فوتو:medobr.com
رەسەيدىڭ يركۋتسك وبلىسىنداعى ەپيدەميولوگيالىق جاعدايعا بايلانىستى قازاقستاندا الدىن الۋ شارالارى قابىلداندى. مەملەكەتتىك شەكاراداعى وتكىزۋ پۋنكتتەرىندە سانيتاريالىق-كارانتيندىك باقىلاۋ جۇرگىزىلىپ جاتىر. بۇل تۋرالى قر دەنساۋلىق ساقتاۋ مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى "ادىرنا".
«قازاقستان رەسپۋبليكاسىنىڭ دەنساۋلىق ساقتاۋ مينيسترلىگى رەسەي فەدەراتسياسىنىڭ يركۋتسك وبلىسىندا اسا قاۋىپتى ينفەكتسياعا كۇدىك كەلتىرىلگەن جاعداي تۋرالى ەپيدەميولوگيالىق احۋالدى باقىلاۋدا ۇستاپ وتىر. قازاقستانداعى جاعداي تۇراقتى باقىلاۋدا، الدىن الۋ سيپاتىنداعى شارالار قابىلداندى. مەملەكەتتىك شەكاراداعى وتكىزۋ پۋنكتتەرىندە سانيتاريالىق-كارانتيندىك باقىلاۋ جۇزەگە اسىرىلۋدا. كولىكتىڭ بارلىق ءتۇرى بويىنشا دەنە قىزۋى جوعارى، اۋرۋ بەلگىلەرى نەمەسە اسا قاۋىپتى ينفەكتسياعا كۇدىك بار ادامدار انىقتالعان جوق»، – دەپ حابارلادى ۆەدومستۆو.
الدىن الا باعالاۋ بويىنشا، ينفەكتسيانىڭ قازاقستانعا اكەلىنۋ قاۋپى تومەن. مينيسترلىكتىڭ مالىمەتىنشە، جاعدايعا بەرىلەتىن باعا مەن قابىلداناتىن شارالار رەسمي اقپاراتتىڭ تۇسۋىنە قاراي ناقتىلانىپ وتىرادى.
دەنساۋلىق ساقتاۋ مينيسترلىگى ازاماتتارعا ساپاردان كەيىن اۋرۋ بەلگىلەرى بايقالسا، مەديتسينالىق كومەككە دەر كەزىندە جۇگىنۋگە كەڭەس بەردى. سونداي-اق دارىگەرگە بارعان كەزدە بولعان جەرى مەن ساپار مەرزىمدەرىن حابارلاۋ قاجەت.
ۆەدومستۆو ازاماتتاردى اقپاراتتى تەك رەسمي دەرەككوزدەردەن الۋعا شاقىردى.
رەسەيلىك ماماندار قازىرگى ۋاقىتتا ەپيدەميولوگيالىق تەكسەرۋ جۇرگىزىپ جاتىر. سوڭعى دياگنوز ازىرگە رەسمي تۇردە راستالماعان. ينفەكتسيانىڭ ىقتيمال كوزى مەن جۇقتىرۋ جاعدايلارى انىقتالۋدا.
مەديتسينالىق باقىلاۋعا 197 بايلانىستا بولعان ادام الىنعان. قولدا بار مالىمەت بويىنشا، ولاردىڭ ەشقايسىسىنان اۋرۋ بەلگىلەرى انىقتالماعان، زەرتحانالىق تالداۋ ناتيجەلەرى تەرىس. شەلەحوۆ اۋداندىق اۋرۋحاناسىندا قاجەتتى ەپيدەمياعا قارسى شارالار جۇرگىزىلىپ جاتىر.
4 قازاندا، جەكسەنبى كۇنى روسپوترەبنادزوردىڭ ءباسپاسوز قىزمەتى يركۋتسك وبلىسى، يركۋتسك قالاسى جانە شەلەحوۆتاعى سانيتاريالىق-ەپيدەميولوگيالىق جاعداي تۇراقتى ەكەنىن حابارلاعان. ۆەدومستۆو وبا اۋرۋىنىڭ تىركەلمەگەنىن مالىمدەدى.
يركۋتسك وبلىسىندا 28 جاستاعى ايەلدىڭ ءولىمىنىڭ الدىن الا سەبەبى ەتيولوگياسى انىقتالماعان پنەۆمونيا رەتىندە كورسەتىلگەن.
بۇعان دەيىن قازاقستان حالقىن يممۋنداۋ ءۇشىن رەسەيدە وندىرىلگەن تۇماۋعا قارسى ۆاكتسينانىڭ 2,1 ملن دوزاسى ساتىپ الىنعانى حابارلانعان. تەگىن ۆاكتسيناتسيامەن حالىقتىڭ ەڭ وسال توپتارىن قامتۋ جوسپارلانىپ وتىر.
