الماتى وبلىسىندا 23 جاسار كاسىپكەر ابزال اكىمبەك مۋزىكالىق اسپاپتار جاسايتىن شەبەرحانا اشتى. قولونەر شەبەرى جىلىنا 200-دەن استام ۇلتتىق اسپاپ شىعارادى. ءونىمدى ۇلكەن قىزىعۋشىلىقپەن مادەنيەت مايتالماندارى، مۋزىكالىق مەكتەپتەر مەن مەكەمەلەر ساتىپ الۋدا.
ابزال اكىمبەك - ەڭبەكشىقازاق اۋدانىنداعى راحات اۋىلىنىڭ تۇرعىنى. ول جاستايىنان ۇلتتىق مۋزىكالىق اسپاپتارعا، ولاردىڭ تاريحى مەن وندىرىسىنە قىزىعۋشىلىق تانىتىپ كەلدى. مەكتەپ قابىرعاسىنان باستاپ، اسىرەسە، جازعى دەمالىس كەزىندە مۋزىكالىق اسپاپتار جاساۋ شەبەرحاناسىندا تاجىريبە جيناقتادى. كوللەدجدەن كەيىن ول تاعى ءبىر جىل شەبەرحانادا جۇمىس ىستەدى. ۋاقىت وتە كەلە ءۇيدىڭ اۋلاسىندا شاعىن تسەح ۇيىمداستىردى. وسىلايشا جەكە ءحوببيى كاسىپكە اينالا باستادى. 2019 جىلى ابزال «باستاۋ بيزنەس» جوباسى بويىنشا كاسىپكەرلىك نەگىزدەرىنە وقۋدان ءوتتى. سول جىلى يننوۆاتسيالىق يدەياسى ءۇشىن 2,5 ملن تەڭگە كولەمىندە گرانت الدى.
مەملەكەتتىك قولداۋدىڭ ارقاسىندا مەن ءحوببيىمدى تابىستى ىسكە اسىردىم. كومەك سۇراپ كاسىپكەرلەر پالاتاسىنىڭ اۋداندىق فيليالىنا جۇگىندىم. كوپ ۇزاماي «جاس كاسىپكەر» باعدارلاماسى بويىنشا 2,5 ملن تەڭگە گرانت ۇتىپ الدىم. وسى قاراجاتقا ستانوكتار مەن قۇرالداردى ساتىپ الدىم. قازىرگى تاڭدا شەبەرحانادا مەنىمەن بىرگە تاعى ءۇش ادام جۇمىس ىستەيدى، - دەدى جاس كاسىپكەر.
شەبەرحانادا ابزال اكىمبەك اسپاپتاردىڭ 50 ءتۇرىن دايىندايدى. ولاردىڭ اراسىندا دومبىرا، پريما دومبىرا، قوبىزعا قىزىعۋشىلىق جوعارى. سونداي-اق جەتىگەن، داۋىلپاز، سىبىزعى، شەرتەر جانە باسقا دا ۇلتتىق اسپاپتار ەرەكشە تانىمال. ونىمدەردى ارتيستەر، ونەر مەكتەپتەرى جانە ءىرى مادەني مەكەمەلەر ساتىپ الادى. سونىمەن قاتار سىيلىق رەتىندە دە بۇيىمدار جاقسى وتەدى.
ءبىز جىلىنا 200-دەن استام اسپاپ دايىندايمىز. ءوندىرىس ىسىندە وتاندىق جانە شەتەلدىك ماتەريالداردى پايدالانامىز. مىسالى، جاڭعاق اعاشىن، شىرشا، ۇيەڭكى، قىزىل اعاشتى، افريكالىق تروپيكالىق اعاشتاردى قولدانامىز. سوندىقتان ساپالى بۇيىم ازىرلەۋ ءبىز ءۇشىن وتە ماڭىزدى شارت. مۋزىكالىق اسپاپتاردىڭ كوپشىلىگىن ۇلتتىق ناقىشتى ساقتاي وتىرىپ، ەرەكشە ەتنوستيلدە دايىندايمىز، - دەدى ابزال اكىمبەك.
كاسىپكەردىڭ الداعى ۋاقىتتا وتاندىق جانە حالىقارالىق كورمەلەرگە قاتىسىپ، ءونىمىن تانىمال ەتۋدى ماقسات ەتىپ وتىر.
