ۋكراينا پرەزيدەنتى ۆلاديمير زەلەنسكي رەسەي پرەزيدەنتى ۆلاديمير ءپۋتيننىڭ تىكەلەي كەزدەسۋ وتكىزۋ تۋرالى ۇسىنىسىنا بەرگەن جاۋابىن ء«السىز» دەپ اتادى، دەپ حابارلايدى "ادىرنا" ۇلتتىق پورتالى DW-عا سىلتەپ.
ونىڭ پىكىرىنشە، ءپۋتيننىڭ كەزدەسۋدەن باس تارتۋى رەسەيدىڭ سوعىستى توقتاتۋعا نيەتتى ەمەس ەكەنىن كورسەتەدى. ۆلاديمير زەلەنسكي ءداستۇرلى كەشكى ۆيدەوۇندەۋىندە رەسەي تاراپىنىڭ تاعى دا سوعىس جولىن تاڭداعانىن مالىمدەدى.
«وكىنىشكە قاراي، رەسەي تاراپى تاعى دا سوعىستى تاڭدادى. بۇگىنگى جاۋاپتى ءبارى ەستىدى. بۇل – ءالسىز جاۋاپ. ول سوعىستى اياقتاعىسى كەلمەيدى»، – دەدى ۋكراينا پرەزيدەنتى.
زەلەنسكيدىڭ ايتۋىنشا، ءپۋتيننىڭ بۇل ۇستانىمى الەمدەگى كوپتەگەن ادامداردىڭ كوڭىلىن قالدىرعان. سونداي-اق ول رەسەي باسشىسى جاعدايدى وزگەرتكىسى كەلمەيتىنىن جانە سوعىستىڭ تەك وزىنە ءارى ونىڭ اينالاسىنداعى ادامدارعا عانا ءتيىمدى ەكەنىن مويىنداعىسى كەلمەيتىنىن ايتتى.
«دەمەك، رەسەيدىڭ قارجىسى ازايىپ، وعان جاسالاتىن قىسىم كۇشەيۋى كەرەك»، – دەدى زەلەنسكي.
بۇعان دەيىن سانكت-پەتەربۋرگ حالىقارالىق ەكونوميكالىق فورۋمىندا سويلەگەن ۆلاديمير پۋتين ازىرگە زەلەنسكيمەن كەزدەسۋدىڭ ءمانىن كورمەيتىنىن مالىمدەگەن. ونىڭ سوزىنشە، جوعارى دەڭگەيدەگى كەزدەسۋ ناقتى كەلىسىمدەر ازىرلەنگەننەن كەيىن عانا ناتيجە بەرە الادى.
