سوڭعى كەزدەرى قوعامدا ءدىني ماسەلە قىزۋ تالقىلانىپ جاتىر. تامىزدىڭ بەل ورتاسىندا باستالعان داۋ ماجىلىسمەندەردىڭ دەپۋتاتتىق ساۋال جولداۋىنا ۇلاستى.
Cاياساتتانۋشى جانات مومىنقۇلوۆ cوڭعى كەزدەرى قوعامدا ءدىني تارتىستى ادەيى ۇيىمداستىرىپ وتىرۋى مۇمكىن دەگەن بولجامىن ايتادى. ءدىني داۋدىڭ ورشۋىنە بيلىك مۇددەلى مە، جوق الدە بەلگىلىءبىر توپ پا؟ بىزگە ەكونوميكالىق-الەۋمەتتىك جاعدايدى تالقىلاماي ءوزارا ءدىني ماسەلە بويىنشا داۋلاسۋ كىمگە ءتيىمدى؟
وسى جانە وزگە سۇراقتى مادەنيەت جانە اقپارات ءمينيسترى ايدا بالاەۆاعا قويعان ەدىك.
ايدا عالىمقىزى ءدىني داۋ قازىرگى زاماننىڭ ەرەكشەلىگىنە بايلانىستى ەكەنىن ەسكەرتتى. سەبەبى ول الەۋمەتتىك جەلىدە ءار ازامات ءوز ويىن جازىپ، سۇحباتتارىندا ءوز پىكىرىن جەتكىزەتىنىن تىلگە تيەك ەتتى.
- بۇل مۇمكىندىك اتا زاڭمەن بەلگىلەنگەن. ويتكەنى ادامنىڭ ءسوز جانە وي بوستاندىعى اتا زاڭدا جازىلعان. سوندىقتان بۇل الەۋمەتتىك جەلىنىڭ ىقپالى دەپ ويلايمىن. ال ەندى ونى ارنايى مەملەكەت تاراپىنان ۇيىمداستىرۋشىلىق جوق. ويتكەنى ءبىز وسى ەلدىڭ تۇراقتىلىعىن ساقتاپ، ونىڭ دامۋىنا مۇددەلىمىز. ال «باسقا ۇيىمدار ادەيى ۇيىمداستىرىپ جاتىر ما؟» دەگەن سۇراققا جاۋاپ بەرۋ مەنىڭ قۇزىرەتىمدەگى جۇمىس ەمەس. ونى مەن انىقتاي المايمىن. قازىرگى تاڭداعى ءۇردىس بىرەۋدىڭ پىكىرىن جان-جاقتى سارالاماي قاتتى تالقىلاپ، ءوزىمىز ويدان شىعارعان پىكىرلەردى ءبىلدىرىپ جاتامىز. مەنىڭ ويىمشا, ول دۇرىس ەمەس. جالپى ءدىن ماسەلەسى وتە نازىك سالا عوي. ول ەڭ الدىمەن ادامنىڭ نانىم، سەنىمىنە بايلانىستى دۇنيە. مەنىڭ ويىمشا، ءار ءدىن، ول يسلام بولسىن، حريستيان بولسىن، ەڭ ءبىرىنشى ىزگىلىك پەن مەيرىمدىلىكتى ناسيحاتتايدى. وكىنىشكە قاراي, قازىر ءدىن ماسەلەسى كوبىنەسە اگرەسسيالىق تۇردە تالقىلانىپ كەتتى. وعان ءبىز جول بەرمەۋىمىز كەرەك. بۇل رەتتە اقپارات قۇرالدارىنىڭ ءرولى جوعارى. سوندىقتان ءبىز سىزدەرمەن وسى سالادا اگرەسسيانى بىلدىرتپەي، قوعامنىڭ ساۋاتتىلىعىن ارتتىرۋ ءۇشىن بىرگە اتسالىسۋىمىز كەرەك. ويتكەنى ماسەلە دىندارلىقتان ەمەس، ءدىن سالاسىنداعى ساۋاتسىزدىقتان بولىپ جاتىر, – دەدى ول.
ءماجىلىس دەپۋتاتتارىنىڭ باستاماسىنان كەيىن پارلامەنت دىنگە بايلانىستى ارنايى زاڭ قابىلدانۋى مۇمكىن.
مينيسترگە «الدا قابىلداناتىن زاڭ ءدىن سالاسىنداعى تۇيتكىلدى ماسەلەنى شەشە الا ما؟ مىسالى اسىرەدىنشىل ازاماتتار تەرراكتى جاساۋعا ۇمتىلماي ما؟ مۇنداي قاۋىپ-قاتەر ەسكەرىلگەن بە؟» دەگەن سۇراق قويىلدى.
- جالپى ءار ءبىر زاڭ نەمەسە نورماتيۆتىك قۇجات بولسىن، ونىڭ سالدارى مىندەتتى تۇردە ەسكەرىلۋ كەرەك. سوندىقتان زاڭ جوباسىن بارلىق ساناتتاعى ازاماتتارمەن جان-جاقتى تالقىلانۋى كەرەك. مەن ونى بىرنەشە رەت ايتتىم. ءدىن ماسەلەسىن دەپۋتاتتار كوتەرىپ جاتىر عوي. ول كىسىلەردىڭ باستاماسى بويىنشا ءبىز ساراپشىلارمەن تالقىلاۋ جۇرگىزەمىز, – دەدى ايدا عالىمقىزى.
سەرىك جولداسباي
«ادىرنا» ۇلتتىق پورتالى
