ەندى ەركىن اۋىلدىق وكرۋگىنىڭ حالقى ساپالى ەم قابىلداۋ ءۇشىن قالا ورتالىعىنا سابىلمايتىن بولدى. عيماراتتى سالۋعا جەرگىلىكتى بيۋدجەتتەن 378 ملن تەڭگە جۇمسالعان.
جەرگىلىكتى تۇرعىندار ەمدەۋ مەكەمەسىنىڭ قاجەتتىگى تۋرالى الماتى وبلىسى اكىمى اماندىق باتالوۆتىڭ بىلتىرعى ەسەپ بەرۋ جيىنىندا ايتقان ەدى. سوعان سايكەس قۇرىلىس جۇمىستارى قولعا الىنىپ، ءبىر جىلدا ەسكى عيماراتتىڭ ورنىنا جاڭاسى تۇرعىزىلدى. ەل يگىلىگىنە بەرىلگەن مەكەمەدە العاش رەت ەكپە ەگىلە باستادى.
بۇرىڭعى امبۋلاتوريا 1954 جىلى سالىنىپتى. اۋماعى 400 شارشى مەتر بولاتىن. ال، قازىرگىسى ودان ءۇش ەسەگە ۇلكەن. زاماناۋي تەحنيكامەن جابدىقتالعان مەكەمەدە 42 مامان جۇمىس ىستەيدى.
مەكەمەدە بالالاردى دامىتۋ، ماسساج، فيزيوتەراپيا، ستوماتولوگيا سىندى بىرنەشە ءبولىم جاڭادان اشىلدى. ارنايى ۋلترا دىبىستىق زەرتتەۋ قۇرىلىعىسى قويىلىپ وتىر. جۇكتى ايەلدەر ءۇشىن دە جاعداي جاسالعان.
جالپى وڭىردە وتكەن جىلى 8 دارىگەرلىك امبۋلاتوريا جانە 1 مەدتسينالىق پۋنكت ءوز جۇمىسىن باستاعان. ەندى «جۇمىسپەن قامتۋ – جول كارتاسى» باعدارلاماسى اياسىندا الداعى ۋاقىتتا تاعى جامبىل، قاراساي اۋداندارىندا ەكى دارىگەرلىك امبۋلاتوريا اشىلادى، سونىمەن قاتار شالعاي اۋىلداردا جيىرما مودۋلدى مەديتسينالىق پۋنكت پايدالانۋعا بەرىلمەك.
