Qazır bızdıŋ elımızde biznestıŋ damudyŋ būryn soŋdy bolmaǧan qolaily ahualy tuyp otyr. Būǧan atalmyş salaǧa airyqşa köŋıl bölıp otyruy, sol arqyly respublikadaǧy bankterdıŋ ony qarjylandyrudy jaqsy jolǧa qoiuy tıkelei mūryndyq boluda.
Jaŋadan käsıp aşqysy kelgen adam üşın qajettı biznes-ideiany taŋdau, biznes-jospar äzırleu, salyqtardy tüsınu, satudy jolǧa qoiu – mūnyŋ bärı oŋai şarua emes. Käsıppen ainalysu ülken täuekeldılıktı talap etedı. Kez kelgen käsıptı igeru ekınıŋ bırınıŋ qolynan kele bermeidı. Sondai-aq qai ıstı bolmasyn bastau üşın de adamnyŋ ynta-yqylasy jetkılıksız, onyŋ alǧan bılımıne qosa qarym-qabıletı men täjıribesınıŋ boluy maŋyzdy. Şyny kerek, bıreu ıstegendı ekınşı bıreu ıstei alady deu de jaŋsaq pıkır. Öitkenı är adamnyŋ öresı är türlı. Alaida, memleket käsıp bastaimyn degenderge mol mümkındık berıp otyr. Tek qalauly ıstı tauyp, sony ūrşyqşa iıru qajet. Mäselen käsıpkerlerdı qoldauǧa baǧyttalǧan memlekettık baǧdarlamaǧa qatysyp, joba arqyly özınıŋ käsıbın aşqan käsıpkerlerdıŋ bırı - tekelılık Leonid Pak. Kazırgı taŋda qolöner şeberı öz ısın aşyp, käsıbın damytyp jatyr.
Käsıbın aşpas būryn qalalyq Atameken käsıpkerler palatasynda «Biznes keŋesşı» baǧdarlamasy arqyly bılım alyp, tıgın salasy boiynşa därıs alǧan. 2020 jyly jeltoqsan aiynda öz jobasyn qorǧap, memleket tarapynan 2 mln teŋge kölemınde grant ielengen.
Bügınde sehqa qajettı qūral-jabdyqtardy satyp alyp, tabiǧi terı önımderınen kündelıktı ömırde qoldanysqa jaraityn zattardy satylymǧa şyǧaryp otyr. Şeberdıŋ qolynan şyǧatyn būiymdardyŋ bır erekşelıgı -tabiǧi jäne Moskva, Türkiia syndy elderden äkelınetın sapaly terı önımderın qoldanuy. Satylymǧa şyǧaratyn zattary da qol jetımdı. Är tūtynuşy öz talǧamyna sai dizain türın taŋdap tapsyrys bere alady.
Aita ketsek, qazırgı taŋda Leonid Pak tekelılık 2 tūrǧyndy tūraqty jūmyspen qamtyp otyr. Sonymen qatar osy öner türıne qyzyǧuşylyq tanytqan jastardy da oqytyp, öz ısterın bastauǧa jol körsetude. Qazırgı taŋda sehta 30- ǧa tarta türlı-tüstı būiym şyǧarylyp, internet resurstary arqyly jaqyn maŋdaǧy qalalarǧa jöneltıledı.
- Qatardaǧy mamannan qolöner şeberıne ainalu men üşın köp ızdenıstı talap ettı. Būl salaǧa kelmes būryn Almaty qalasynda terı önımderın öŋdeu boiynşa oqytylatyn är türlı qurstarǧa qatysyp, alǧan bılımımdı täjıribe jüzınde şyŋdadym. Barşalaryŋyzdy öz ısterıŋızdı aşyp, jeke käsıp bastauǧa şaqyramyn. Sebebı qazır orta jäne şaǧyn bizneske memleket tarapynan körsetıletın qoldau köp. Menıŋ qazırgı ainalysyp otyrǧan käsıbımdı älı de damytyp, atadan balaǧa mūra etıp qaldyru - basty maqsatym, - deidı qolöner şeberı.Endı käsıpker ǧimarat aumaǧyn da keŋeitıp, önımderın elımızdıŋ basqa da qalalaryna tasymaldaudy josparlar otyr. Sondai-aq qalamyzda da osy käsıptı damytyp, terı öndırısın qolǧa alu oiynda bar. Osyndai azdan bastap, köp ıs tyndyrǧan jandardyŋ ömırı bızge qaşanda ülgı. Qai ıste bolmasyn adaldyq degen kırşıksız düniege kır tüsırmeu azamattyq paryz ekenı beseneden belgılı. Al mūndai käsıp ielerı käsıbın jaŋa aşqandarǧa ısımen tälım bererı sözsız.
Ūqsas jaŋalyqtar
