ۇكىمەت وتىرىسىندا دەنساۋلىق ساقتاۋ ۆيتسە-ءمينيسترى تيمۋر مۇراتوۆ حالىقتى دارىلىك زاتتارمەن قامتاماسىز ەتۋ تۋرالى بايانداما جاسادى، دەپ حابارلايدى "ادىرنا" ۇلتتىق پورتالى ۇكىمەتتىڭ ءباسپاسوز قىزمەتىنە سىلتەپ.
ونىڭ ايتۋىنشا، 2025 جىلدىڭ 10 ايىندا 3 ميلليوننان استام پاتسيەنتكە 219,7 ملرد تەڭگەگە تەگىن ءدارى-دارمەك بەرىلدى. مەديتسينالىق ۇيىمداردى ۇزدىكسىز جابدىقتاۋ ءۇشىن بىرىڭعاي ديستريبيۋتور 21 ملرد تەڭگەگە تومەندەتىلمەيتىن ءدارى-دارمەك قورىن قۇرعان. بۇل قور ونكولوگيا، قانت ديابەتى جانە باسقا دا ماڭىزدى اۋرۋ تۇرلەرىن ەمدەۋگە ارنالعان نەگىزگى پرەپاراتتاردى قامتيدى.
«سوزىلمالى اۋرۋلاردىڭ ءبىر بولىگىن تمككك پاكەتىنەن ءمامس-كە اۋىستىرۋعا قاراماستان، بارلىق مەملەكەتتىك كەپىلدىكتەر تولىق ساقتالادى. قارجىلاندىرۋ كولەمى وزگەرمەيدى، تەك كوزى وزگەرەدى. قانت ديابەتى، رەۆماتويدتى ارتريت، تسەرەبرالدى سال اۋرۋى جانە باسقا دا سوزىلمالى اۋرۋلارى بار ناۋقاستار قاجەتتى دارىلەردى تولىق كولەمدە الۋدى جالعاستىرادى»، – دەدى تيمۋر مۇراتوۆ.
سوڭعى بەس جىلدا امبۋلاتوريالىق ءدارى-دارمەكپەن قامتاماسىز ەتۋگە بولىنگەن قارجى 115 ملرد تەڭگەدەن 262 ملرد تەڭگەگە دەيىن ارتقان. بۇگىندە قازاقستان حالقىن تەگىن ءدارى-دارمەكپەن قامتاماسىز ەتۋ دەڭگەيى جوعارى ەلدەردىڭ قاتارىنا كىرەدى — جان باسىنا شاققاندا 50 اقش دوللارىنان اسادى.
مينيسترلىكتىڭ مالىمەتىنشە، گەنەريكالىق دارىلەردىڭ باعاسى تۇپنۇسقالارعا قاراعاندا 30%-عا تومەندەدى. بۇل شارا ءدارى-دارمەكتەردىڭ ورتاشا باعاسىن 2025 جىلدىڭ قازان ايىندا 11%-عا ارزانداتتى. ال بىرىڭعاي ديستريبيۋتوردىڭ ءتيىمدى ساتىپ الۋ ناتيجەسىندە 70,5 ملرد تەڭگە ۇنەمدەلىپ، قوسىمشا دارىلەر ساتىپ الۋعا باعىتتالعان.
سونداي-اق نارىقتاعى اشىقتىقتى ارتتىرۋ ءۇشىن ءدارى-دارمەكتەردى تاڭبالاۋ جانە قاداعالاۋ جۇيەسى ەنگىزىلگەن، بۇل سالىق تۇسىمدەرىنىڭ 24%-عا وسۋىنە ىقپال ەتتى.
دەنساۋلىق ساقتاۋ مينيسترلىگى تسيفرلاندىرۋ باعىتىن كۇشەيتۋدە: ەلەكتروندىق رەتسەپت جۇيەسى ەنگىزىلىپ، ونى راسىمدەۋ ۋاقىتى ەكى ەسەگە قىسقارعان. الداعى ۋاقىتتا جاساندى ينتەللەكت ءدارى-دارمەك قاجەتتىلىگىن بولجاۋعا جانە جالعان رەتسەپتتەردى انىقتاۋعا قولدانىلماق.
قازىرگى تاڭدا قازاقستاندا 20 476 دارىلىك زات پەن مەديتسينالىق بۇيىم تىركەلگەن، ونىڭ 15%-دان استامى — وتاندىق ءونىم. دۇنيەجۇزىلىك دەنساۋلىق ساقتاۋ ۇيىمىنىڭ ومىرلىك ماڭىزدى دارىلەر تىزىمىندە قازاقستاندىق پرەپاراتتاردىڭ ۇلەسى 37%-دى قۇرايدى.
اۋىلدىق ايماقتاردا ءدارى-دارمەككە قولجەتىمدىلىكتى ارتتىرۋ ءۇشىن 10 مىڭنان استام ءدارىحانا جۇمىس ىستەيدى، ونىڭ 2700-ءى اۋىلدىق جەرلەردە ورنالاسقان. بۇعان قوسا، شالعاي ايماقتاردا 11 جىلجىمالى ءدارىحانا پۋنكتى قىزمەت كورسەتەدى.
پرەمەر-مينيستر ولجاس بەكتەنوۆ ءوز سوزىندە ءدارى-دارمەكتەر مەن مەديتسينالىق بۇيىمداردى تىركەۋدىڭ جەڭىلدەتىلگەن ءتارتىبى ەنگىزىلگەنىن اتاپ ءوتتى. ەندى جاڭا پرەپاراتتى تىركەۋ مەرزىمى بۇرىنعى 2-5 جىل ورنىنا نەبارى 100 جۇمىس كۇنىنە دەيىن قىسقارتىلعان.
ۇكىمەت باسشىسى بولشەك ساۋدا نارىعىندا ءدارى-دارمەك باعاسىنىڭ نەگىزسىز وسۋىنە جول بەرمەۋ جونىندە ناقتى شارالار قابىلداۋدى تاپسىردى.
