"Musylmandardy batys qyryp jatyr" degendi jıi estımiz. Biraq tek batys qana ma? Sońǵy 20 jyldyqta musylmandarǵa Saýd Arabııasy, Katar, BAÁ, Iran sııaqty qyrǵyn salǵandar az-aý.
Ásirese Saýdııa. Taıaý Shyǵystaǵy kóptegen terrorlyq toptardy qarjylandyrady, Lıvııadaǵy soǵysqa tikeleı qatysyp, Kaddafı jasaǵyn talqandaýǵa jáne ózin óltirýge baryn saldy. Irak, Sırııa soǵysynda sodyrlardy qarjylandyryp keledi. Sońǵy 7 jylda kórshi Iemenge basyp kirip, ondaǵan myń balany, kempir-shaldy óltirdi. 5 mln ıemendik ashtan óleıin dep otyr. Sırııadan birde-bir bosqyndy qabyldamady, kómekke qarjy bólmedi. Úsh arab eli men bir parsy eli Taıaý Shyǵysta naǵyz dinı qaqtyǵystardy jasaýda. Mıllıondar óldi, ondaǵan mıllıondar bosyp ketti. Bireýi AQSh pen Batystyń qarýyn qýana satyp alady, endi biri Qytaı men Reseıdiń qarýyn qushaqtap otyr. Bir qyzyǵy bul tórteýiniń terrıtorııasynda sońǵy 20 jyldyqta soǵys bolǵan emes. Óz soǵystaryn ózgelerdiń aımaǵynda júrgizedi.
Shyndyǵyna kelgende osy tórteýiniń musylmandarǵa túkirgeni bar. Bulardyń "musylman musylmanǵa baýyr, bir-birin qoldaýy, qorǵaýy tıis" dep kúnde urandaıtyn, halqy soǵan shynaıy senetin sózderi partııalardyń saılaýaldy naýqanyndaǵy ýádeleri sııaqty. Oryndalmaıdy, qur sóz. Taıaý Shyǵystaǵy dinniń saıasılanyp ketkeni sonshalyq, onda "adam ómiriniń quny", "jazyqsyz bir adamdy óltirý - kúlli álemdi óltirýmen teń" degen Islamnyń eń keremet nasıhatynyń jurnaǵy da qalmady. Soǵan qaramastan bizdegi biraz adam bularǵa nege sonsha senedi? Keıde maǵan shynaıy Islam bir-birin qyryp jatqan arabtyń qumynda emes, kıe, obal, saýap, kesapat degendi áli umytpaǵan, biletin túrkiniń dalasynda ǵana qalǵandaı kórinedi. Múmkin qatelesermin.
Ashat QASENǴALI
"Adyrna" ulttyq portaly
