اقش-تىڭ رەسەيگە قارسى كەزەكتى ەكونوميكالىق سانكتسياسى
اقش پرەزيدەنتى دجو بايدەننىڭ تاپسىرماسىمەن بۇگىن رەسەيدىڭ 32 جەكە جانە زاڭدى تۇلعالارى سانكتسياعا ءىلىندى. ۆاشينگتون مەن نيۋ-يورك قالالارىنان رەسەيدىڭ ديپلوماتتارى مەن ەلشىلەرى قۋىلدى.
سونىمەن قاتار، اق ءۇي مەملەكەتتىك دەپارتامەنتتەرمەن، ساۋدا مينيسترلىگىمەن بىرلەسە وتىرىپ، امەريكالىق كومپانيالاردان رەسەيدىڭ مەملەكەتتىك قارىزدارىنا، كومپانيالارىنا سانكتسيالار سالىپ، رەسەي بانكىنىڭ قارجىلىق اعىمدارىنا توسقاۋىل قويۋدى تاپسىردى.
اقش-تىڭ مەملەكەتتىك ۇلتتىق قاۋىپسىزدىك كەڭەسىنىڭ باسشىسى دجەيك سالليۆان مۇنى رەسەيدىڭ امەريكاداعى پرەزيدەنت سايلاۋىنا كەدەرگى جاساپ، ءارتۇرلى كيبەرشابۋىلدار جاساۋىمەن دە بايلانىستىردى.
اقش-تىڭ رەسەيگە سالىنىپ وتىرعان وسى جولعى سانكتسياسى وتە جوعارى ماسشتابتا بولىپ وتىر. رەسەيلىك تاراپ بۇل سانكتسيالارعا ءبىز دە جاۋاپ بەرەمىز دەپ مالىمدەدى. اق ءۇي ۋكراينانىڭ تەرريتوريالىق تۇتاستىعىن ساقتاۋعا، دونباسس پەن قىرىم ۋكراينانىڭ سۋۆەرەنيتەتىنە كىرەتىنىن، ءارى ۋكراينانى سوڭىنا دەيىن قولدايتىنىن ايتتى.
اقش رەسەيدىڭ "نيۋسفرونت", "ينفوروس", Southfront سياقتى اقپاراتتىق مادەني ستراتەگيالىق قورلارىنا دا سانكتسيا جاريالادى.
پەرسونالدى سانكتسيالار "موستوترەستا", "لەنپرومترانسپروەكتا" سياقتى الىپ زاۋىتتار مەن "تومموت" قۇرىلىس ديرەكتسياسىنا، قىرىمداعى جەر قاتىناستارى باسشىسى لاريسا كۋلينيچكە، قىرىمنىڭ ءىىد باسشىسى پاۆەل كارانداعا، سونىمەن قاتار بىرنەشە لاۋازىمدى تۇلعالاردى تىزىمگە الدى.
كرەمل قازىر اقش-تىڭ ەكونوميكالىق سانكتسيالارىن حالىقارالىق ديپلوماتياعا كەرەعار دەپ ايىپتاپ، قارسى جاۋاپ قايتارۋعا دايىندالىپ جاتىر. رەسەيدىڭ ءرۋبلى توقىراۋعا ۇشىراپ، قۇلدىراپ جاتىر. رۋبلگە كىندىگىمەن بايلانعان ءبىزدىڭ تەڭگەنىڭ كۇنى ەندى نە بولار ەكەن... قازاقستانداعى ءۇي مەن كولىكتىڭ باعاسىنىڭ كوككە ورلەپ، قىمباتتاپ جاتقانى وسى سانكتسيالارعا تىكەلەي بايلانىستى.
بەكبولات قارجان،
"ادىرنا" ۇلتتىق پورتالى
