كەيدە كوزگە قاراپايىم كورىنەتىن دۇنيەنىڭ وزىندە تۇتاس ءبىر حالىقتىڭ تاريحى مەن تاعدىرى، تالعامى مەن تانىمى جاتادى. قولونەر دە سونداي. ول – تەك بۇيىم جاساۋ ونەرى ەمەس، ۇرپاقتان ۇرپاققا جالعاسقان رۋحاني ساباقتاستىقتىڭ كورىنىسى. اسىرەسە انا قولىنان شىققان دۇنيەنىڭ ورنى بولەك. ويتكەنى ونىڭ ءار ورنەگىندە ۇلتتىق تاربيە، ءار بەدەرىندە ۇلكەن ىزدەنىس، ءار بۇيىمىندا جۇرەك جىلۋى بار.
كوكشەتاۋداعى «قوعامدىق كەلىسىم» كمم عيماراتىندا وتكەن «انانىڭ قولونەرى – شىعارماشىلىق كورمەسى» اتتى مادەني ءىس-شارا وسى ويدى تاعى ءبىر مارتە ايشىقتاي ءتۇستى. كورمەدە ۇلتتىق قولونەردى دارىپتەپ، انالاردىڭ شىعارماشىلىعىن قولداۋعا باعىتتالعان جۇمىستار كوپشىلىك نازارىنا ۇسىنىلدى.
ءىس-شارانىڭ ءمانى دە وسىندا – قولونەر ارقىلى ۇلتتىق قۇندىلىقتاردى دارىپتەۋ، ءداستۇرلى ونەردىڭ قادىرىن كەيىنگى بۋىنعا ءتۇسىندىرۋ. كورمە بارىسىندا قوناقتار شەبەر انالاردىڭ قولىنان شىققان ءتۇرلى بۇيىمداردى تاماشالاپ، ولاردىڭ جاسالۋ ەرەكشەلىكتەرىمەن تانىستى.
ساندىك-قولدانبالى ونەر شەبەرلەرى وداعىنىڭ ءتورايىمى گۇلبارا نۇرقانوۆا ۇلتتىق قولونەردىڭ ۇرپاق تاربيەسىندەگى ماڭىزىنا توقتالدى.
– ۇلتتىق قولونەر – حالقىمىزدىڭ عاسىرلار بويى قالىپتاسقان مادەني مۇراسىنىڭ ءبىر بولىگى. ونى ساقتاۋ – وتكەندى قۇرمەتتەۋ عانا ەمەس، كەلەشەك ۇرپاققا ۇلتتىق قۇندىلىقتاردى جەتكىزۋ. اسىرەسە انالاردىڭ بۇل باعىتتاعى ەڭبەگى ەرەكشە. سەبەبى قولونەر ارقىلى بالاعا ەڭبەكقورلىقتى، ۇقىپتىلىقتى، اسەمدىكتى باعالاۋدى ۇيرەتۋگە بولادى، – دەدى گۇلبارا نۇرقانوۆا.
كورمەگە ساندىك-قولدانبالى ونەر شەبەرلەرى وداعىنىڭ مۇشەلەرى ۇلجالعاس قارىمساقوۆا مەن كەنجەباي سماعۇلقىزى قاتىسىپ، وزدەرىنىڭ شىعارماشىلىق جۇمىستارىن تانىستىردى. شەبەرلەر ءار بۇيىمنىڭ جاسالۋ تەحنيكاسى مەن ەرەكشەلىگىنە توقتالىپ، تۋىندىلاردىڭ تاريحىن اڭگىمەلەدى.
كورمەدەگى ءار زاتقا ۇڭىلگەندە، ونىڭ سىرتقى كورىنىسىنەن بۇرىن، سول بۇيىمدى جاساعان ادامنىڭ ەڭبەگى سەزىلەدى. بىرىنە ورنەك ءتۇسىرۋ ءۇشىن قانشا ۋاقىت، قانشا ءتوزىم كەرەك دەسەڭىزشى. قولونەردىڭ قادىرى دە وسىندا. ول اسىعىستىقتى كوتەرمەيدى. شەبەردەن سابىر مەن ىجداعاتتى تالاپ ەتەدى.
– قولونەرگە بالا كەزدەن قىزىعۋشىلىق تانىتتىم. ءار بۇيىمدى جاساعاندا ونىڭ سىرتقى ادەمىلىگىنە عانا ەمەس، ۇلتتىق ماعىناسىنا دا ءمان بەرەمىن. بىزگە دەيىنگى اجەلەرىمىز بەن انالارىمىزدىڭ قولىنان شىققان دۇنيەلەردىڭ وزىندىك تاريحى بار. سول ءداستۇردى جوعالتپاي، كەيىنگى ۇرپاققا جەتكىزۋ – ءبىزدىڭ مىندەتىمىز، – دەدى كورمەگە قاتىسۋشى ۇلجالعاس قارىمساقوۆا.
شارا بارىسىندا شەبەرلىك ساباعى دا ۇيىمداستىرىلدى. قاتىسۋشىلار قولونەر بۇيىمدارىنىڭ جاسالۋ بارىسىمەن جاقىنىراق تانىسىپ، ۇلتتىق ونەردىڭ قىر-سىرىن تاجىريبە جۇزىندە كورۋگە مۇمكىندىك الدى.
مۇنداي شەبەرلىك ساباقتارىنىڭ تاربيەلىك ءمانى دە از ەمەس. ويتكەنى ۇلتتىق ونەردى تەك سىرتتاي تاماشالاۋ ءبىر باسقا دا، ونىڭ جاسالۋ بارىسىن ءوز كوزىڭمەن كورىپ، قولمەن ۇستاپ كورۋ ءبىر باسقا. وسىنداي ساتتەردە ءداستۇردىڭ ءتىرى ەكەنىنە كوز جەتكىزەسىڭ.
كەزدەسۋ سوڭىندا قاتىسۋشىلار ەركىن پىكىر الماسىپ، شەبەرلەرگە ساۋالدارىن قويدى. شىعارماشىلىق تاجىريبەلەرىمەن ءبولىسىپ، ۇلتتىق ونەردى دامىتۋ مەن ونى جاس ۇرپاققا تانىتۋدىڭ ماڭىزى جونىندە وي قوزعادى.
قولونەر – ۋاقىتتىڭ شاڭىن باسقان كونە دۇنيە ەمەس. ول بۇگىن دە ءومىر ءسۇرىپ كەلەدى. تەك ونى قادىرلەي ءبىلۋ، ۇيرەنۋگە نيەت تانىتۋ جانە كەلەسى ۇرپاققا جەتكىزۋ قاجەت.
انا قولىنان شىققان ءاربىر بۇيىم – ءبىر وتباسىنىڭ عانا ەمەس، تۇتاس ۇلتتىڭ مادەني جادىنان سىر شەرتەتىن دۇنيە. سوندىقتان مۇنداي كورمەلەردىڭ ءمانى دايىن بۇيىمداردى كوپشىلىككە كورسەتۋىمەن شەكتەلمەيدى. ەڭ باستىسى – ۇلتتىق ونەردىڭ قادىرىن ارتتىرىپ، ونى ۇرپاق ساناسىنا سىڭىرۋگە جول اشادى.
«انانىڭ قولونەرى – شىعارماشىلىق كورمەسى» دە وسى ماقساتتى كوزدەگەن تاعىلىمدى شارا بولدى. ۇلتتىق ونەر ۇلىقتالعان جەردە ۇرپاق ساباقتاستىعى دا ۇزىلمەيدى. ال انانىڭ قولىنان جالعاسقان ونەردىڭ ومىرشەڭدىگى – سونىڭ ايقىن دالەلى.
