مەملەكەت باسشىسى قاسىم-جومارت توقاەۆپەن تەلەفون ارقىلى سويلەسۋ بارىسىندا شىمكەنت قالاسىنىڭ اكىمى مۇرات ايتەنوۆ قالاداعى ەپيدەميولوگيالىق جاعدايدىڭ جاقسارعانىن باياندادى.
قالا اكىمى قازىرگى سانيتارلىق-ەپيدەميولوگيالىق جاعداي، كوروناۆيرۋس ىندەتىنىڭ تارالۋىنا جول بەرمەۋ، سونداي-اق كارانتين رەجيمىن قامتاماسىز ەتۋ جانە الەۋمەتتىك كومەككە مۇقتاج تۇرعىندارعا قولداۋ كورسەتۋ ماقساتىندا قابىلدانىپ جاتقان شارالار تۋرالى ايتتى.
«شىمكەنت قالاسىندا كوروناۆيرۋس ينفەكتسياسىنىڭ تارالۋ قارقىنى باسەڭدەي باستادى. وتكەن تاۋلىكتە 54 ۆيرۋس جۇقتىرعاندار تىركەلىپ، ءوسىم 1,2 پايىزدى قۇراعان. وسى ايدىڭ باسىنداعى كورسەتكىشتەرمەن سالىستىرعاندا ەكى ەسەگە تومەندەگەن. سونىمەن قاتار، جەدەل جاردەم شاقىرۋ 43 پايىزعا ازايىپ، ستاتسيونارلاردا ەم الۋشىلاردىڭ سانى 56,9 پايىزعا تومەندەپ وتىر. ءسىزدىڭ تاپسىرماڭىزبەن قالا قويمالارىندا ءبىر ايلىق ءدارىنىڭ قورى جاساقتالدى. بۇگىندە شەت مەملەكەتتەن 2 ملن. 676 مىڭ فلاكون ءبىرىنشى كەزەكتەگى دارىلەر مەن 16 ملن. 700 مىڭ ماسكا جەتكىزىلدى. سونداي-اق، قوسىمشا 58 يۆل، 250 «بوبروۆ» تىنىس الۋ اپپاراتتارى جانە 26 رەانيماتسيالىق مونيتورلار الىندى. قازىرگى تاڭدا رەانيماتسيالىق ورىننىڭ 88,7 پايىزى يۆل اپپاراتتارىمەن قامتىلىپ وتىر»، - دەدى قالا باسشىسى.
مۇرات ايتەنوۆ توتەنشە جاعدايعا وراي تابىسىنان ايىرىلعان ازاماتتارعا تيەسىلى 42500 تەڭگە كولەمىندەگى بىرجولعى تولەم شىمكەنت قالاسىنىڭ 100 504 ازاماتىنا بەرىلگەنىن دە اتاپ ءوتتى.
تەلەفون ارقىلى سويلەسۋ بارىسىندا پرەزيدەنت احۋالدى قاتاڭ باقىلاۋدا ۇستاپ، اتالعان مىندەتكە باسىم باعىت رەتىندە ءمان بەرۋدى تاپسىردى. بۇل رەتتە كارانتين شارالارىن ساقتاۋدىڭ ماڭىزدى ەكەنى جانە حالىققا ءتۇسىندىرۋ جۇمىستارىن بەلسەندى تۇردە جۇرگىزە بەرۋ كەرەكتىگىن ايتتى.
شىمكەنت
