Auezov University-دە ءوڭىر عىلىمىن دامىتۋعا باعىتتالعان فورسايت ورتالىعى اشىلدى

222
Adyrna.kz Telegram
https://adyrna.kz/storage/uploads/2AbIaOA2LOyVgsrz85c3wSpDjdz0HQnUUWYv8TpT.jpg

عىلىم مەن ءوندىرىس اراسىنداعى بايلانىستى نىعايتىپ، ايماقتىڭ عىلىمي الەۋەتىن ارتتىرۋعا باعىتتالعان ماڭىزدى باستاما جۇزەگە استى. Auezov University-دە قازاقستان رەسپۋبليكاسى پرەزيدەنتىنىڭ جانىنداعى ۇلتتىق عىلىم اكادەمياسىنىڭ باستاماسىمەن جانە شىمكەنت قالاسى اكىمدىگىمەن بىرلەسىپ قۇرىلعان فورسايت ورتالىعىنىڭ سالتاناتتى اشىلۋى ءوتتى. جاڭا قۇرىلىم عالىمدار مەن ءوندىرىس وكىلدەرىنىڭ ءوزارا ىنتىماقتاستىعىن جولعا قويىپ، ءوڭىردىڭ وزەكتى ماسەلەلەرىنە عىلىمي تۇرعىدان شەشىم تابۋعا مۇمكىندىك بەرەدى.

ورتالىقتىڭ اشىلۋىنا وراي ايماق عىلىمىنىڭ باسىم باعىتتارىن ايقىنداۋعا ارنالعان فورسايت سەسسياسى ۇيىمداستىرىلدى. باسقوسۋعا ۇلتتىق عىلىم اكادەمياسىنىڭ وكىلدەرى، جوعارى وقۋ ورىندارىنىڭ باسشىلارى، زەرتتەۋشىلەر مەن ءوندىرىس سالاسىنىڭ ماماندارى قاتىستى.

سەسسيا بارىسىندا ۋنيۆەرسيتەتتىڭ باسقارما توراعاسى – رەكتورى مۇحتار تولەگەن مەملەكەت باسشىسىنىڭ 28 قازانداعى جولداۋىندا بەلگىلەنگەن ونەركاسىپتى تەحنولوگيالىق جاڭعىرتۋ، سۋ رەسۋرستارىن ءتيىمدى پايدالانۋ جانە جاساندى ينتەللەكتىنى ەنگىزۋ مىندەتتەرىنە توقتالدى.

«وڭىرىمىزدە وسى مىندەتتەردى جۇزەگە اسىرۋ ءۇشىن كاسىپورىنداردىڭ ناقتى سۇرانىسىن تالقىلاپ، ونى عىلىمي زەرتتەۋ تاقىرىبىنا اينالدىرۋ – ورتاق مىندەتىمىز»، - دەدى رەكتور.

ءوز كەزەگىندە ۇلتتىق عىلىم اكادەمياسىنىڭ ۆيتسە-پرەزيدەنتى ەلەنا شەۆچەنكو ءوڭىردىڭ عىلىمي الەۋەتىن كوتەرۋمەن قاتار، وتاندىق ءونىم ءوندىرىسىن وركەندەتۋگە جانە عىلىمي ازىرلەمەلەردى تاجىريبەگە ەنگىزۋگە باسىمدىق بەرۋ قاجەتتىگىن اتاپ ءوتتى.

فورسايت سەسسياسى اياسىندا كومىردى تەرەڭ وڭدەۋ، وندىرىستىك قالدىقتاردان ينەلى كوكس الۋ، ەكولوگيالىق قاۋىپ-قاتەرلەردى باعالاۋ، جۇرەك-قان تامىرلارى اۋرۋلارىنىڭ الدىن الۋ، سونداي-اق مەديتسينا سالاسىندا جاساندى ينتەللەكتىنى قولدانۋ باعىتىنداعى جوبالار تانىستىرىلدى.

جاڭا ورتالىق ءوڭىر كاسىپورىندارىنىڭ وكىلدەرىنە، جوعارى وقۋ ورىندارىنىڭ عالىمدارىنا، مەديتسينا قىزمەتكەرلەرى مەن باسقا دا زەرتتەۋشىلەرگە بىرلەسىپ جۇمىس ىستەۋگە ارنالعان ورتاق الاڭ ۇسىنادى. مۇندا ءارتۇرلى سالا ماماندارى ءوز ۇسىنىستارىن ورتاعا سالىپ، وزەكتى ماسەلەلەردى تالقىلاپ، بىرلەسكەن باستامالار مەن پراكتيكالىق شەشىمدەر ازىرلەي الادى. بۇل عىلىمي ىزدەنىستەردى ايماقتىڭ ناقتى قاجەتتىلىكتەرىمەن ۇشتاستىرىپ، زەرتتەۋ ناتيجەلەرىن وندىرىسكە ەنگىزۋگە جول اشادى.

سالتاناتتى ءراسىم اياسىندا مۇحتار اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتى مەن ۇلتتىق عىلىم اكادەمياسى اراسىندا ىنتىماقتاستىق تۋرالى مەموراندۋمعا قول قويىلدى. اتالعان قۇجات بىرلەسكەن عىلىمي ىزدەنىستەر مەن يننوۆاتسيالىق جوبالاردى جۇزەگە اسىرۋعا نەگىز قالايدى.

ءىس-شارا ۋنيۆەرسيتەت جانىنان قۇرىلعان AUEZOV AI MEDIA STUDIO ينتەراكتيۆتى ءبىلىم بەرۋ مەدياستۋدياسىنىڭ اشىلۋىمەن جالعاستى. زاماناۋي تەحنولوگيالارمەن جابدىقتالعان بۇل كەڭىستىك وقىتۋشىلار مەن ستۋدەنتتەرگە جاساندى ينتەللەكت قۇرالدارىنىڭ كومەگىمەن بەينەساباقتار مەن تسيفرلىق وقۋ رەسۋرستارىن ازىرلەۋگە جاعداي جاسايدى. باستاما ءبىلىم بەرۋ ۇدەرىسىن جەتىلدىرىپ، جوعارى وقۋ ورنىنىڭ تسيفرلىق ينفراقۇرىلىمىن ودان ءارى دامىتۋعا باعىتتالعان.

پىكىرلەر