى رۋحتى، ابىروي مەن جەڭىمپازدىقتى، ۇستەمدىلىكتى بىلدىرگەن.
«كوك تاڭىردەن كوڭىلگە نۇر تىلەرمىز،
كوك اسپانداي ءالى دە كۇركىرەرمىز.
كوك ءبورىلى كوك بايراق كوككە شىقسا،
قاي دۇشپاننىڭ الدىندا ىركىلەرمىز؟»- دەگەندەي، تاريحتا كوك ءتۇس - جۇرەككە رۋح پەن سەنىم بەرگەن قاسيەتتى ۇعىم. قازىرگى تۋدىڭ كوك ءتۇستى بولۋى تاريح قويناۋىنان سىر شەرتكەندەي. وسى ءبىر نىشاننىڭ اۆتورى- شاكەن نيازبەكوۆ. تۋدىڭ ءدال ورتاسىندا 32 ءدان اينالعان شۋاقتى كۇن، استىندا قالىقتاپ ۇشقان قىران ورنالاسقان. التىن كۇن - دامۋ مەن ءوسىپ وركەندەۋدى، ال ساۋلەسى- مولشىلىق پەن بەرەكەنى بىلدىرەدى. قاناتتى قىران- بيلىك پەن ايبىندىلىق بەينەسى، ودان بولەك ەركىندىك سۇيگىش قۇس رەتىندە ەگەمەندىكتى، حالىقتىڭ جان-دۇنيەسىنىڭ كەڭدىگىن پاش ەتەدى. سابىنىڭ تۇسىندا ۇلتتىق ويۋ-ورنەگىمىز ناقىشتالعان، تىك بۇرىشتى كەزدەمە تالاي ءدۇبىرلى دودالاردا بيىكتە جەلبىرەي بەرسىن!
ەلدىكتىڭ نىشانى - ەلتاڭبا. ەڭ تۇپ نەگىزگى بەلگىدەن باستار بولساق، ەلتاڭبانىڭ جۇرەگى - شاڭىراق. شاڭىراق بىرلىكتى بەتكە ۇستاعان بەرەكەلى وتباسىنىڭ بەينەسى. جان-جاعىنان ۋىقتار شاشىراعان دوڭگەلەك نىسان حالقىمىز ءبىر شاڭىراق استىندا تاتۋ عۇمىر كەشسىن دەگەن تىلەكپەن سالىنسا كەرەك. كوشپەلى تۇركى جۇرتىندا كيىز ءۇيدىڭ كۇمبەزى بىرتۇتاستىلىقتى، جىلى وشاقتى سۋرەتتەيدى. ونىڭ وڭ جانە سول تۇسىندا ەكى سايگۇلىك بەينەلەنگەن. دالا ءدۇلدىلى، ەر ازاماتتىڭ جەلدەي ەسكەن جۇيرىگى - تاۋەلسىزدىككە ۇمتىلعان قۇلشىنىستىڭ، جەڭىسكە دەگەن ۇمتىلىستىڭ بەلگىسى. ۋاقىت پەن كەڭىستىكتى بىرىكتىرەر اڭىزداعى قاناتتى پىراقتار تاڭعاجايىپ جاسامپاز قيالدى، جاقسىلىققا دەگەن قۇشتارلىقتى تانىتادى. ەلتاڭبانىڭ ءتاجى رەتىندە توبە تۇستا بەس بۇرىشتى جۇلدىز، تومەنگى جاعىندا «قازاقستان» جازۋى ورنالاسقان. ەلتاڭبا مەملكەتتىك ورىنداردا، ۇلتتىق ۆاليۋتامىز تەڭگەنىڭ بەتىندە نوبايلانعان. ءرامىزدىڭ اۆتورلارى- جانداربەك مالىبەكوۆ جانە شوت-امان ءۋاليحانوۆ.
الەمگە تانىتار ءانۇران. مەملەكەتتىك ءانۇران 2006 جىلى 6 قاڭتاردا نۇرسۇلتان نازارباەۆتىڭ باستاماسىمەن پارلامەنت وتىرىسىندا بەكىتىلدى. العاش رەت وسى جىلى 11 قاڭتاردا ەلباسىنىڭ سالتاناتتى ۇلىقتاۋ راسىمىندە ورىندالدى. ەل ازاماتتارىن الەۋمەتتىك تۇرعىدان توپتاستىرىپ، مادەني تۇرعىدان تەڭەستىرۋ ءۇشىن ۇلكەن مانگە يە دىبىستىق ءرامىز. ءانىنىڭ اۆتورى - ءشامشى قالداياقوۆ، ءسوزىن جازعان جۇمەكەن ناجىمەدەنوۆ پەن نۇرسۇلتان نازارباەۆ. ەلدىڭ بەرىك تۇتقاسى سانالىپ، جاھاندانۋشى ەل بولعانىمىزدىڭ دالەلى مەملەكەتتىك رامىزدەرىمىزدىڭ بەدەلى قاشاندا بيىك بولعاي. ءانۇرانىمىز ەركىن شىرقالىپ، كوگىلدىر تۋ كوكتە جەلبىرەپ، ەلدىكتەن حابار بەرەر ەلتاڭبا تەك توبەدە ءىلىنسىن دەپ تىلەيمىن.
ەڭلىك جۇماش
