بيلىككە قارسى شىقساڭ، دىنگە سەنسەڭ – دىمسىز قالاسىڭ

3944
Adyrna.kz Telegram

2021 جىلدىڭ 1-قاڭتارىنان باستاپ قىتايدا جاڭا «ازاماتتىق كودەكس» كۇشىنە ەندى دەپ جازادى «ادىرنا» ۇلتتىق پورتالى Facebook-تاعى كيگىز كىتاپ توبىنا سىلتەمە جاساپ. 1260 باپ پەن قاتاڭ ەرەجەدەن تۇراتىن بۇل كودەكس جەكە تۇلعانى ءجىتى باقىلاۋعا الىپ، ول تۋرالى اقپاراتتى جيناپ، ساراپتاۋ ارقىلى ءاربىر ازاماتتىڭ ءومىر ءسۇرۋ مۇمكىنشىلىگىن رەتتەيتىن بولادى.

قاراپايىم تىلمەن ايتقاندا، بۇدان بىلايعى جەردە بيلىككە جاقپايتىن جەكە ادامنىڭ كۇنى - كۇن ەمەس..، ال، ۇكىمەت پەن پارتيانىڭ سويىلىن سوققاندارعا جەڭىلدىكتەر بار دەپ جازادى توپتىڭ مودەراتورى.

جوعارى بالل الۋ جولدارى:

- قايىرىمدىلىق شارالارىنا قاتىسۋ;

- وتباسىنداعى كارى كىسىلەرگە قامقور بولۋ;

- كورشىمەن تاتۋ تۇرۋ;

- قان ورتالىعىنا تۇراقتى تۇردە قان وتكىزىپ تۇرۋ;

- الەۋمەتتىك جەلىدە ۇكىمەت ساياساتىن قولداپ وتىرۋ;

- كەدەيلەرگە كومەك كورسەتۋ;

- قارجى نەسيەلىك تاريحى دۇرىس بولۋ;

- ەرلىك ءىس جاساۋعا دايىن تۇرۋ جانە ت.ب.

الەۋمەتتىك جوعارعى دەڭگەيگە يە بولعاندار: جۇمىسقا تۇرۋعا، بالاسى مەكتەپكە قابىلدانۋعا جەڭىلدىككە يە بولادى. سونداي-اق، بانكتەن نەسيە راسىمدەۋگە; جەڭىل ماشينەنى ارزانعا نەمەسە تەگىن جالداۋعا; ارزان جانە تەگىن سپورت زالىنا بارۋعا; ارزانداتىلعان جول ءجۇرۋ بيلەتىن الۋعا; ەمحانا مەن اۋرۋحانا كەزەگىن جاقىنداتۋعا; قىزمەت بابىندا تەزىرەك وسۋگە; مەملەكەتتىك باسپاناعا ەرتەرەك قول جەتكىزۋگە جانە سالىقتى ازايتۋ قۇقىعىنا يە بولادى.

ال، ەندى مىناداي ءىس قىلعان ادامداردىڭ الەۋمەتتىك بالل كورسەتكىشى تومەندەيدى. ولار:

- جول ەرەجەسىن بۇزۋشىلار (كولىككە ماس كۇيىندە وتىرۋدان باستاپ، جاياۋ جۇرگىنشى وتەتىن جەرمەن وتپەگەن ادامدار دا);

- ۇكىمەتكە قارسى شەرۋگە شىققاندار;

- كارى اتا-اناسىنا دۇرىس قاراماعاندار;

- الەۋمەتتىك جەلىدە بيلىككە نارازى جازبا قالدىرعاندار;

- ينتەرنەتتە جالعان اقپارات تاراتۋ جانە فەيك اككاۋنت قولدانۋشىلار;

- كىناسى ءۇشىن شىنايى كەشىرىم سۇراماۋ;

- ءدىني اعىم قاتارىندا بولۋ;

- ونلاين ويىندارىندا الاياقتىق جاساۋ جانە ت.ب.

الەۋمەتتىك تومەنگى كورسەتكىش يەلەرى كوپتەگەن جەڭىلدىكتەردەن قاعىلادى. ماسەلەن، اۋە قاتىناسى مەن جەدەل پويىزدارعا بيلەت برونداۋ; بانكتەن نەسيە راسىمدەۋ; مەملەكەتتىك بارلىق قىزمەت كورسەتۋ تۇرلەرىنە شەكتەۋ; مەملەكەتتىك قىزمەتتەن شەتتەتىلۋ; جەكەمەنشىك ءبىلىم الۋ مۇمكىندىگىنەن الاستاتىلۋ; كوپشىلىك الدىندا تالكەككە ۇشىراۋ جانە مازاق ەتىلۋ; تومەنگى سورتتى ادامداردىڭ تۋىستارى مەن جورا-جولداستارىنىڭ ءتىزىمىن جاريالاۋ سەكىلدى باسقا دا ارتى جاقسىلىققا سوقتىرمايتىن قيىندىقتارعا الىپ كەلەدى.

اتالمىش "الەۋمەتتىك سەنىم جۇيەسى" قىتايدا بۇرىننان قولدانىلا باستاعان تاجىريبە ەدى. اۋەلدە شاعىن ورتادا ىسكە قوسىلعان بۇل شەكتەۋ بيىلدان باستاپ بۇكىل قىتاي ەلى اۋماعىندا زاڭدى كۇشىنە ەندى!

 

پىكىرلەر