«اتامەكەن» ۇلتتىق كاسىپكەرلەر پالاتاسىنىڭ ەڭبەكشىقازاق اۋداندىق فيليالىنىڭ باسشىسى باقىتگۇل دۇيسەبەكوۆانىڭ ايتۋىنشا، 2020 جىلى كاسىپكەرلەردى قولداۋ ويداعىداي جۇزەگە اسىرىلدى. ولارعا جان-جاقتى قىزمەت كورسەتىلىپ، ءتۇرلى كەڭەستەر بەرىلدى. سونىڭ ىشىندە ءساتتى شىققان 113 جوباعا 467 281 286 تەڭگە بولىندى.
– جەكە كاسىپ اشۋعا قىزىعاتىندار سانى جىل سايىن ارتىپ كەلەدى. اسىرەسە، جاستار جاعى وتە بەلسەندى. بۇعان، ارينە، قۋاناسىڭ. ويتكەنى، جاستار – ەلىمىزدىڭ بولاشاعى. ءبىز وتكەن جىلى پاندەميا قيىنشىلىقتارىن باستان وتكىزە ءجۇرىپ كاسىپكەرلىكتى قولداۋ جۇمىستارىن نازاردان تىس قالدىرمادىق. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017–2021 جىلدارعا ارنالعان «ەڭبەك» مەملەكەتتىك باعدارلاماسى اياسىندا «باستاۋ بيزنەس» جوباسى قولعا الىندى. وسى جوبا نەگىزىندە ونلاين فورماتتا 300-دەن استام ادام وقىپ، ارنايى سەرتيفيكاتتار الدى. جالپى مۇنداعى وقۋ كۋرسى 12 مودۋلدەن تۇرادى. وندا كاسىپكەرلىككە قاجەتتى ماركەتينگ نەگىزدەرى، قارجى ساۋاتتىلىعى، بيزنەس-جوسپار ازىرلەۋ، بيزنەس-يدەيانى تاڭداۋ سياقتى باعدارلامالار بار. العان بىلىمدەرىنىڭ دەڭگەيىن انىقتاۋ ءۇشىن كۋرسقا قاتىسۋشىلار ارنايى تەست تاپسىرادى. ساراپشىلاردىڭ باعالاۋىنان وتكەندەر گرانت الۋ مۇمكىندىگىنە يە بولادى. قىسقاسى، مۇندا كەلگەن ادام كاسىپكەرلىكتىڭ قىرى مەن سىرىن جان-جاقتى مەڭگەرەدى، – دەيدى باقىتگۇل دۇيسەبەكوۆا.
قازىرگى تاڭدا وسى جوباعا قاتىسقانداردىڭ ىشىندە ءوز كاسىبىن اشقاندار بارشىلىق. سونىڭ ءبىرى – ەسىك قالاسىندا تۇراتىن اسەم تىنايبەكوۆا. ونىڭ اناسى گۇلنار وتىز جىل بويى تىگىنشى بولىپ جۇمىس ىستەپتى. اسەمنىڭ بويىنا انا ءتالىمى كىشكەنتايىنان دارىعان. ءسويتىپ ول وتباسىمەن اقىلداسا كەلە تىگىن تسەحىن اشۋعا بەل بۋادى. وسى ماقساتتا «اتامەكەن» ۇلتتىق كاسىپكەرلەر پالاتاسىنىڭ فيليالىنا قاراستى كۋرستا ءبىر ايعا جۋىق وقيدى. بيزنەس-جوسپار قۇرۋدى ۇيرەنەدى جانە تاعى باسقا مۇمكىندىكتەردى مەڭگەرەدى. ناتيجەسىندە، 200 مىڭ تەڭگە كولەمىندەگى گرانتقا قول جەتكىزدى.
– «جاس كاسىپكەر» باعدارلاماسى ماعان كوپ نارسەنى ۇيرەتتى. سونىڭ ارقاسىندا جولىمىز اشىلدى. بەس ادامدى جۇمىسپەن قامتىپ وتىرمىز. ءبىز ءتۇرلى فيرمالار مەن كومپانيا جۇمىسشىلارىنا ارنايى كيىم تىگۋمەن اينالىسامىز. بولاشاقتا تىگىن تسەحىن كەڭەيتۋ ماسەلەسى دە جوسپارىمىزدا بار. مەملەكەتتىڭ مەن سەكىلدى كاسىپكەرلىككە ۇمتىلعان جاستاردى قولداعانىنا ريزامىن. ەرىنبەي ەڭبەك ەتسەڭ، كاسىبىڭ ناسىبىڭە اينالادى. وعان ەش كۇمانىم جوق، – دەيدى تىگىن تسەحىنىڭ يەسى اسەم تىنايبەكوۆا. ايتا بەرسەك، مۇنداي جارقىن مىسالداردى اۋدان وڭىرىندە كوپتەپ كەزدەستىرۋگە بولادى.
بولات ءماجيت
ەڭبەكشىقازاق اۋدانى
