اقش تاجىكستاننىڭ ورتا مەكتەپتەرىنە 242 مىڭ دانا اعىلشىن ءتىلى وقۋلىقتارىن سىيعا تارتتى. كىتاپتار 10-11 سىنىپ وقۋشىلارىنا ارنالعان، دەپ حابارلايدى «ادىرنا» ءتىلشىسى.
وقۋلىقتاردى رەسمي تاپسىرۋ ءراسىمى دۋشانبەدە اقش ەلشىسى مانۋەل ميكاللەردىڭ، ءبىلىم جانە عىلىم ءمينيسترى سايدزود راحيم حامرونىڭ، اگا حان دامۋ جەلىسىنىڭ تۇراقتى وكىلى قوزيداۆلات كويمدودوۆتىڭ قاتىسۋىمەن ءوتتى.
«وقۋلىقتاردا سىني تۇرعىدان ويلاۋدى دامىتۋعا ىقپال ەتەتىن ءتىل ۇيرەنۋدىڭ زاماناۋي ادىستەرى، اتاپ ايتقاندا، وقۋشىعا باعدارلانعان وقىتۋ، كوممۋنيكاتيۆتى وقىتۋ جانە جاتتىعۋلارعا نەگىزدەلگەن وقىتۋ قولدانىلادى»، - دەدى اقش ەلشىلىگى.
قازىرگى تاڭدا 8-9 سىنىپتارعا ارنالعان 350 مىڭنان استام اعىلشىن ءتىلى وقۋلىقتارىن تاجىكستانعا بەرۋ بويىنشا جۇمىستار جۇرگىزىلىپ جاتىر.
ايتا كەتەيىك، بۇعان دەيىن تاجىكستان پرەزيدەنتى ەمومالي راحمون ورىس جانە اعىلشىن تىلدەرىن وقىتۋدى جاقسارتۋ قاجەتتىگىن مالىمدەگەن ەدى. مەملەكەت باسشىسى 2023 جىلدى ورىس ءتىلىنىڭ جىلى دەپ جاريالادى.
