اتىراۋدا ءبىر وتباسىنىڭ جوعالىپ كەتۋىنە قاتىستى ءىس بويىنشا جەلىدە پىكىر ءبىلدىرىپ جۇرگەن ازامات تۇركيا اۋماعىندا ۇستالدى، دەپ حابارلايدى "ادىرنا" ۇلتتىق پورتالى.
ءىىم مالىمەتىنشە، 32 جاستاعى ەر ادام ينتەرپولدىڭ كومەگىمەن حالىقارالىق ىزدەۋ بارىسىندا قولعا تۇسكەن. قازىرگى ۋاقىتتا ونى قازاقستانعا ەكستراديتسيالاۋ ماسەلەسى قاراستىرىلىپ جاتىر.
جەلىدە «اتىراۋلىق حاكەر» دەگەن اتپەن تانىلعان ازامات بۇعان دەيىن اتىراۋداعى وتباسىنىڭ جوعالۋىنا قاتىستى ءتۇرلى بولجامدارىن جاريالاپ، ىقتيمال كۇدىكتىلەردىڭ ەسىمدەرىن دە اتاعان. ونىڭ جازبالارى قوعامدا قىزۋ تالقىلانىپ، كوپشىلىكتىڭ نازارىن اۋدارعان ەدى.
الايدا قۇقىق قورعاۋ ورگاندارى ونىڭ ۇستالۋىنا الەۋمەتتىك جەلىدەگى جاريالانىمدارىنىڭ قاتىسى جوق ەكەنىن مالىمدەدى. رەسمي اقپاراتقا سايكەس، كۇدىكتىگە قاتىستى بىرنەشە الاياقتىق دەرەگى بويىنشا قىلمىستىق ىستەر قوزعالعان. سوت شەشىمىمەن وعان سىرتتاي قاماۋعا الۋ تۇرىندەگى بۇلتارتپاۋ شاراسى سانكتسيالانعان.
سونداي-اق ۆەدومستۆولار الاياقتىققا قاتىستى قىلمىستىق ءىستىڭ اتىراۋ وبلىسىنداعى وتباسىنىڭ جوعالۋى مەن قازا بولۋىنا بايلانىستى تەرگەۋمەن ەشقانداي بايلانىسى جوق ەكەنىن اتاپ ءوتتى.
