سولتۇستىكتە ولشانكا اۋىلىنىڭ تۇرعىندارى اۋىلعا اپاراتىن جولدىڭ ناشارلىعىنا بايلانىستى ونى ءوز كۇشتەرىمەن جوندەۋگە كىرىستى، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
تۇرعىندار قۇرىلىس كومپانيالارىن كۇتپەي، قولدارىنا كۇرەك الىپ، جولداعى ويىقتارعا قيىرشىق تاس توسەپ، كەي جەرلەرىن توپىراقپەن تەگىستەگەن. اۋىل تۇرعىنى اناتولي درانكونىڭ ايتۋىنشا، بىرنەشە بريگادا قۇرىلىپ، اركىم ءوز تەحنيكاسىمەن جانە كۇشىمەن كومەكتەسكەن.
ء“تورت بريگادا قۇردىق. كىمدە قانداي تەحنيكا بار، سونى شىعاردى. كەيبىرى كۇرەك الىپ شىقتى. ءۇش شاقىرىم جولعا قيىرشىق تاس توسەدىك، تاعى ءبىر شاقىرىمىن توپىراقپەن تەگىستەدىك. وسىلايشا اۋىلعا اپاراتىن جولدىڭ جارتىسىن جوندەپ شىقتىق”، – دەدى ول.
اۋىل تۇرعىندارىنىڭ ايتۋىنشا، جولدىڭ توزۋى جەدەل جاردەم مەن قوعامدىق كولىكتىڭ قاتىناۋىنا كەدەرگى كەلتىرىپ وتىر.
پەتروپاۆلدان شامامەن 30 شاقىرىم جەردە ورنالاسقان ولشانكا اۋىلىنا اپاراتىن جولدىڭ قاشان جوندەلەتىنى ازىرگە بەلگىسىز. جاۋاپتى ورگاندار ناقتى مەرزىمدى اتاعان جوق.
تۇرعىندار جولدىڭ قازىرگى جاعدايىن كورسەتەتىن فوتو جانە بەينەماتەريالداردى وبلىس اكىمىنە جولداۋدى جوسپارلاپ وتىر. ولاردىڭ ايتۋىنشا، اۋداندىق دەڭگەيدە ماسەلەنىڭ شەشىلۋىن ۇزاق كۇتكەنمەن، ناتيجە بولماعان.
