اقتوبەدە قولونەر شەبەرلەرى قالا كۇنىنە وراي كورپە تىكتى، دەپ حابارلايدى "ادىرنا" ۇلتتىق پورتالى.
اقتوبە قالاسىنىڭ 155 جىلدىعى اياسىندا قالا شەبەرلەرى 155 مەترلىك كورپە تىكتى. ءبارى دە سۋ تاسقىنىنان زارداپ شەككەندەرگە تابىستالماق. بيىلعى شارا «كۇشىمىز بىرلىكتە» ۇرانىمەن ءوتتى.
ۇيىمداستىرىلعان شارانىڭ بارىنە سۋ تاسقىنىنان زارداپ شەككەن تۇرعىندار قاتىسقان.
"ەتنوفەستيۆالدىڭ ءبىر ءبولىمى كورپە party دەپ اتالدى. وعان قۋرايلى مادەنيەت ءۇيى جاۋاپتى دەپ بەكىتىلدى. اقتوبە قالاسىنداعى شەبەرلەردىڭ باسىن قوسقان چاتقا كىرىپ، قانداي جۇمىس اتقارا الاتىنىمىزدى تالقىلادىق. ۇزىندىعى 2 مەتر 30 سم بولاتىن 67 كورپە تىگىلدى. شەبەرلەر اراسىندا جەكە كاسىپكەرلەر دە، مەكتەپ مۇعالىمدەرى دە بار. بارلىعى 46 شەبەر قاتىستى. كورپەنىڭ ءبارى سۋ تاسقىنىنان زارداپ شەككەن وتباسىلارعا تاراتىلادى، — دەدى قۇرايلى مادەنيەت ءۇيىنىڭ كوركەمدىك جەتەكشىسى ساندۋعاش تاۋباەۆا.
قالا كۇنىنە وراي كورپە تىگۋ تۋرالى ۇسىنىس تۇسكەندە اقتوبەلىك شەبەرلەر بىردەن كەلىسكەنىن ايتادى.
"مۇنى 10 كۇندەي ۋاقىتتا تىگىپ شىقتىق. قىزعالداق كوكتەمنىڭ، اقتوبەنىڭ دە سيمۆولى. ال قۇرساق ويۋدى تاڭداعانىمىزدىڭ سەبەبى اقتوبەمىزدىڭ قوينىندا نەبىر بايلىعىمىز بار. سونى كورسەتكىمىز كەلدى. جەرىمىز كوك، مولشىلىق بولسىن دەگەن نيەتپەن جاسىلدى، كوز تيمەسىن دەپ قىزىلدى قولداندىق. ءوزىم التى كورپە تىگىپ، سىيلادىم. ءار كورپەگە 3,3-3,6 كەلى ماقتا سالدىق. ءدال وسىنداي ۇلگىدە العاش تىگىپ وتىرمىز. بۇل بىرنەشە شەبەردىڭ يدەياسى نەگىزىندە تىگىلدى", — دەدى فەستيۆالگە قاتىسقان ايگۇل ەسىمدى شەبەر.
