پاۆلودار قالاسىندا ءبىر كۇندە 23 كوشەنىڭ اتاۋىن قازاقشالاۋ تۋرالى شەشىم قابىلدادى. بۇل بۇرىن-سوڭدى بولماعان ۇلكەن وقيعا. جەرگىلىكتى حالىق مۇنى بوركىن اسپانعا اتىپ، زور قۋانىشپەن قابىلداپ وتىر. ويتكەنى ستاتيستيكاعا سۇيەنسەك پاۆلودار قالاسىنداعى 335 كوشەنىڭ 62-ءسى عانا قازاق تىلىندە. سوندىقتان بۇل وناماستيكا توڭىرەگىندەگى ايتۋلى قادام بولدى.
بۇگىن پاۆلودار قالالىق ءماسليحاتىنىڭ كەزەكتەن تىس سەسسياسى ءوتىپ اتالعان 23 كوشەنىڭ اتاۋىن اۋىستىرۋدى دەپۋتاتتار 100 پايىز قولدادى.
ەسكە سالا كەتسەك، جاقىندا وسىعان وراي، ياعني يدەولوگيالىق تۇرعىدان ەسكىرگەن كوشە اتاۋلارىن وزگەرتۋ بويىنشا قوعامدىق تىڭداۋ وتكەن بولاتىن. جەرگىلىكتى قوعام بەلسەندىلەرى مەن زيالى قاۋىم تاراپىنان ۇسىنىلعان 30 كوشەنىڭ 23-ءى قالالىق ءماسليحات دەپۋتاتتارىنىڭ قولداۋىنا يە بولدى.
جوعارىدا ايتقانىمىزداي، كوشە اتاۋلارىنىڭ قازاقىلانۋىن قولداعاندار كوپ. سولاردىڭ ءبىرى قر ەڭبەك سىڭىرگەن قايراتكەرى، وبلىستىق ا.پ. چەحوۆ اتىنداعى دراما تەارىنىڭ باسشىسى ۆيكتور اۆۆاكۋموۆ.
«مەن قوعامدىق دامۋدى قولدايمىن. ۋاقىت تالابىنا ساي كوشەلەر مەن ەلدى-مەكەندەردىڭ اتاۋىن وزگەرتۋ ورىندى دەپ ەسەپتەيمىن. ەموتسياعا سالىنىپ، قارسىلىق بىلدىرەتىندەر دە بار. بۇل زاڭدى قۇبىلىس. كەز كەلگەن ماسەلەگە كومپروميسس تابۋعا بولادى. وسى ەلدەگى ازامات رەتىندە مەن بۇل پروتسەسسكە قارسى ەمەسپىن. وزگەرۋ كەرەك، ءارى قاراي دامۋ كەرەك»،- دەپ اتاپ ءوتتى تەاتر باسشىسى.
بۇدان بولەك، قر ەڭبەك سىڭىرگەن قايراتكەرى، اقىن ارمان قاني جەرگىلىكتى باسشىلاردى الەۋمەتتىك جەلىدەگى فەيكتەرگە جالتاقتاماۋعا شاقىردى.
«مەنىڭشە، فەيكتەردىڭ اۆتورلارى پاۆلوداردان ەمەس. ءتىپتى، وزگە وڭىرلەردەن نەمەسە باسقا مەملەكەتتەن بولۋى دا مۇمكىن. بىراق، ءبىز ولاردى ەسكەرمەۋىمىز كەرەك. پاۆلوداردا 335 كوشەنىڭ 62-ءسى عانا قازاق تىلىندە. بۇل ونوماستيكا سالاسىناداعى تۇيتكىلدى ماسلەلەردىڭ بار ەكەنىن كورسەتەدى. ولاردى شەشۋ ءۇشىن پاتشالىق، كەڭەستىك تۇسىنىكتەگى توپتارعا قارسى جۇمىس جاساۋ كەرەك. مەن باسقا امالىن كورىپ تۇرعان جوقپىن. وسى جولدا پرەزيدەنت ق.توقاەۆتىڭ «تاۋەلسىزدىك بارىنەن قىمبات» اتتى ماقالاسىن نەگىزگە الۋ كەرەك دەگەن ويدامىن»، - دەدى اقىن ارمان قاني.
سونىمەن وزگەرگەن كوشەلەر ءتىزىمى:
- مير كوشەسى - ولجاباي باتىر،
- ەرماكوۆ كوشەسى - مۇستافا شوقاي،
- نابەرەجنايا - شون بي،
- ۋريتسكي كوشەسى - گەنەرال (ۇكىمەت) سماعۇلوۆ،
- تسيولكوۆسكي كوشەسى - باۋىرجان مومىشۇلى،
- روزا ليۋكسەمبۋرگ كوشەسى - قازاق راديوسى،
- تەپلوۆ كوشەسى - بوگەنباي باتىر،
- 1-يا يۋجنايا كوشەسى - بىرلىك،
- 2-يا يۋجنايا كوشەسى - كاۋكەن كەنجەتاەۆ،
- پاركوۆايا كوشەسى - مۇقاعالي ماقاتاەۆ،
- دونەتسكايا كوشەسى - ماعجان جۇماباەۆ،
- كۋبانسكايا كوشەسى -قالمۇقان يساباەۆ،
- سوۆحوزنايا كوشەسى - رافيعا نۇرتازينا،
- تاگانروكسكايا كوشەسى - قازانعاپ بي،
- انگارسكايا كوشەسى -ناعىمبەك نۇرمۇحاممەدوۆ،
- چيتينسكايا كوشەسى - امانجول شامكەنوۆ،
- دەكابريستوۆ كوشەسى - قامار قاسىموۆ،
- مولودەجنايا كوشەسى - جاستار كوشەسى،
- يۋنناتوۆ كوشەسى -ديحان ءابىلوۆ،
- 1-يا سوۆەتوۆ كوشەسى، 2-يا سوۆەتوۆ كوشەسى - گەنەرال باكىروۆ،
- زىريانوۆسكايا كوشەسى - قابدىكارىم ىدىرىسوۆ،
- سايانسكايا كوشەسى - الما اجيباەۆا،
- لەسنايا كوشەسى - اعايىندى دۇيسەمبينوۆتەربولىپ قايتا اتالاتىن بولدى.
ەركەبۇلان اسقاروۆ،
"ادىرنا" ۇلتتىق پورتالى
(سۋرەتتەر عالامتوردان، اشىق دەرەككوزدەردەن الىندى)
