قازىر ءبىزدىڭ ەلىمىزدە بيزنەستىڭ دامۋدىڭ بۇرىن سوڭدى بولماعان قولايلى احۋالى تۋىپ وتىر. بۇعان اتالمىش سالاعا ايرىقشا كوڭىل ءبولىپ وتىرۋى، سول ارقىلى رەسپۋبليكاداعى بانكتەردىڭ ونى قارجىلاندىرۋدى جاقسى جولعا قويۋى تىكەلەي مۇرىندىق بولۋدا.
جاڭادان كاسىپ اشقىسى كەلگەن ادام ءۇشىن قاجەتتى بيزنەس-يدەيانى تاڭداۋ، بيزنەس-جوسپار ازىرلەۋ، سالىقتاردى ءتۇسىنۋ، ساتۋدى جولعا قويۋ – مۇنىڭ ءبارى وڭاي شارۋا ەمەس. كاسىپپەن اينالىسۋ ۇلكەن تاۋەكەلدىلىكتى تالاپ ەتەدى. كەز كەلگەن كاسىپتى يگەرۋ ەكىنىڭ ءبىرىنىڭ قولىنان كەلە بەرمەيدى. سونداي-اق قاي ءىستى بولماسىن باستاۋ ءۇشىن دە ادامنىڭ ىنتا-ىقىلاسى جەتكىلىكسىز، ونىڭ العان بىلىمىنە قوسا قارىم-قابىلەتى مەن تاجىريبەسىنىڭ بولۋى ماڭىزدى. شىنى كەرەك، بىرەۋ ىستەگەندى ەكىنشى بىرەۋ ىستەي الادى دەۋ دە جاڭساق پىكىر. ويتكەنى ءار ادامنىڭ ورەسى ءار ءتۇرلى. الايدا، مەملەكەت كاسىپ باستايمىن دەگەندەرگە مول مۇمكىندىك بەرىپ وتىر. تەك قالاۋلى ءىستى تاۋىپ، سونى ۇرشىقشا ءيىرۋ قاجەت. ماسەلەن كاسىپكەرلەردى قولداۋعا باعىتتالعان مەملەكەتتىك باعدارلاماعا قاتىسىپ، جوبا ارقىلى ءوزىنىڭ كاسىبىن اشقان كاسىپكەرلەردىڭ ءبىرى - تەكەلىلىك لەونيد پاك. كازىرگى تاڭدا قولونەر شەبەرى ءوز ءىسىن اشىپ، كاسىبىن دامىتىپ جاتىر.
كاسىبىن اشپاس بۇرىن قالالىق اتامەكەن كاسىپكەرلەر پالاتاسىندا «بيزنەس كەڭەسشى» باعدارلاماسى ارقىلى ءبىلىم الىپ، تىگىن سالاسى بويىنشا ءدارىس العان. 2020 جىلى جەلتوقسان ايىندا ءوز جوباسىن قورعاپ، مەملەكەت تاراپىنان 2 ملن تەڭگە كولەمىندە گرانت يەلەنگەن.
بۇگىندە تسەحقا قاجەتتى قۇرال-جابدىقتاردى ساتىپ الىپ، تابيعي تەرى ونىمدەرىنەن كۇندەلىكتى ومىردە قولدانىسقا جارايتىن زاتتاردى ساتىلىمعا شىعارىپ وتىر. شەبەردىڭ قولىنان شىعاتىن بۇيىمداردىڭ ءبىر ەرەكشەلىگى -تابيعي جانە موسكۆا، تۇركيا سىندى ەلدەردەن اكەلىنەتىن ساپالى تەرى ونىمدەرىن قولدانۋى. ساتىلىمعا شىعاراتىن زاتتارى دا قول جەتىمدى. ءار تۇتىنۋشى ءوز تالعامىنا ساي ديزاين ءتۇرىن تاڭداپ تاپسىرىس بەرە الادى.
ايتا كەتسەك، قازىرگى تاڭدا لەونيد پاك تەكەلىلىك 2 تۇرعىندى تۇراقتى جۇمىسپەن قامتىپ وتىر. سونىمەن قاتار وسى ونەر تۇرىنە قىزىعۋشىلىق تانىتقان جاستاردى دا وقىتىپ، ءوز ىستەرىن باستاۋعا جول كورسەتۋدە. قازىرگى تاڭدا تسەحتا 30- عا تارتا ءتۇرلى-ءتۇستى بۇيىم شىعارىلىپ، ينتەرنەت رەسۋرستارى ارقىلى جاقىن ماڭداعى قالالارعا جونەلتىلەدى.
- قاتارداعى ماماننان قولونەر شەبەرىنە اينالۋ مەن ءۇشىن كوپ ىزدەنىستى تالاپ ەتتى. بۇل سالاعا كەلمەس بۇرىن الماتى قالاسىندا تەرى ونىمدەرىن وڭدەۋ بويىنشا وقىتىلاتىن ءار ءتۇرلى قۋرستارعا قاتىسىپ، العان ءبىلىمىمدى تاجىريبە جۇزىندە شىڭدادىم. بارشالارىڭىزدى ءوز ىستەرىڭىزدى اشىپ، جەكە كاسىپ باستاۋعا شاقىرامىن. سەبەبى قازىر ورتا جانە شاعىن بيزنەسكە مەملەكەت تاراپىنان كورسەتىلەتىن قولداۋ كوپ. مەنىڭ قازىرگى اينالىسىپ وتىرعان كاسىبىمدى ءالى دە دامىتىپ، اتادان بالاعا مۇرا ەتىپ قالدىرۋ - باستى ماقساتىم، - دەيدى قولونەر شەبەرى.
ەندى كاسىپكەر عيمارات اۋماعىن دا كەڭەيتىپ، ونىمدەرىن ەلىمىزدىڭ باسقا دا قالالارىنا تاسىمالداۋدى جوسپارلار وتىر. سونداي-اق قالامىزدا دا وسى كاسىپتى دامىتىپ، تەرى ءوندىرىسىن قولعا الۋ ويىندا بار.
وسىنداي ازدان باستاپ، كوپ ءىس تىندىرعان جانداردىڭ ءومىرى بىزگە قاشاندا ۇلگى. قاي ىستە بولماسىن ادالدىق دەگەن كىرشىكسىز دۇنيەگە كىر تۇسىرمەۋ ازاماتتىق پارىز ەكەنى بەسەنەدەن بەلگىلى. ال مۇنداي كاسىپ يەلەرى كاسىبىن جاڭا اشقاندارعا ىسىمەن ءتالىم بەرەرى ءسوزسىز.
