"مۇسىلمانداردى باتىس قىرىپ جاتىر" دەگەندى ءجيى ەستيمىز. بىراق تەك باتىس قانا ما؟ سوڭعى 20 جىلدىقتا مۇسىلماندارعا ساۋد ارابياسى، كاتار، ءباا، يران سياقتى قىرعىن سالعاندار از-اۋ.
اسىرەسە ساۋديا. تاياۋ شىعىستاعى كوپتەگەن تەررورلىق توپتاردى قارجىلاندىرادى، ليۆياداعى سوعىسقا تىكەلەي قاتىسىپ، كاددافي جاساعىن تالقانداۋعا جانە ءوزىن ولتىرۋگە بارىن سالدى. يراك، سيريا سوعىسىندا سودىرلاردى قارجىلاندىرىپ كەلەدى. سوڭعى 7 جىلدا كورشى يەمەنگە باسىپ كىرىپ، ونداعان مىڭ بالانى، كەمپىر-شالدى ءولتىردى. 5 ملن يەمەندىك اشتان ولەيىن دەپ وتىر. سيريادان بىردە-ءبىر بوسقىندى قابىلدامادى، كومەككە قارجى بولمەدى. ءۇش اراب ەلى مەن ءبىر پارسى ەلى تاياۋ شىعىستا ناعىز ءدىني قاقتىعىستاردى جاساۋدا. ميلليوندار ءولدى، ونداعان ميلليوندار بوسىپ كەتتى. بىرەۋى اقش پەن باتىستىڭ قارۋىن قۋانا ساتىپ الادى، ەندى ءبىرى قىتاي مەن رەسەيدىڭ قارۋىن قۇشاقتاپ وتىر. ءبىر قىزىعى بۇل تورتەۋىنىڭ تەرريتورياسىندا سوڭعى 20 جىلدىقتا سوعىس بولعان ەمەس. ءوز سوعىستارىن وزگەلەردىڭ ايماعىندا جۇرگىزەدى.
شىندىعىنا كەلگەندە وسى تورتەۋىنىڭ مۇسىلماندارعا تۇكىرگەنى بار. بۇلاردىڭ "مۇسىلمان مۇسىلمانعا باۋىر، ءبىر-ءبىرىن قولداۋى، قورعاۋى ءتيىس" دەپ كۇندە ۇراندايتىن، حالقى سوعان شىنايى سەنەتىن سوزدەرى پارتيالاردىڭ سايلاۋالدى ناۋقانىنداعى ۋادەلەرى سياقتى. ورىندالمايدى، قۇر ءسوز. تاياۋ شىعىستاعى ءدىننىڭ ساياسيلانىپ كەتكەنى سونشالىق، وندا "ادام ءومىرىنىڭ قۇنى", "جازىقسىز ءبىر ادامدى ءولتىرۋ - كۇللى الەمدى ولتىرۋمەن تەڭ" دەگەن يسلامنىڭ ەڭ كەرەمەت ناسيحاتىنىڭ جۇرناعى دا قالمادى. سوعان قاراماستان بىزدەگى ءبىراز ادام بۇلارعا نەگە سونشا سەنەدى؟ كەيدە ماعان شىنايى يسلام ءبىر-ءبىرىن قىرىپ جاتقان ارابتىڭ قۇمىندا ەمەس، كيە، وبال، ساۋاپ، كەساپات دەگەندى ءالى ۇمىتپاعان، بىلەتىن تۇركىنىڭ دالاسىندا عانا قالعانداي كورىنەدى. مۇمكىن قاتەلەسەرمىن.
اسحات قاسەنعالي
"ادىرنا" ۇلتتىق پورتالى
