«جىگىتكە جەتى ونەر دە از» دەگەن قازاق اتامىز. كاسىبي فوتوگراف بولۋمەن قاتار بۇگىندە قولونەرلىكتى دە بىرگە الىپ جۇرگەن جەڭىس ىسقابايدىڭ ەڭبەگىنە سۇيسىنبەۋ مۇمكىن ەمەس. ونىڭ قولىنان شىققان بۇيىمدار كىمدى بولماسىن وزىنە باۋراتپاي قويمايدى. تالدىقورعاندىق ازامات قازىر كونەنىڭ كوزىنە اينالعان حان توسەك، ساندىق سىندى قازاق حالقىنىڭ ۇلتتىق بۇيىمدارىن جاڭعىرتىپ، ولاردى زاماناۋي ناقىشقا كەلتىرىپ، ۇلكەن ءىس اتقارۋدا.
– ماعان بۇل ونەر اتامنان دارىدى دەسەم قاتەلەسپەيمىن. ول كىسى وتە شەبەر بولعان، قولىنان كەلمەيتىنى جوق. قايىستان قامشى ءورىپ، ەر شاۋىپ، اعاشتان تۇرمىسقا قاجەتتى بۇيىمداردى ءوز قولىمەن جاسايتىن. اكەم دە قول ونەردەن كەندە بولمادى. ول اعاش وڭدەۋدىڭ شەبەرى ەدى. سول كىسىلەردىڭ جاساعان بۇيىمدارى كىشكەنتايىمنان ساناما ابدەن ءسىڭىپ، ەسىمدە قالىپ قويعان. سودان وسى ونەرگە قىزىعۋشىلىعىم ارتا باستادى، - دەدى كەيىپكەرىمىز.
نەگىزى، ءار ادام ءوز جۇمىسىنا سۇيىسپەنشىلىكپەن قاراۋى كەرەك. سوندا عانا ونىڭ جاساعان ءىسى جاقسى ناتيجەسىن بەرەدى. سوزىمىزگە دالەل بولسىن جەڭىس ىسقاباي سونداي جانداردىڭ ءبىرى. ول وسى قول ونەرگە بار ۋاقىتىن، ىقىلاسىن، ماحابباتىن ارناعان ادام.
- بىلمەيمىن، اعاشپەن جۇمىس جاساعان كەزدە ەرەكشە ءلاززات الامىن. ونى جونىپ، كەسكەن كەزدە شىعاتىن ءيىسىنىڭ ءوزى مەنى راحاتقا بولەيدى. ارينە، جۇمىس بارسىندا شارشايسىڭ، قولىڭدى كەسەسىڭ، بىراق، سوڭىندا ناتيجەسىن كورگەندە وزىمە كوڭىلىم تولادى. ءبىر مارقايىپ قالامىن، — دەيدى ول.
بۇگىندە جەڭىستىڭ بالا كەزدەگى اۋەسقويلىعى كاسىپكە اينالىپ جاتقان جايى بار. ونىڭ قولىنان شىققان بۇيىمدارعا اقىرىنداپ ەلدىڭ سۇرانىسى ارتىپ كەلەدى. ماسەلەن، قول ونەر شەبەرى وسى ۋاقىتقا دەيىن حان توسەكتىڭ ون داناسىن جاساپ ۇلگەرىپتى. العاشىندا بۇل بۇيىمدى مۇراجايدان جادىگەر رەتىندە كورگەن ول، كونە توسەكتى اعاشتان ءوزى جاساپ كورمەككە بەل بۋعان.
- ءبىز جۇمىستان كەلگەندە ەكى اياقتى كوتەرىپ قويىپ جاتقاندى جاقسى كورەمىز عوي. كورىپ تۇرعاندارىڭىزداي بۇل توسەكتىڭ ەكى جاعى قايقى كەلگەندىكتەن، تىنىعىپ الۋعا وتە ىڭعايلى. ەگەر ونىڭ ۇستىنە جاتا قالساڭىز شارشاعانىڭىز بىردەن ساپ تىيىلادى. دەنساۋلىققا دا وتە پايدالى، — دەيدى ج.ىسقاباي.
جەڭىس جۇمالىۇلى جاساعان توسەكتەرىنىڭ بىرنەشەۋىن جاقىن ارالاساتىن دوستارىنا مارتتىك تانىتىپ، سىيعا تارتىپ جىبەرىپتى. قالعانىن قالتالى ازاماتتار ساتىپ العان. ايتا كەتەيىك، كوپ ۋاقىت جۇمسالىپ، اسا ىجداحاتتىلىقپەن جاسالعان زاتتىڭ قۇنى دا جوعارى. شەبەردىڭ سوزىنشە، حان توسەكتىڭ قىمباتتىعىنا قاراماستان ادامدار تاپسىرىس بەرەدى ەكەن.
قولىنان بال تامعان ازامات ساندىقتىڭ دا بىرنەشە ءتۇرىن جاساپ ءجۇر. ولاردىڭ اتاۋى دا كولەمىنە قاراي ءار ءتۇرلى كەلەدى. «شىنار»، «تۇمار»، «قارلىعاش» سىندى ساندىقتارى قاراعان كوزدىڭ جاۋىن الادى.
سونداي-اق، كەيىپكەرىمىز بالالارعا ارنالعان ءار ءتۇرلى ويىنشىقتاردى ويدان قۇراستىرىپ شىعارعانىن اتاپ وتكەنىمىز ءجون. ونىڭ دا بىرنەشە ءتۇرى بار. ماسەلەن، «جورعاتايى» — جىلقى كەيپىندەگى تەربەلمەلى ويىنشىق. ۇستىندە بالا وتىرۋعا ىڭعايلى ورىندىعى بار. ال، «كۋا-كۋاسىنىڭ» اتقاراتىن فۋنكتسياسى تىپتەن بولەك. ول ءوزى اتكەنشەك، كەرى اينالدىرساڭ كوپىر. كەرەك دەسەڭىز ۇيدە بالامەن شاعىن فۋتبول ويناساڭىز قاقپا دا بولىپ بەرە الادى. قول ونەر شەبەرى مۇنى العاشىندا ينتەرنەتتەن كورىپ، كەيىن ديزاينىن جەتىلدىرە تۇسكەن ەكەن.
- مويىنداۋ كەرەك، قازىر كىشكەنتايلارىمىز سىرتتان كەلگەن ساپاسى ناشار ويىنشىقتارمەن ويناپ ءجۇر. ونىڭ بالا دەنساۋلىعىنا تيگىزەر زيانى دا جوق ەمەس. قاراپ وتىرىپ، ءبىر كۇنى بۇل ويىنشىقتاردى مەن دە جاساي الامىن عوي دەگەن وي كەلدى، — دەيدى ول.
جەڭىس ىسقاباي قازىرگى تاڭدا ءبىر عيماراتتى جالعا الىپ، كاسىبىن دوڭگەلەتىپ وتىر. الداعى ۋاقىتتا الماتى قالاسىنان ۇلكەن شەبەرحانا اشۋ جوسپارىندا بار.
